.jpg)
.jpg)
មនុស្ស៣នាក់ស្លាប់ ដោយសារពុលស្រា នៅខេត្តតាកែវ
- ថ្ងៃព្រហស្បតិ៍ ទី២២ ខែសីហា ឆ្នាំ២០២៤ ម៉ោង ១:៤១ នាទី រសៀល
មនុស្ស៣នាក់ បានស្លាប់ដោយសារ ពុលស្រា ខណៈ៣នាក់ទៀតកំពុងទទួលការព្យាបាលនៅមន្ទីរពេទ្យ។ ជនរងគ្រោះ សុទ្ធតែជាអ្នករស់នៅភូមិត្នោត ឃុំស្រង៉ែ ស្រុកទ្រាំង ខេត្តតាកែវ។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី២២ ខែសីហា។
បើតាមក្រសួងសុខាភិបាល និងអ្នកជំនាញពាក់ព័ន្ធ ដែលបានចុះទៅពិនិត្យ និងស្រាវជ្រាវផ្ទាល់ដល់ទីកន្លែងកើតហេតុ នៅ ជនរងគ្រោះទាំង៦នាក់ បានពិសាស្រាថ្នាំ ថ្ងៃទី១៦ ខែសីហា លុះស្អែកឡើង គឺថ្ងៃទី១៧ ខែសីហា មនុស្ស៣នាក់បានស្លាប់ និង៣នាក់ទៀត ត្រូវបានជួយសង្គ្រោះទាន់ពេលវេលា។ បើតាមលទ្ធផលតេស្ត និងវិភាគសំណាកស្រាថ្នាំ ស្រាថ្នាំដែលជនរងគ្រោះបានផឹកនោះមាន ផ្ទុកសារធាតុមេតាណុល កម្រិត១៥% ដែលធ្វើឱ្យពុលស្លាប់។
ក្រសួងសុខាភិបាល បញ្ជាក់ដូច្នេះ៖ «លទ្ធផល តេស្តនិងវិភាគសំណាកស្រាថ្នាំ ដោយអគ្គនាយកដ្ឋាន ក.ប.ប.» ឃើញថាមានផ្ទុកសារធាតុមេតាណុល កម្រិត១៥% ដែលធ្វើឱ្យពុលស្លាប់ ដែលកម្រិតមិនពុលនោះមិនត្រូវលើសពី ០.១% ។»។
ក្រុមឆ្លើយតបបន្ទាន់ និងអាជ្ញាធរពាក់ព័ន្ធ បានណែនាំពលរដ្ឋនៅភូមិ-ឃុំកើតហេតុ ឲ្យប្រុងប្រយ័ត្នខ្ពស់ និងឈប់ពិសាស្រាដែលផលិតឬបិតស្រាមិនបានត្រឹមត្រូវ និងបញ្ឈប់ការ លក់ស្រា និងទីតាំងផលិតចែកចាយស្រា។
ដើម្បីការពារការពុលស្រាដែលបិតមិនត្រឹមត្រូវតាមបច្ចេកទេសនិងរក្សាជីវិតរបស់ខ្លួន ក្រសួងបន្តក្រើនរំលឹក និងទទូចឱ្យប្រជាពលរដ្ឋ និងអ្នកពាក់ព័ន្ធទាំងអស់ នៅទូទាំងប្រទេស បញ្ឈប់ការប្រើប្រាស់មេតាណុលផលិតស្រា ស និងស្រាថ្នាំ ដែលនាំឱ្យបំផ្លាញសុខភាព និងជីវិតមនុស្ស និងឈប់លក់ដូរស្រា ស ឬស្រាថ្នាំ ដែលផលិត ឬបិត ឬលាយផ្សំ មិនត្រឹមត្រូវតាមបច្ចេកទេស។
ក្រសួងសុខាភិបាល ក៏ស្នើឱ្យអាជ្ញាធរ និងកងកម្លាំងគ្រប់លំដាប់ថ្នាក់ ឃ្លាំមើល និងទប់ស្កាត់ការលក់ស្រាបិត ឬលាយគ្មានបច្ចេកទេសត្រឹមត្រូវ និងណែនាំប្រជាពលរដ្ឋ ជៀសវាង យកសារធាតុមេតាណុលលាយធ្វើស្រា ស ឬស្រាថ្នាំ ដែលបង្កឱ្យពុលនិងស្លាប់បាត់បង់ជីវិត។
ករណីមានរោគសញ្ញានៃការពុលស្រារួមមាន ឈឺក្បាល ក្អួត ឈឺពោះ វិលមុខ ស្រវាំងភ្នែក សន្លប់ ប្រកាច់ ពិបាកដកដង្ហើម សូមប្រញាប់ទៅស្វែងរកការពិនិត្យ និងពិគ្រោះនៅមណ្ឌលសុខភាព ឬទៅមន្ទីរពេទ្យដែលនៅជិតផ្ទះជាបន្ទាន់។
បើតាមក្រសួងសុខាភិបាល ពីឆ្នាំ២០២០ ដល់ឆ្នាំ២០២៤ មានការពុលស្រា ស ឬស្រាថ្នាំ ចំនួន៥១៧នាក់ ក្នុងនោះ ៨៩នាក់បានស្លាប់៕
© រក្សាសិទ្ធិដោយ thmeythmey.com
