.jpg)
.jpg)
JICA ផ្ដល់ថវិកាជិត៦០លានដុល្លារ ដើម្បីសាងសង់កំណាត់ផ្លូវជាតិលេខ៥ និងអភិវឌ្ឍន៍ធនធានមនុស្សកម្ពុជា
- ថ្ងៃសុក្រ ទី១៩ ខែកក្កដា ឆ្នាំ២០២៤ ម៉ោង ៩:២៩ នាទី យប់
ពិធីចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការកម្ពុជា-ជប៉ុន។ រូបភាពពីក្រសួងសេដ្ឋកិច្ច និងហិរញ្ញវត្ថុ។
ភ្នំពេញ៖ JICA និងរដ្ឋាភិបាលកម្ពុជា បានចុះហត្ថលេខាលើកិច្ចព្រមព្រៀងហិរញ្ញប្បទាន សហប្រតិបត្តិការចំនួន ២ ដែលមានទឹកប្រាក់ចំនួន ៥៧,៥ លានដុល្លារអាម៉េរិក។ បើតាមសេចក្ដីជូនដំណឹងរបស់ក្រសួងសេដ្ឋកិច្ច កិច្ចព្រមព្រៀងហិរញ្ញប្បទាននេះ ផ្ដោតលើគម្រោងអាហារូបករណ៍អភិវឌ្ឍន៍ធនធានមនុស្ស និងគម្រោងធ្វើឱ្យប្រសើរឡើងកំណាត់ផ្លូវជាតិលេខ៥(ធ្លាម្អម-បាត់ដំបង និងសិរីសោភ័ណ-ប៉ោយប៉ែត)។
កិច្ចព្រមព្រៀងហិរញ្ញប្បទានឥតសំណង ចំនួន ១ និងកិច្ចព្រមព្រៀងឥណទានសម្បទាន ចំនួន ១ ត្រូវបានចុះហត្ថលេខារវាងភាគីកម្ពុជា ដែលមានលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងភាគីជប៉ុន លោក Sanui Kazumasa ប្រធានJICA ប្រចាំកម្ពុជា។
កិច្ចព្រមព្រៀងហិរញ្ញប្បទានសហប្រតិបត្តិការទាំង២នេះ មានទំហំទឹកប្រាក់ចំនួន ៥៧,៥ លានដុល្លារ សម្រាប់គម្រោងអាហារូបករណ៍អភិវឌ្ឍន៍ធនធានមនុស្ស មានទំហំទឹកប្រាក់២,៥លានដុល្លារ។ រីឯកិច្ចព្រមព្រៀងឥណទានសម្បទានសម្រាប់គម្រោងធ្វើឱ្យប្រសើរឡើងកំណាត់ផ្លូវជាតិលេខ៥(ធ្លាម្អម-បាត់ដំបង និងសិរីសោភ័ណ-ប៉ោយប៉ែត) ដែលជាឥណទានដំណាក់កាលទី៣ មានទំហំទឹកប្រាក់ ៥៥លានដុល្លារ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ រូបភាពពីក្រសួងសេដ្ឋកិច្ច និងហិរញ្ញវត្ថុ។
បើតាមសេចក្ដីជូនដំណឹងខាងលើ គម្រោងអាហារូបករណ៍អភិវឌ្ឍន៍ធនធានមនុស្ស (JDS) ផ្តល់ឱកាសដល់មន្ត្រីរាជការ ជាពិសេសដើម្បីពង្រឹងទំនាក់ទំនងទ្វេភាគី រវាងប្រទេសទាំងពីរ តាមរយៈការសកម្មភាពសិក្សា និងបទពិសោធនៅប្រទេសជប៉ុន។ ចាប់ពីឆ្នាំ ២០០០ មក មានមន្ត្រីរាជការ ៥៣០រូប បានទទួលអាហារូបករណ៍ថ្នាក់អនុបណ្ឌិត និងថ្នាក់បណ្ឌិតក្នុងក្របខណ្ឌកម្មវិធីJDS។
ដោយឡែក គម្រោងធ្វើឱ្យប្រសើរឡើងកំណាត់ផ្លូវជាតិលេខ៥(ធ្លាម្អម-បាត់ដំបង និងសិរីសោភ័ណ-ប៉ោយប៉ែត)ដែលជាឥណទានដំណាក់កាលទី៣ ផ្ដល់សម្រាប់បំពេញបន្ថែមឱ្យការងារសាងសង។ កំណាត់ផ្លូវនេះ មានប្រវែងសរុប ១៤៦,០៤ គ.ម ក្នុងនោះពីធ្លាម្អម ខេត្តពោធិ៍សាត់ ទៅក្រុងបាត់ដំបង មានប្រវែង ៩៩,២១ គ.ម ជាផ្លូវ ៤គន្លង។
គួរជម្រាបជូនថា ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) តែងតែផ្តល់នូវកិច្ចសហប្រតិបត្តិការ និងបានចូលរួមគាំទ្រដល់កិច្ចអភិវឌ្ឍន៍សង្គម-សេដ្ឋកិច្ចកម្ពុជា តាមរយៈការបន្តផ្តល់ហិរញ្ញប្បទាន សម្រាប់កិច្ចសហប្រតិបត្តិការអភិវឌ្ឍន៍ផ្លូវការ។ ជាមួយគ្នានេះ រដ្ឋាភិបាលជប៉ុនតាមរយៈ JICA បានប្តេជ្ញាចិត្តធ្វើការជាមួយរាជរដ្ឋាភិបាលកម្ពុជា ក្នុងភាពជាដៃគូយុទ្ធសាស្ត្ររយៈពេលវែង សម្រាប់គាំទ្របន្ថែមទៀត ដល់ការអភិវឌ្ឍសង្គម-សេដ្ឋកិច្ចកម្ពុជា៕
លោក Sanui Kazumasa ប្រធានJICA ប្រចាំកម្ពុជា។ រូបភាពពីក្រសួងសេដ្ឋកិច្ច និងហិរញ្ញវត្ថុ។
© រក្សាសិទ្ធិដោយ thmeythmey.com
Tag:
