.png)
.png)
.jpg)
.jpg)
ក្រសួងសុខាភិបាល ឱ្យឈប់បរិភោគត្រីក្រពត ក្រោយពុលមនុស្ស៧នាក់នៅកំពង់ឆ្នាំង
- ថ្ងៃសៅរ៍ ទី៦ ខែកក្កដា ឆ្នាំ២០២៤ ម៉ោង ៣:៥៩ នាទី រសៀល
ភ្នំពេញ៖ ក្រសួងសុខាភិបាល ក្រើនរម្លឹកកុំឱ្យប្រជាពលរដ្ឋបរិភោគត្រីក្រពត បន្ទាប់ពីមនុស្ស៧នាក់ នៅខេត្តកំពង់ឆ្នាំង បានពុល ដែលមានអាការៈធ្ងន់ធ្ងរ និងត្រូវបញ្ចូនទៅសង្គ្រោះបន្ទាន់នៅមន្ទីរពេទ្យ។ បើតាមក្រសួងសុខាភិបាល ជាតិពុលក្នុងខ្លួនត្រីក្រពតនេះ មិនអាចកម្ចាត់ចោលតាមរយៈការចម្អិន ឬដាក់ឱ្យកកឡើយ ជាពិសេសអាចបណ្ដាលឱ្យមានជំងឺធ្ងន់ធ្ងរ និងស្លាប់បាន។
នៅកម្ពុជា មានត្រីក្រពត៩ប្រភេទ ក្នុងនោះ ៥ប្រភេទមានជាតិពុល រួមមាន ត្រីក្រពតភ្នែកក្រហម , ត្រីក្រពតអុចធំ, ត្រីក្រពតកូសាំងស៊ីន, ត្រីក្រពតអុចបៃតង និងត្រីក្រពតហ្លូវៀធីលីស។ ជាតិពុលដែលមានក្នុងត្រីទាំងនេះ អាចបណ្ដាលឱ្យមានជំងឺធ្ងន់ធ្ងរ និងស្លាប់ ក្រោយជាតិពុលជ្រាបប៉ះប្រព័ន្ធសរសៃប្រសាទកណ្ដាល។
រូបភាពពី៖ ក្រសួងសុខាភិបាល
សេចក្ដីប្រកាសព័ត៌មានរបស់ក្រសួងសុខាភិបាលចេញផ្សាយនៅព្រឹកថ្ងៃទី៦ កក្កដានេះ បញ្ជាក់ថា បន្ទាប់ពីបរិភោគត្រីក្រពតទាំងនេះ បាន ២០នាទី ទៅ ២ម៉ោង នឹងបង្ហាញរោគសញ្ញាដូចជា រមាស់នៅបបូរមាត់ និងមាត់ ឈឺក្បាល វិលមុខ ចុងអវយវៈ ពិបាកនិយាយ បើស្ថិតក្នុងស្ថានភាពពុលខ្លាំង គឺធ្វើឱ្យថប់ដង្ហើមស្លាប់តែម្តង។
ទាក់ទងនឹងវិធីសង្រ្គោះវិញ ក្រសួងសុខាភិបាល ប្រាប់ឱ្យថា ក្រោយពុល ត្រូវក្អួត ដើម្បីអាចជួយបញ្ចេញសារធាតុពុលបានមួយចំណែកពីក្នុងខ្លួនអ្នកបរិភោគ បន្ទាប់មក ត្រូវប្រញាប់បញ្ជូនទៅរកការជួយសង្គ្រោះជាបន្ទាន់ នៅមណ្ឌលសុខភាព ឬមន្ទីរពេទ្យដែលនៅជិតបំផុត។ សូមបញ្ជាក់ថា ជាតិពុលខ្ពស់បំផុតរបស់ត្រីទាំង៥ប្រភេទនេះ មាននៅរដូវត្រីពង ក្នុងខែកុម្ភៈ មីនា និងចន្លោះខែកក្កដា ទៅខែកញ្ញា៕
© រក្សាសិទ្ធិដោយ thmeythmey.com
Tag:
