.png)
.png)
.jpg)
.jpg)
ឆមាសទី១ កម្ពុជានាំចេញជ័រកៅស៊ូបានជាង១៤ម៉ឺនតោន
- ថ្ងៃព្រហស្បតិ៍ ទី១៨ ខែកក្កដា ឆ្នាំ២០២៤ ម៉ោង ៩:៥៩ នាទី យប់
រូបភាព៖ ក្រសួងកសិកម្ម រុក្ខាប្រមាញ់ និងនេសាទ
ដោយ៖ ញ៉ សុខហឿន
ភ្នំពេញ៖ កម្ពុជាបាននាំចេញ ផលិតផលជ័រកៅស៊ូ បានប្រមាណ១៤ ម៉ឺនតោន ក្នុងឆមាសទី១ ឆ្នាំ២០២៤នេះ។ តួលេខនេះ កើនឡើងប្រមាណ១៩ភាគរយ ធៀបនឹងរយៈពេលដូចគ្នាក្នុងឆ្នាំ២០២៣។ ក្រៅពីជ័រកៅស៊ូវ កម្ពុជា ក៏បាននាំចេញឈើកៅស៊ូប្រមាណ ៨,៣៤៨ ម៉ែត្រគូបផងដែរ។ នេះបើយោងតាមរបាយការណ៍របស់អគ្គនាយកដ្ឋានកៅស៊ូ។
យ៉ាងណាក៏ដោយ អគ្គនាយកដ្ឋានកៅស៊ូ មិនបានបញ្ជាក់ពីទំហំទឹកប្រាក់ដែលទទួលបានពីការនាំចេញផលជ័រកៅស៊ូ នៅឆមាសទី១ ឆ្នាំ២០២៤នេះទេ។
បច្ចុប្បន្ន ជ័រកៅស៊ូ មានតម្លៃមធ្យមចន្លោះពី ២,៦០០រៀល ទៅ ៦,០០០រៀល ក្នុងមួយគីឡូក្រាម ដែលតម្លៃនេះខុសគ្នាពីតំបន់មួយ ទៅតំបន់មួយ។ ខេត្តដែលមានការដាំដុះដំណាំកៅស៊ូ មានខេត្តកំពង់ចាម ត្បូងឃ្មុំ កំពង់ចាម ក្រចេះ ស្ទឹងត្រែង រតនគិរី មណ្ឌលគិរី ព្រះវិហារ បាត់ដំបង ប៉ៃលិន ឧត្តរមានជ័យ និងកំពត។ នេះបើតាមទិន្នន័យ របស់ក្រសួងកសិកម្ម រុក្ខាប្រមាញ់ និងនេសាទ។
សូមជម្រាបថា នៅរយៈពេល៥ខែដំបូង កម្ពុជាបាននាំចេញផលកៅស៊ូ ចំនួន ១១០ ៧៧១តោន និងឈើកៅស៊ូចំនួន ៥ ៨៥៨ ម៉ែត្រគូប គិតជាទឹកប្រាក់ស្មើនឹងជាង ១៦៥.៥៤លានដុល្លារ។
គិតត្រឹមឆ្នាំ២០២២ កម្ពុជាមានផ្ទៃដីដាំដំណាំនៅទូទាំង ជាង ៧,២លានហិកតា ក្នុងនោះដំណាំកៅស៊ូមានជាង៦០ម៉ឺនហិកតា៕
© រក្សាសិទ្ធិដោយ thmeythmey.com
Tag:
