.png)
ប្រឈមនឹងការគំរាមកំហែងចិន តៃវ៉ាន់ប្តូរវិធីសាស្ត្រធ្វើសមយុទ្ធប្រចាំឆ្នាំ
- ថ្ងៃពុធ ទី២៤ ខែកក្កដា ឆ្នាំ២០២៤ ម៉ោង ១១:២៩ នាទី ព្រឹក
ប្រឈមនឹងការគំរាមកំហែងចិន តៃវ៉ាន់ប្តូរវិធីសាស្ត្រធ្វើសមយុទ្ធប្រចាំឆ្នាំ AP
ដោយ៖អៀង សុខម៉ិញ (RFI ខេមរភាស)
តៃវ៉ាន់កំពុងធ្វើសមយុទ្ធប្រចាំឆ្នាំ ក្នុងទម្រង់ជាការការពារខ្លួនពីការវាយប្រហារចូលឈ្លានពានជាយថាហេតុរបស់ចិន។ សមយុទ្ធ បានចាប់ផ្តើមពីថ្ងៃចន្ទទី២២ ខែកក្កដា មានរយៈពេល៥ថ្ងៃ។ ប៉ុន្តែឆ្នាំនេះ តៃវ៉ាន់បានប្តូរផ្លាស់វិធីសាស្ត្រធ្វើលំហាត់សឹក ដើម្បីសម្របទៅនឹងស្ថានភាពគំរាមកំហែងមកពីខាងចិន និងបានលុបចោលកម្មវិធីខ្លះ ដោយហេតុតែមានព្យុះកំណាច។
តៃវ៉ាន់ តែងបើកធ្វើសមយុទ្ធដោយបាញ់គ្រាប់ពិត Han Kuang ត្រៀមប្រឈមនឹងការឈ្លានពានជាយថាហេតុមកពីខាងចិន ជារៀងរាល់ឆ្នាំ។ ប៉ុន្តែនៅឆ្នាំនេះ សមយុទ្ធមានលក្ខណៈខុសពីឆ្នាំមុនៗ។ យោធាតៃវ៉ាន់ មិនធ្វើលំហាត់ប្រយុទ្ធ ជារបៀបបង្ហាញសកម្មភាពឱ្យអ្នកកាសែតថតទេ និងក៏គ្មានដែរ លំហាត់ទាហានដើរតាមចង្វាក់ និងកាន់កាំភ្លើងភ្ជង់សត្រូវ ជាជួរៗ ព្រោះវាមិនស៊ីនឹងស្ថានភាពទំនើបបច្ចុប្បន្នទេ។ រដ្ឋមន្ត្រីក្រសួងការពារជាតិតៃវ៉ាន់ថ្មី ចង់ឃើញទាហានអនុវត្តកាយវិការ ដែលនឹងអាចកើតឡើងពិត ហើយត្រូវនឹងសង្គ្រាមជាក់ស្តែង។
ការប្តូរផ្លាស់ចម្បងមួយទៀត គឺការដកពិសោធន៍ធ្វើលំហាត់សឹកក្រោមរចនាសម្ព័ន្ធថ្មីដែលទីបញ្ជាការដ្ឋានមិនស្ថិតក្រោមអំណាចកណ្តាលតែមួយ។ ពោលគឺការហាត់ហ្វឹកហ្វឺនឱ្យទាហានតៃវ៉ាន់មានភាពវៀងវៃចេះជំនះភាពស្មុគស្មាញ និងសម្រេចទៅតាមស្ថានការណ៍ជាក់ស្តែងនៅលើសមរភូមិ ដែលមានលក្ខណៈកាន់តែមិនច្បាស់លាស់ឡើង បើយោលទៅលើសមត្ថភាពរបស់សត្រូវ។ នៅក្នុងសមយុទ្ធមុនៗ កងទ័ពតៃវ៉ាន់បានទទួលបញ្ជាជាមុន ប្រាប់នូវរាល់ឆាកឈុតដែលត្រូវធ្វើ តែពេលនេះយោធាត្រូវបញ្ចេញសកម្មភាពតបនឹងព្រឹត្តការណ៍ដោយភ្លាមៗ ប្រកបដោយទំនុកចិត្ត និងភាពក្លាហាន។
សមយុទ្ធប្រចាំឆ្នាំជាការប្រមូលផ្តុំកងទ័ពជើងគោក ជើងទឹកនិងជើងអាកាស។ កងម៉ារីន បានចេញធ្វើប្រតិបត្តិការបន្ទាន់ តាំងពីព្រលឹមថ្ងៃចន្ទ នៅឆ្នេរខាងជើង។ លំហាត់មានបាញ់គ្រាប់ពិត ធ្វើឡើងតែនៅជុំវិញកោះតូចៗនៅព័ទ្ធជុំវិញតៃវ៉ាន់ ដែលនាវានិងយន្តហោះចម្បាំងចិនឧស្សាហ៍ចូលមកដល់ នាប៉ុន្មានខែចុងក្រោយនេះ។ ប៉ុន្តែទំហំនៃសមយុទ្ធត្រូវបានបង្រួមតូចជាងរាល់ឆ្នាំ ដើម្បីសម្របទៅនឹងអាកាសធាតុមិនអំណោចផល។ នៅថ្ងៃអង្គារនេះ យោធាតៃវ៉ាន់បានសម្រេចលុបចោលលំហាត់សឹកមួយចំនួន របស់កងម៉ារីន និងកងទ័ពអាកាស។ ព្យុះទីហ្វុង កែមី នឹងមកដល់ដែនដីតៃវ៉ាន់នៅពុធស្អែក ជាមួយទឹកភ្លៀងនិងខ្យល់ដ៏កំណាច បោកបក់ក្នុងល្បឿន១៤៤គីឡូម៉ែត្រក្នុងម៉ោងជាមធ្យម។
ពីមូលដ្ឋានទ័ពអាកាសHualien ប្រធានាធិបតីតៃវ៉ាន់ លោក ឡៃឈីងទឿ ដែលចូលរួមធ្វើលំហាត់សមចូលសង្គ្រោះជនរងគ្រោះនិងបានប្រកាសថា តៃវ៉ាន់បន្តបង្កើនសមត្ថភាពប្រយុទ្ធឱ្យបានប្រសើរឡើង ដើម្បីការពារប្រជាជនតៃវ៉ាន់ផងនិងបង្ហាញពិភពលោកអំពីឆន្ទៈដាច់ខាតក្នុងការពារដែនដីតៃវ៉ាន់។ ប៉ុន្មានឆ្នាំចុងក្រោយមកនេះ ចិនបានបន្ថែមសម្ពាធយោធានិងនយោបាយលើតៃវ៉ាន់ ដោយថែមទាំងសំឡុតប្រើកម្លាំងបាយដើម្បីបង្រួបបង្រួមតៃវ៉ាន់ជាចិនតែមួយ។ ការបង្រួបបង្រួមដែលមិនអាចបញ្ចៀសបានឡើយសម្រាប់ប៉េកាំង៕
© រក្សាសិទ្ធិដោយ thmeythmey.com
.gif)
