.png)
UNHCR៖ ដំណើរជនភៀសខ្លួនឆ្លងកាត់ផ្លូវគោកនៅអាហ្វ្រិក គ្រោះថ្នាក់ខ្លាំងជាងនៅសមុទ្រតំបន់មេឌីទែរ៉ាណេ
- ថ្ងៃអាទិត្យ ទី៧ ខែកក្កដា ឆ្នាំ២០២៤ ម៉ោង ៩:៣៩ នាទី យប់
ជនភៀសខ្លួនម្នាក់នៅតំបន់សាហារ៉ា។ រូបថតឆ្នាំ២០០៥ AFP - SAMUEL ARANDA
ដោយ៖ហេង ឧត្តម/ RFI ខេមរភាសា
ជនភៀសខ្លួន ប្រឈមមុខនឹងគ្រោះថ្នាក់បាត់បង់ជីវិត រងគ្រោះអំពើហិង្សា និងការរំលោភបំពានផ្សេងៗ បានកើតមានជាច្រើនហូរហែ។ មន្ត្រីជាន់ខ្ពស់ឧត្តមស្នងការជនភៀសខ្លួន នៃអង្គការសហប្រជាជាតិ បានក្រើនរំឭកដល់ថ្នាក់ដឹកនាំប្រទេសអឺរ៉ុប ឲ្យគិតគូរពិចារណារកដំណោះស្រាយជួយជនភៀសខ្លួនជាបន្ទាន់ ក្រោយពីទទួលបានសក្ខីកម្មពីជនភៀសខ្លួនជាច្រើននាក់។ ជនភៀសខ្លួនទាំងនោះ ដែលធ្វើដំណើរឆ្លងកាត់តំបន់សាហារ៉ានិងឆ្ពោះទៅសមុទ្រតំបន់មេឌីទែរ៉ាណេ បានបញ្ជាក់ថា ពួកគេបានស្គាល់អ្នកស្លាប់ និងឃើញសាកសព នៅតាមដំណើរផ្លូវគោក គួរឲ្យអាណោចអាធ័ម។
បណ្តាជនភៀសខ្លួនដែលរួចជីវិតពីស្លាប់ បានប្រាប់ឧត្តមស្នងការជនភៀសខ្លួនថា ពួកគេបានឃើញសាកសពមនុស្ស និងបានស្គាល់មនុស្សដែលស្លាប់ទៅហើយ នៅតាមដំណើរផ្លូវភៀសខ្លួនរបស់ពួកគេ។ ជនភៀសខ្លួនក៏លើកឡើងដែរថា ដំណើរតាមផ្លូវគោក មានគ្រោះថ្នាក់ ប្រឈមនឹងហានិភ័យបាត់បង់ជីវិត ឬគ្រោះថ្នាក់ហិង្សាផ្សេងៗ ច្រើនជាងតាមផ្លូវទឹក ទៅទៀត។
នេះបើតាមការរៀបរាប់ពីសំណាក់លោក Vincent Cochetel ប្រេសិតពិសេស របស់ឧត្តមស្នងការជនភៀសខ្លួន នៃអង្គការសហប្រជាជាតិ ទទួលបន្ទុកនៅតំបន់អឺរ៉ុបនិងមេឌីទែរ៉ាណេ។
នេះបើតាមការរៀបរាប់ពីសំណាក់លោក Vincent Cochetel ប្រេសិតពិសេស របស់ឧត្តមស្នងការជនភៀសខ្លួន នៃអង្គការសហប្រជាជាតិ ទទួលបន្ទុកនៅតំបន់អឺរ៉ុបនិងមេឌីទែរ៉ាណេ។
មន្ត្រីជាន់ខ្ពស់ឧត្តមស្នងការជនភៀសខ្លួន រូបនេះ សង្កត់ធ្ងន់ថា ក្នុងចំណោមជនភៀសខ្លួន ៣១ ០០០ នាក់ ដែលបានផ្តល់សម្ភាសន៍ មាន ១ ១៨០ នាក់ បានឃើញសាកសពមនុស្ស ដេកដួល ត្រូវបំបរបង់ចោលតាមផ្លូវ ជាក់ស្តែងដោយផ្ទាល់ភ្នែក នៅអំលុងពេលពួកគេធ្វើដំណើរឆ្លងកាត់តំបន់វាលខ្សាច់សាហារ៉ា ចន្លោះខែមករា ឆ្នាំ២០២០ និងឆ្នាំ២០២៤។ ហើយអ្នកដែលភៀសខ្លួនតាមផ្លូវគោកទាំងនោះ សុទ្ធតែបានឮបានដឹងរឿងដ៏សោកសង្រេងនេះ។
ជនភៀសខ្លួនស្វែងរកជីវិតថ្មី នៅដីទ្វីបថ្មី ក៏ព្រោះតែបញ្ហាជម្លោះនៅក្នុងប្រទេសរបស់ពួកគេ ឬរងគ្រោះព្រោះតែបញ្ហាអាកាសធាតុ បញ្ហាសេដ្ឋកិច្ច ឬក៏ព្រោះតែរើសអើងផ្សេងៗ។ ក្នុងដំណើរឆ្លងកាត់តំបន់អាហ្វ្រិក ជនភៀសខ្លួន ជាទូទៅត្រូវប្រឈមមុខនឹងការធ្វើទារុណកម្មហិង្សា ចាប់ជំរិត ចាប់ឃុំឃាំង និងរំលោភសេពសន្ធវៈ។ បើតាមទិន្នន័យសម្ភាសន៍របស់ឧត្តមស្នងការជនភៀសខ្លួន, មាន៣៨% រងគ្រោះហិង្សារាងកាយ ហើយ ១៥% រងគ្រោះរំលោភផ្លូវភេទ។ មិនតែប៉ុណ្ណោះ ការជួញដូរសរីរាង្គកាយ ក៏ជាការប្រឈមចំពោះជនភៀសខ្លួនដែរ។ ជនភៀសខ្លួនខ្លះត្រូវគេលួចវះក្រលៀនយកទៅបាត់ ទាំងមិនដឹងខ្លួន ក្រោយពីត្រូវថ្នាំសណ្តំ។ លើសពីនេះ ក៏មានការផ្សព្វផ្សាយពាណិជ្ជកម្មអូសទាញ ឲ្យលក់ក្រលៀន ដើម្បីបានលុយកាក់ធ្វើដំណើរទៅមុខទៀត។
ជនភៀសខ្លួន ដែលត្រូវចាញ់បោកពីសំណាក់ឈ្មួញអ្នកនាំផ្លូវ ជាបញ្ហា១ តែបញ្ហា១ជាន់ទៀតចំពោះអ្នកភៀសខ្លួនតាមផ្លូវគោកទាំងនោះ គឺក្រុមកម្លាំងប្រដាប់អាវុធ ឬពួកភេរវជនជីហាត ឬក៏ក្រុមកម្លាំងអន្ធពាល។
បើតាមលោក Vincent Cochetel ប្រេសិតពិសេសរបស់ឧត្តមស្នងការជនភៀសខ្លួន, ការផ្សព្វផ្សាយទិន្នន័យនិងព័ត៌មានស្តីពីជនភៀសខ្លួននៅតំបន់សាហារ៉ានេះ ពុំមែនឲ្យជនភៀសខ្លួន ជ្រើសរើសធ្វើដំណើរតាមផ្លូវទឹក ឬក៏ផ្លូវគោកនោះទេ ក៏ប៉ុន្តែ ឧត្តមស្នងការជនភៀសខ្លួន ចង់ក្រើនរំឭកប្រាប់ដល់ថ្នាក់ដឹកនាំប្រទេសនីមួយៗ ឲ្យគិតគូរពិចារណា រកដំណោះស្រាយជួយជនភៀសខ្លួន ជាបន្ទាន់៕
© រក្សាសិទ្ធិដោយ thmeythmey.com
.gif)
