.png)
.png)
.jpg)
.jpg)
លោក សុខ ចិន្តាសោភា នឹងចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៧ នៅឡាវ
- ថ្ងៃចន្ទ ទី២២ ខែកក្កដា ឆ្នាំ២០២៤ ម៉ោង ៦:៥៩ នាទី ល្ងាច
លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិ។
ប្រទេសឡាវ នឹងធ្វើជាម្ចាស់ផ្ទះកិច្ចប្រជុំរដ្ឋមន្ត្រីការបរទេសអាស៊ានលើកទី៥៧ និងកិច្ចប្រជុំពាក់ព័ន្ធ ក្រោមមូលបទ«អាស៊ាន៖ ការពង្រឹងការតភ្ជាប់ និងភាពធន់»។ កិច្ចប្រជុំ នឹងប្រព្រឹត្តទៅពីថ្ងៃទី២៤-២៧ ខែ កក្កដា នៅទីក្រុងវៀងចន្ទន៍។
លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការ អន្តរជាតិ នឹងដឹកនាំគណៈប្រតិភូទៅចូលរួមកិច្ចប្រជុំនេះ តបតាមការអញ្ជើញរបស់សមភាគី លោក សាលើមសៃ គុំម៉ាស៊ីដ ឧបនាយករដ្ឋមន្ត្រី និងជារដ្ឋមន្ត្រីការបរទេសឡាវ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី២២ ខែកក្កដា។
ក្រសួងការបរទេសកម្ពុជា បញ្ជាក់ថា៖ «កិច្ចប្រជុំរដ្ឋមន្ត្រីការបរទេសអាស៊ានលើកទី៥៧ និងកិច្ចប្រជុំពាក់ព័ន្ធ គឺជាឱកាសនៃការពិភាក្សាការងារ កសាងសហគមន៍អាស៊ាន រួមទាំងវិធីសាស្ត្រប្រកបដោយនវានុវត្តន៍ ក្នុងការលើកកម្ពស់កិច្ចសហប្រតិបត្តិការអាស៊ានបន្ថែមទៀត ដើម្បីសម្រេចបាននូវតំបន់មួយដែលកាន់តែមានភាពតភ្ជាប់ និងភាពធន់ជាងមុន សម្រាប់វិបុលភាពរួម។»។
លោក សុខ ចិន្តាសោភា ឧបនាយករដ្ឋមន្ត្រី ក៏នឹងអញ្ជើញចូលរួមកិច្ចប្រជុំដាច់ដោយឡែក ក្របខណ្ឌ នៃកិច្ចសហប្រតិបត្តិការមេគង្គ ជាមួយរដ្ឋមន្ត្រីការបរទេសជប៉ុន កូរ៉េខាងត្បូង និងសហរដ្ឋអាម៉េរិក។ នេះបើតាមសេចក្តីប្រកាសព័ត៌មានដដែល។
ក្នុងពេលស្នាក់នៅទីក្រុងវៀងចន្ទន៍ ឧបនាយករដ្ឋមន្ត្រី សុខ ចិន្តាសោភា និងរដ្ឋមន្ត្រីការបរទេសអាស៊ាន និងអគ្គលេខាធិការអាស៊ាន ក៏នឹងចូលជួបសម្តែងការគួរសម ជាមួយ លោក សនសៃ ស៊ីផាន់ដន នាយករដ្ឋមន្ត្រីឡាវផងដែរ។
រដ្ឋមន្ត្រីការបរទេសកម្ពុជា ក៏រំពឹងថា នឹងមានជំនួបទ្វេភាគី ជាមួយសមភាគីបរទេសមួយចំនួន ដើម្បីពិភាក្សាពីកិច្ចសហប្រតិបត្តិការដែលមានផលប្រយោជន៍ទៅវិញទៅមក ទាំងក្នុងក្របខណ្ឌទ្វេភាគី និងពហុភាគី។ ក្រសួងការបរទេសកម្ពុជា បន្ថែមដូច្នេះនៅក្នុងសេចក្តីប្រកាសព័ត៌មាន៕
© រក្សាសិទ្ធិដោយ thmeythmey.com
Tag:
