.png)
លោក បៃឌិន អំពាវនាវរកការរួបរួម ក្រោយករណីបាញ់ប្រហារលើលោក ត្រាំ
- ថ្ងៃចន្ទ ទី១៥ ខែកក្កដា ឆ្នាំ២០២៤ ម៉ោង ១១:៣៩ នាទី ព្រឹក
លោក ចូ បៃឌិន ថ្លែងពីសេតមាននៅថ្ងៃទី១៤ ខែកក្កដា ។ រូបភាព ៖ AFP
ប្រធានាធិបតីអាម៉េរិក ចូ បៃឌិន នៅថ្ងៃទី១៤ ខែកក្កដា បានថ្កោលទោសការប៉ុនប៉ងធ្វើឃាតលើគូប្រជែងបក្សសាធារណរដ្ឋ លោក ដូណាល់ ត្រាំ ដោយអំពាវនាវឲ្យមានការួបរួមគ្នា។ លោកបៃឌិន បង្ហាញភាពរីករាយពេលគូប្រជែងរបស់ខ្លួនបានជាសះស្បើយវិញ ក្រោយពីរងរបួសនៅក្នុងការព្រឹត្តិការណ៍បាញ់ប្រហារនេះ។
ពីសេតវិមាន លោក ចូ បៃឌិន ប្រធានាធិបតីអាម៉េរិក បានថ្លែងទៅកាន់ប្រជាជនអាម៉េរិកនៅល្ងាចថ្ងៃទី ១៤ ខែកក្កដា អំពីភាពចាំបាច់នៃការួបរួមគ្នា។ លោកបានស្នើឲ្យមានការពិនិត្យមើលនូវអ្វីដែលបានកើតឡើងអំឡុងការប្រមូលផ្តុំយុទ្ធនាការរបស់លោក ដូណាល់ ត្រាំ បេក្ខជនប្រធានាធិបតីរបស់បក្សសាធារណរដ្ឋ នៅរដ្ឋ Pennsylvania។
« គ្មានកន្លែងណាមួយនៅអាម៉េរិក សម្រាប់អំពើហិង្សាបែបនេះ ទោះជាអំពើហិង្សាណាក៏ដោយ»។ លោក បៃឌិន បានសង្គត់ធ្ងន់បែបនេះ ដោយបន្តថា ការប៉ុនប៉ងធ្វើឃាតគឺផ្ទុយពីតម្លៃរបស់អាម៉េរិក។
កន្លងមក មានសេចក្តីរាយការណ៍ថា ការិយាល័យស៊ើបអង្កេតសហព័ន្ធអាម៉េរិក (FBI) បានកំណត់អត្តសញ្ញាណមុខសញ្ញាដែលពាក់ព័ន្ធក្នុងការបាញ់ប្រហារនៅឯការប្រមូលផ្តុំយុទ្ធនាការរបស់លោក ត្រាំ ។
លោក ត្រាំ ត្រូវបានគេបាញ់ចំត្រចៀកអំឡុងពេលប្រមូលផ្តុំជួបអ្នកគាំទ្របោះឆ្នោតនៅថ្ងៃទី ១៣ ខែកក្កដា ហើយបច្ចុប្បន្ន FBI កំពុងស៊ើបអង្កេតការប៉ុនប៉ងធ្វើឃាតនេះ។ FBI បានកំណត់អត្តសញ្ញាណបុរសអាយុ ២០ ឆ្នាំម្នាក់ឈ្មោះ Thomas Matthew Crooks ដែលសង្ស័យក្នុងការបាញ់ប្រហារនេះ។
កំណត់ត្រាអ្នកបោះឆ្នោតរបស់រដ្ឋនេះបង្ហាញថា យុវជនរូបនេះបានចុះឈ្មោះបោះឆ្នោតជាអ្នកគ្រាំបក្សសាធារណរដ្ឋ។
ភ្នាក់ងារសម្ងាត់អាម៉េរិកបានអះអាងថា ខ្មាន់កាំភ្លើង ត្រូវបានសម្លាប់ ហើយយ៉ាងហោចណាស់មនុស្សម្នាក់ដែលចូលរួមក្នុងព្រឹត្តិការណ៍នៅទីក្រុង Butler រដ្ឋ Pennsylvania ក៏បានស្លាប់ដែរ។
មកទល់ពេលនេះ អាជ្ញាធរអាម៉េរិកមិនទាន់ប្រកាសពីមូលហេតុនៃការវាយប្រហារនេះនៅឡើយទេ។ មេដឹកនាំបក្សសាធារណរដ្ឋ និងប្រជាធិបតេយ្យបានថ្កោលទោសភ្លាមៗចំពោះការបាញ់ប្រហារនេះ។
លោកប្រធានាធិបតី ចូ បៃឌិន បានប្រាប់អ្នកសារព័ត៌មានក្រោយឧបទ្ទវហេតុថា៖ « វាឈឺ វាឈឺ ! នេះជាហេតុផលមួយដែលយើងត្រូវបង្រួបបង្រួមប្រទេសនេះ។ យើងមិនអនុញ្ញាតឱ្យរឿងនេះកើតឡើងបានទេ។ យើងមិនអាចទ្រាំទ្រនឹងរឿងនេះបានទេ»។
ព្រឹត្តិការណ៍បាញ់ប្រហារថ្ងៃទី១៣ ខែកក្កដា ជាការបាញ់ប្រហារលើកដំបូង សំដៅទៅលើប្រធានាធិបតីអាម៉េរិក ឬបេក្ខជនមកពីបក្សធំមួយ ចាប់តាំងពីមានការប៉ុនប៉ងធ្វើឃាតលើប្រធានាធិបតីសាធារណរដ្ឋ Ronald Reagan ក្នុងឆ្នាំ ១៩៨១។
ឧបទ្ទវហេតុនេះ បានកើតឡើងតិចជាងបួនខែមុនការបោះឆ្នោតប្រធានាធិបតីអាម៉េរិកនៅថ្ងៃទី៥ ខែវិច្ឆិកា ដែលលោក បៃឌិន និងលោក ត្រាំ នឹងត្រូវប្រជែងដណ្តើមកៅអីសេតវិមាន៕
© រក្សាសិទ្ធិដោយ thmeythmey.com
Tag:
.gif)
