.png)
ស្តេចអង់គ្លេសបង្ហាញផែនការអាទិភាព“បម្រើរាស្ត្រ”របស់រដ្ឋាភិបាលថ្មី
- ថ្ងៃសុក្រ ទី១៩ ខែកក្កដា ឆ្នាំ២០២៤ ម៉ោង ៨:២៩ នាទី ព្រឹក
ស្តេចអង់គ្លេសបង្ហាញផែនការអាទិភាព“បម្រើរាស្ត្រ”របស់រដ្ឋាភិបាលថ្មី via REUTERS - Kirsty Wigglesworth
ដោយ៖អៀង សុខម៉ិញ(RFI ខេមរភាសា)
ព្រះមហាក្សត្រអង់គ្លេសឆាលទីបី (Charles III) បានថ្លែងសុន្ទរកថា នៅថ្ងៃពុធទី ១៧កក្កដា២០២៤ បង្ហាញកម្មវិធីនយោបាយរបស់រដ្ឋាភិបាលទើបជាប់ឆ្នោតថ្មី ដែលដឹកនាំដោយលោក គៀរ ស្តារមឺ ទៅកាន់សភា។ ប្រសូតចេញពីបក្សពលករ លោកនាយករដ្ឋមន្ត្រីអង់គ្លេសថ្មី បានសន្យាស្ថាបនាប្រទេសឡើងវិញ តាមរយៈផែនការអាទិភាព “បម្រើរាស្ត្រ”។ តើកម្មវិធីនយោបាយរដ្ឋាភិបាលបក្សពលករមានទម្រង់យ៉ាងណា?
យាងតាមរាជរថមកសភា ព្រះមហាក្សត្រអង់គ្លេសឆាលទីបី បានអានសុន្ទរកថាដែលតាក់តែងដោយរដ្ឋាភិបាល បញ្ជាក់អំពីអាទិភាពនៃនយោបាយដឹកនាំប្រទេសអាណត្តិថ្មី។ ក្រោយជោគជ័យយ៉ាងត្រចះត្រចង់នៅក្នុងសម័យបោះឆ្នោតសភាអង់គ្លេសថ្ងៃទី ៤កក្កដា គណបក្សពលករដឹកនាំដោយលោក គៀរ ស្តារមឺ បានឱកាសត្រលប់មកកាន់អំណាចវិញ បន្ទាប់ពីអាក់ខានអស់រយៈពេល១៤ឆ្នាំ ជាមួយនឹងកម្មវិធីនយោបាយ “បម្រើរាស្ត្រៗ។នាយករដ្ឋមន្ត្រីគៀរស្តារមឺ បានធានាអះអាងថា កម្មវិធីនយោបាយរបស់រដ្ឋាភិបាលផ្អែកទាំងស្រុងលើគោលការណ៍សន្តិសុខ សមធម៌ និងផ្តល់ឱកាសដល់ពលរដ្ឋគ្រប់រូបរដ្ឋាភិបាលឆ្វេងកណ្តាលនិយម ដែលធ្លាប់សន្យាពេលឃោសនាគិតគូរបញ្ហាថវិកាឱ្យបានហ្មត់ចត់ ផ្តល់អាទិភាពដល់គម្រោងច្បាប់ជាង៣៥ ផ្តោតជាពិសេសលើកំណើនសេដ្ឋកិច្ច បង្កើតទីផ្សារការងារ អន្តោប្រវេសន៍ ទំនាក់ទំនងជាមួយអឺរ៉ុប ព្រមទាំងការគិតសង់លំនៅឋានថ្មី និងហេដ្ឋារចនាសម្ព័ន្ធ មធ្យោបាយដឹកជញ្ជូនទៀត។
ដើម្បីប្រយុទ្ធប្រឆាំងនឹងអន្តោប្រវេសន៍ខុសច្បាប់ រដ្ឋាភិបាលអង់គ្លេសថ្មី នឹងបង្កើតកងកម្លាំងរក្សាសន្តិសុខថ្មីមានអំណាចប្រយុទ្ធប្រឆាំងនឹងភេរវកម្ម ដើម្បីពង្រឹងការទប់ស្កាត់សកម្មរបស់មេខ្យល់នាំមនុស្សឆ្លងដែន។ ប្រឈមនឹងកង្វះលំនៅឋាន រដ្ឋាភិបាលថ្មីនឹងអនុម័តច្បាប់ពន្លឿននិងសម្រួលគម្រោងសាងសង់អាគារស្នាក់នៅធំៗ។ រដ្ឋអង់គ្លេសនឹងវិលមកគ្រប់គ្រងបណ្តាញមធ្យោបាយដឹកជញ្ជូនផ្លូវដែកដែលធ្លាក់ក្នុងដៃក្រុមហ៊ុនឯកជនក្នុងទសវត្សរ៍ឆ្នាំ៩០ វិញបន្តិចម្តងៗ ដើម្បីអាចបញ្ចុះតម្លៃធ្វើដំណើរឱ្យបានសមរម្យសម្រាប់ពលរដ្ឋ។
រដ្ឋាភិបាលប្រសូតចេញពីបក្សពលករ រំពឹងពង្រឹងតួនាទីរបស់ភ្នាក់ងារទទួលបន្ទុកត្រួតពិនិត្យចំណាយសាធារណៈ ឱ្យកាន់តែឯករាជ្យ ឈានឆ្ពោះទៅរកស្ថិរភាពសេដ្ឋកិច្ច មិនសាបព្រោះភាពឆោរឡោដល់ទីផ្សារហិរញ្ញវត្ថុដូចសម័យអង់គ្លេសមាននាយករដ្ឋមន្ត្រីជាអ្នកអភិរក្សនិយម ក្នុងឆ្នាំ២០២២។ លើផ្នែកការទូតវិញ លោក គៀរ ស្តារមឺ មានជំហរចាប់ផ្តើមសាជាថ្មីក្នុងទំនាក់ទំនងអង់គ្លេសជាមួយសហភាពអឺរ៉ុប បន្ទាប់ពីបែកបាក់ដើរចេញពីសហភាពអឺរ៉ុបយ៉ាងចុកចាប់មក។ លោក ស្តារមឺ នឹងមានកិច្ចសន្ទនាស៊ីជម្រៅលើកដំបូងជាមួយប្រធានាធិបតីបារាំង នៅថ្ងៃព្រហស្បតិ៍ទី១៨កក្កដា ដើម្បីរកចំណុចផ្តើមថ្មីជាមួយបារាំង។
វិធានការជាអាទិភាពមួយទៀត គឺការធ្វើទំនើបកម្មរដ្ឋធម្មនុញ្ញ ដោយគ្រោងធ្វើកំណែទម្រង់សភាជាន់ខ្ពស់អង់គ្លេស។ រដ្ឋាភិបាលអង់គ្លេសថ្មី របស់លោក គៀរ ស្តារមឺ ប្រកាសនៅថ្ងៃពុធទី១៧កក្កដានេះ បិទបញ្ចប់តួនាទីសមាជិកសភាជាន់ខ្ពស់៩២រូប ក្នុងចំណោមសមាជិកសភាជាន់ខ្ពស់សរុប៨០០នាក់ ដែលភាគច្រើនបានទទួលការតែងតាំងអស់មួយជីវិត៕
© រក្សាសិទ្ធិដោយ thmeythmey.com
.gif)
