.png)
សាលាក្រុងសេអ៊ូល ដាក់វិធានការបំរាមគោចរក្នុងសង្កាត់បុរាណ ដើម្បីគ្រប់គ្រងទេសចរដែលច្រើនជ្រុល
- ថ្ងៃពុធ ទី១៧ ខែកក្កដា ឆ្នាំ២០២៤ ម៉ោង ៧:២៩ នាទី ល្ងាច
ទេសចរដើរក្នុងសង្កាត់បុរាណ Buckchon ទីក្រុងសេអ៊ូល AP - Amir Bibawy
ដោយ៖ម៉ម ពិសី (RFI ខេមរភាសា)
ដើម្បីគ្រប់គ្រងទៅលើចំនួនទេសចរច្រើនជ្រុលហួសប្រមាណ ដែលទៅទស្សនាសង្កាត់បុរាណ Bukchon ក្នុងទីក្រុងសេអ៊ូល សាលាក្រុងសេអ៊ូល បានប្រកាសកាលពីថ្ងៃចន្ទ ទី១៥ ខែកក្កដា ថាគេនឹងអនុវត្តវិធានការដាក់បំរាមគោចរ ក្នុងសង្កាត់បុរាណនេះ។ វិធានការថ្មី ត្រូវបានសម្រេចឡើង បន្ទាប់ពីមានការទាមទារ ពីសំណាក់ប្រជាពលរដ្ឋ ដែលរស់នៅក្នុងសង្កាត់នេះ ដែលពួកគេត្អូញត្អែរពីសំឡេងរំខាន និងកាកសំណល់បន្សល់ទុកដោយទេសចរ ដ៏ច្រើនសន្ធឹកសន្ធាប់ជារៀងរាល់ថ្ងៃ។
ចាប់ពីខែតុលាទៅ សាលាក្រុងសេអ៊ូល នឹងចាប់ផ្តើមអនុវត្តវិធានការថ្មី ដើម្បីដាក់បំរាមគោចរ ទៅលើភ្ញៀវទេសចរទាំងអស់ ដែលចង់ចូលទៅទស្សនាសង្កាត់បុរាណ Bukchon។ តាមរយៈវិធានការថ្មីនេះ ចាប់ពីម៉ោង៥ល្ងាចដល់ម៉ោង១០ព្រឹក គឺគ្មាននរណាម្នាក់ អាចចូលទៅក្នុងសង្កាត់បុរាណនេះបានទៀតទេ លើកលែងតែអ្នកដែលមានផ្ទះរស់នៅក្នុងសង្កាត់នេះ។ ធ្វើបែបនេះ គឺដើម្បីឲ្យប្រជាពលរដ្ឋដែលរស់នៅទីនេះ បានទទួលនូវភាពស្ងប់ស្ងាត់។ បន្ថែមពីនេះ អាជ្ញាធរក្រុងសេអ៊ូល នឹងចាប់ផ្តើមកាត់បន្ថយបន្តិចម្តងៗ នូវការបើកបររថយន្តដឹកភ្ញៀវទេសចរ ដែលធ្វើដំណើរចូលទៅក្នុងសង្កាត់នេះ។
សូមបញ្ជាក់ថា សង្កាត់ Bukchon គឺជាសង្កាត់បុរាណមួយ នៅខាងជើងទីក្រុងសេអ៊ូល។ មានចំណាស់ប្រមាណជា៦០០ឆ្នាំ តាំងតែពីរាជវង្ស Josoen។ សង្កាត់នេះសំបូរទៅដោយផ្ទះបុរាណទាបៗ ដំបូលប្រក់ក្បឿង និងផ្លូវតូចៗកាច់កុងខ្វាត់ខ្វែង ចុះទួលឡើងទួល ក្រាលដោយថ្មបុរាណ។
ផ្អែកតាមតួលេខផ្លូវការរបស់កូរ៉េខាងត្បូង សង្កាត់បុរាណតូចមួយនេះ មានទេសចរមកទស្សនា ប្រមាណជា៦លាននាក់ ជារៀងរាល់ឆ្នាំ។
យោងតាម អ្នករស់នៅក្នុងសង្កាត់នេះម្នាក់ ដែលបានប្រាប់អ្នកយកព័ត៌មាន របស់វិទ្យុបារាំងRFI ប្រចាំនៅសេអ៊ូល គឺដើមឡើយ សង្កាត់ Bukchon ជាភូមិមួយដែលប្រជាជនរស់នៅដោយស្ងប់ស្ងាត់។ ប៉ុន្តែ គឺសាលាក្រុងសេអ៊ូល ដែលបានផ្សព្វផ្សាយពាណិជ្ជកម្ម ទាក់ទាញភ្ញៀវទេសចរ ឲ្យសំរុកបាក់មកសង្កាត់បុរាណនេះ។ ហាងទំនិញ និងភោជនីយដ្ឋាន បានរីកដុះដាលបន្តបន្ទាប់គ្នា ចាំទទួលភ្ញៀវទេសចរច្រើនកកកុញ ជារៀងរាល់ថ្ងៃ។ កាកសំណល់សំរាម ព្រមទាំងសំឡេងថ្លង់រំខានរបស់ភ្ញៀវទេសចរ ខ្លះដើរ ខ្លះឈប់ថតរូបនៅមុខរបបផ្ទះ បានធ្វើឲ្យប្រជាពលរដ្ឋរស់នៅក្នុងសង្កាត់នេះ អត់ទ្រាំលែងបាន ទើបពួកគេបានរួមគ្នាធ្វើញត្តិទាមទារទៅសាលាក្រុង ឲ្យចាត់វិធានការដោះស្រាយ។
ស្ត្រីម្នាក់ ដែលអ្នកទទួលខុសត្រូវការគោរពវិធានការថ្មីរបស់សាលាក្រុង បានបញ្ជាក់ថា ចាប់ពីខែតុលាទៅ គេនឹងអញ្ជើញឲ្យភ្ញៀវទេសចរចេញឲ្យអស់ពីសង្កាត់នេះ នៅវេលាម៉ោង៥ល្ងាច។ ប្រសិនបើផុតម៉ោង៥ល្ងាចហើយ នៅតែមិនចេញ គឺសមត្ថកិច្ចនឹងពិន័យជាប្រាក់ ចំនួន ១១ម៉ឺនវុន ដែលស្មើនឹងប្រមាណ៨០ដុល្លារអាមេរិក។
យ៉ាងណាក៏ដោយ វិធានការនេះ គឺជាវិធានការសាកល្បង ដែលសាលាក្រុងសេអ៊ូល នឹងតាមដានវិភាគពេញមួយឆ្នាំខាងមុខ ដើម្បីសន្និដ្ឋានវាយតម្លៃ ថាវាបានផលវិជ្ជមានកម្រិតណា ឬត្រូវកែប្រែបែបណាទៀត។ ប្រសិនបើវិធានការនេះ ហុចផលល្អ នោះសាលាក្រុងសេអ៊ូល អាចនឹងពង្រីកវិសាលភាព អនុវត្តវានៅតាមសង្កាត់ទេសចរណ៍ផ្សេងទៀត។
គួរកត់សំគាល់ថា មិនមានតែកូរ៉េខាងត្បូងទេ ដែលរងគ្រោះដោយសារតែភាពល្បីល្បាញរបស់ខ្លួនឯង។ នៅជប៉ុន ចំនួនទេសចរច្រើនជ្រុលហួសហេតុ នៅតាមទីតាំងខ្លះ ក៏បានធ្វើឲ្យប្រជាពលរដ្ឋ និងអាជ្ញាធរព្រួយបារម្ភដែរ ព្រោះវាមិនត្រឹមតែរំខានការរស់នៅស្ងប់ស្ងាត់ប៉ុណ្ណោះទេ តែវាអាចជះផលអវិជ្ជមាន ដល់ការអភិរក្សរមណីយដ្ឋានធម្មជាតិ ឲ្យស្ថិតនៅគង់វង់។ ជាក់ស្តែង កាលពីដើមខែកក្កដាកន្លងទៅថ្មីៗនេះ អាជ្ញាធរជប៉ុនបានចេញវិធានការថ្មី តម្រូវឲ្យភ្ញៀវទេសចរដែលចង់ធ្វើដំណើរឡើងទៅលើភ្នំFuji តាមផ្លូវឈ្មោះថា Yoshida គឺត្រូវតែបង់ប្រាក់ចំនួន២០០០យេន។ បន្ថែមពីនេះ គេបានកំណត់កូតា ក្នុងមួយថ្ងៃលក់សំបុត្រឲ្យមនុស្ស ចំនួនតែ៤០០០នាក់ប៉ុណ្ណោះ៕
© រក្សាសិទ្ធិដោយ thmeythmey.com
.gif)
