.png)
.png)
.jpg)
.jpg)
បេឡារុសនិងចិន ធ្វើសមយុទ្ធប្រឆាំងភេរវកម្មនៅក្បែរព្រំដែនប៉ូឡូញ
- ថ្ងៃពុធ ទី១០ ខែកក្កដា ឆ្នាំ២០២៤ ម៉ោង ៩:២៩ នាទី យប់
បេឡារុសនិងចិន ធ្វើសមយុទ្ធប្រឆាំងភេរវកម្មនៅក្បែរព្រំដែនប៉ូឡូញ © Міністерство оборони Республіки Білорусь / Telegram
ដោយ៖អៀង សុខម៉ិញ (RFI ខេមរភាសា)
បេឡារុស-ចិន បានបើកសមយុទ្ធរួមគ្នា នៅថ្ងៃចន្ទទី៨ កក្កដា២០២៤ នៅក្នុងមូលដ្ឋានហ្វឹកហាត់មួយរបស់បេឡារុស ដែលស្ថិតនៅចម្ងាយតែប៉ុន្មានគីឡូម៉ែត្រពីប៉ូឡូញប្រទេសតែប៉ុណ្ណោះ។ សមយុទ្ធទ្វេភាគីនៅជាប់របងខាងកើតបំផុតរបស់អូតង់នេះ ប្រព្រឹត្តទៅជួនចំពេលអង្គការសម្ព័ន្ធអាត្លង់ទិកបើកជំនួបកំពូលនៅថ្ងៃអង្គារនេះ នៅទីក្រុងវ៉ាស៊ីនតោនតែម្តង។
ប្រឈមនឹងស្ថានការណ៍ពិភពលោកគួរឱ្យព្រួយបារម្ភ ចិននិងបេឡារុសបានបើកធ្វើសមយុទ្ធទ្វេភាគី ដើម្បីហ្វឹកហាត់ អំពីវិធីសាស្ត្រនិងតាកទិកយោធាថ្មីៗ។ ជាលំហាត់សឹកប្រយុទ្ធប្រឆាំងនឹងអំពើភេរវកម្ម ដឹកនាំដោយក្រុមយោធាបេឡារុសនិងចិន ដោយមានបញ្ចូលប្រតិបត្តិការចុះថតនៅពេលយប់ និងចេញធ្វើប្រតិបត្តិការនៅក្នុងតំបន់មានមនុស្សរស់នៅផ្តុំគ្នាច្រើនផង។ នេះបើតាមសេចក្តីថ្លែងការណ៍របស់ក្រសួងការពារជាតិបេឡារុស ដែលមានផ្សព្វផ្សាយតាមបណ្តាញតេឡេក្រាម ដោយពុំបញ្ជាក់ទេថាតើមានទាហានប៉ុន្មាននាក់ចូលរួមធ្វើសមយុទ្ធនេះ។
ចំណែកខាងចិនវិញ នៅក្នុងសេចក្តីថ្លែងការណ៍ក្រសួងការពារជាតិបានត្រឹមលើកសរសើរ ពិធីទទួលស្វាគមន៍ទាហានចិនដែលបានទៅដល់ប្រទេសបេឡារុស តាំងពីថ្ងៃទី ៦កក្កដា ដើម្បីធ្វើសមយុទ្ធបង្កើនសមត្ថភាពនិងពង្រីកកិច្ចសហប្រតិបត្តិការយោធារវាងគ្នា។
អ្វីដែលគួរឱ្យកត់សម្គាល់បំផុតនោះ គឺជម្រើសទីតាំង និងពេលវេលានៃសមយុទ្ធ។ ចាប់ផ្តើមពីថ្ងៃទី ៨ រហូតដល់ថ្ងៃទី១៩កក្កដា សមយុទ្ធចិន-បេឡារុសប្រព្រឹត្តទៅនៅក្នុងជំរំហ្វឹកហ្វឺន នាភាគខាងនិរតីនៃប្រទេសបេឡារុស និងក្នុងចម្ងាយប្រមាណតែប៉ុន្មានគីឡូម៉ែត្រប៉ុណ្ណោះពីព្រំដែនប៉ូឡូញ ដែលជាតំណាងរបងខាងកើតបំផុតរបស់អង្គការសម្ព័ន្ធអាត្លង់ទិក(អូតង់)។ ហើយនៅថ្ងៃនេះ សមាជិកអូតង់ទាំងអស់ ត្រូវជួបជុំគ្នាក្នុងជំនួបកំពូលនៅទីក្រុងវ៉ាស៊ីនតោន ដើម្បីពិភាក្សាអំពីការផ្តល់ជំនួយយោធានិងហិរញ្ញវត្ថុបន្ថែមដល់អ៊ុយក្រែន ដែលកំពុងមានសង្គ្រាមជាមួយរុស្ស៊ី។
បេឡារុសធ្លាប់បានអនុញ្ញាតឱ្យរុស្ស៊ីប្រើប្រាស់ទឹកដីរបស់ខ្លួនជាមូលដ្ឋានទ័ពមួយសម្រាប់បើកប្រតិបត្តិការយោធាពិសេសវាយលុកលើក្រុងកៀវ កាលពីខែកុម្ភៈ២០២២ ដែលក្រុមបស្ចិមលោកចាត់ទុកជាទង្វើឈ្លានពានរបស់រុស្ស៊ីលើអ៊ុយក្រែន។ ថ្ងៃនេះ នៅក្នុងសារដាច់ដោយឡែកទៀត ក្រសួងការពារជាតិបេឡារុស បានបន្ទោសថាអូតង់បង្កើនវត្តមានយោធាកាន់តែច្រើនឡើងនៅតាមព្រំដែនជាមួយបេឡារុស ទើបបេឡារុសត្រូវប្រើគ្រប់លទ្ធភាពរារាំង។ បើនរណាហ៊ានឆ្លងព្រំដែននឹងរងការព្រមានធ្ងន់ហើយ៕
© រក្សាសិទ្ធិដោយ thmeythmey.com
