.jpg)
.jpg)
លោក យ៉ង សាំងកុមារ ជំរុញកសិករដាំពូជស្រូវផ្ការំដួល និងសែនក្រអូប ដែលមានតម្លៃទីផ្សារខ្ពស់
- ថ្ងៃអាទិត្យ ទី១ ខែកញ្ញា ឆ្នាំ២០២៤ ម៉ោង ៦:០៩ នាទី ល្ងាច
ភ្នំពេញ៖ លោក យ៉ង សាំងកុមារ រដ្ឋលេខាធិការក្រសួងកសិកម្ម បានជំរុញឱ្យកសិករជ្រើសរើសពូជស្រូវផ្ការំដួល និងសែនក្រអូប ដើម្បីបានទិន្នផលខ្ពស់តាមតម្រូវការទីផ្សារទាំងក្នុងស្រុក និងក្រៅប្រទេស។ ការប្រើប្រាស់គ្រាប់ពូជស្រូវ មានប្រភពច្បាស់លាស់អាចជួយដល់ផលិតកម្មឱ្យមានភាពល្អប្រសើរ។
បើតាម លោក យ៉ង សាំងកុមារ ក្រសួងកសិកម្ម រុក្ខាប្រមាញ់ និងនេសាទ នឹងជួយជំរុញឱ្យមានការសហការ សម្របសម្រួលជាមួយរោងម៉ាស៊ីនក្នុងស្រុក ដើម្បីប្រមូលទិញស្រូវទាន់ពេលតាមតម្រូវការទីផ្សារ និងតម្លៃសមរម្យ។ លោក យ៉ង សាំងកុមារ បានលើកឡើងដូច្នេះ៖ «ការប្រើប្រាស់គ្រាប់ពូជស្រូវ មានប្រភពច្បាស់លាស់អាចជួយដល់ផលិតកម្មឱ្យមានភាពល្អប្រសើរ»។
សូមជម្រាបថា ពូជស្រូវផ្ការំដួល ជាស្រូវធន់នឹងទឹកជំនន់ និងដីប្រៃ។ ស្រូវប្រភេទនេះ មានកម្ពស់ ១១០-១៧០សង់ទីម៉ែត្រ អង្ករមានពណ៌សថ្លា និងបាយមានរសជាតិឆ្ងាញ់ និងក្លិនក្រអូបខ្លាំង។ ស្រូវសែនក្រអូប ជាពូជស្រូវមិនប្រកាន់រដូវ ហើយត្រូវបានដាំដុះដោយប្រជាកសិករខ្មែរ តាំងពីពាក់កណ្ដាលទស្សវត្ស៩០។ អង្ករប្រភេទនេះ ពេញនិយមខ្លាំងនៅលើឆោកអន្តរជាតិផងដែរ៕
© រក្សាសិទ្ធិដោយ thmeythmey.com
Tag:
.gif)