.png)
.png)
.jpg)
.jpg)
កីឡាករគុនខ្មែរត្រៀមទស្សនាចម្លាក់គុនខ្មែរលើជញ្ជាំងប្រាសាទនានា
- ថ្ងៃពុធ ទី១៧ ខែកក្កដា ឆ្នាំ២០២៤ ម៉ោង ១២:៥៩ នាទី រសៀល
សៀមរាប៖ កីឡាករគុនខ្មែរល្បីៗជាង១០នាក់នឹងត្រៀមធ្វើដំណើរមកកាន់ខេត្តសៀមរាបនាពេលខាងមុខនេះដើម្បីចូលរួមសកម្មភាពកីឡាមួយចំនួន ក្នុងនោះ ក៏មានកម្មវិធីទស្សនាក្បាច់ចម្លាក់គុនខ្មែរនៅលើជញ្ជាំងប្រាសាទនានាផងដែរ។ គ្រូក្បាច់គុនខ្មែរ និងបុរាណវិទូ នឹងបង្ហាញប្រាប់ប្រវត្តិនានាទាក់ទងទៅនឹងក្បាច់គុនខ្មែរនៅលើជញ្ជាំងប្រាសាទនានានៅកាន់ក្រុមកីឡាករគុនខ្មែរ ។
ក្នុងគោលបំណងបំផុសស្មារតីកីឡាករគុនខ្មែរបន្ថែមទៀត អគ្គនាយកដ្ឋានកីឡានៃក្រសួងអប់រំ យុវជន និងកីឡា, អាជ្ញាធរជាតិអប្សរា និងក្លិបទេសចរណ៍ខេត្តសៀមរាបត្រៀមបង្កើតដំណើរទស្សកិច្ចសិក្សាស្វែងយល់ប្រវត្តិក្បាច់គុនខ្មែរដែលមានឆ្លាក់នៅលើជញ្ជាំងប្រាង្គប្រាសាទនានានៅក្នុងខេត្តសៀមរាប។
កីឡាករគុនខ្មែរថ្នាល អាជីព ស្រី ប្រុស ប្រមាណជាជាង១០នាក់នឹងធ្វើដំណើរមកកាន់ខេត្តសៀមរាបនាខាងមុខនេះដើម្បីស្វែងយល់ពីសាវតានៃក្បាច់គុនខ្មែរដែលមានឆ្លាក់នៅលើជញ្ជាំងប្រាសាទជាច្រើននៅក្នុងខេត្តសៀមរាប។ បុរាណវិទូ គ្រូក្បាច់គុនខ្មែរ និងអ្នកជំនាញកីឡាជាច្រើននាក់បានបញ្ជាក់ថា ក្បាច់គុនខ្មែរមានកំណើតច្រើនពាន់ឆ្នាំមកហើយ ហើយរូបចម្លាក់នៅលើជញ្ជាំងប្រាសាទជាភស្តុតាងស្រាប់។
កីឡាករគុនខ្មែរដែលត្រៀមមកទស្សនារូបចម្លាក់គុនខ្មែរនៅលើជញ្ជាំងប្រាង្គប្រាសាទនឹងត្រូវធ្វើសកម្មភាពកីឡាមួយចំនួន ដូចជា ដើរនៅក្នុងសួនរុក្ខជាតិអង្គរ, ជិះកង់ នៅក្នុងព្រៃអង្គរ, រត់ឡើងភ្នំបាក់ខែង។ល។ បន្ទាប់មក កីឡាករទាំងអស់នឹងទស្សនារូបចម្លាក់គុនខ្មែរនៅតាមជញ្ជាំងប្រាសាទបាយ័ន អង្គរវត្ត និងប្រាសាទដទៃទៀត។
ទស្សនកិច្ចសិក្សានេះ អនុញ្ញាតឲ្យកីឡាករគុនខ្មែរយល់ដឹងកាន់តែច្បាស់ពីតម្លៃនៃវប្បធម៌ដូនតារបស់ខ្មែរ។ គុនខ្មែរចេញពីអាណាចក្រខ្មែរ ឆ្ពោះទៅកាន់ពិភពលោក។
នៅក្នុងដំណើរទស្សនកិច្ចមកកាន់ខេត្តសៀមរាបនៅថ្ងៃទី១៧ខែកក្កដាឆ្នាំ២០២៤ លោក ប៉ុន សុខ អគ្គនាយកនៃអគ្គនាយកដ្ឋានកីឡានៃក្រសួងអប់រំ ដែលបានជួបពិភាក្សាជាមួយតំណាងអាជ្ញាធរជាតិអប្សរា និងក្លិបទេសចរណ៍ខេត្តសៀមរាប បានបញ្ជាក់ថា វិស័យកីឡា និងទេសចរណ៍នេះ គឺជាវិស័យប្រទាក់ក្រឡាគ្នា និងលើកស្ទួយគ្នាទៅវិញទៅមក។
លោកបានបន្តបញ្ចាក់ទៀតថា៖«ការងាររបស់យើង គឺទស្សនាចម្លាក់គុនខ្មែរនៅលើជញ្ជាំងប្រាសាទនានាផង ហើយវាក៏ជាពេលវេលា ស្រាវជ្រាវ និងចងក្រងប្រវត្តិប្រវត្តិគុនខ្មែរបន្ថែមទៀតសម្រាប់ក្មេងជំនាន់ក្រោយ»។
នៅក្នុងដំណើរទស្សនកិច្ចដដែលនេះ លោក ប៉ុន សុខ អគ្គនាយកនៃអគ្គនាយកដ្ឋានកីឡានៃក្រសួងអប់រំ ក៏ត្រៀមបង្កើតសកម្មភាពកីឡា-ទេសចរណ៍មួយចំនួនផ្សេងទៀតជាមួយក្លិបទេសចរណ៍ខេត្តសៀមរាបនាពេលខាងមុខ៕
© រក្សាសិទ្ធិដោយ thmeythmey.com
