.jpg)
.jpg)
មូលនិធិកសាងផ្លូវតាមព្រំដែន ប្រមូលថវិកាបាន១៩លានដុល្លារ
- ថ្ងៃព្រហស្បតិ៍ ទី៥ ខែកញ្ញា ឆ្នាំ២០២៤ ម៉ោង ១០:៥៩ នាទី ព្រឹក
រាជរដ្ឋាភិបាល ប្រមូលថវិកាបានចំនួន១៩លានដុល្លារហើយ ពីពលរដ្ឋប្រមាណ ៤០ម៉ឺននាក់ ដែលចូលរួមបរិច្ចាគក្នុងមូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែន។ នេះបើតាម សម្តេចនាយករដ្ឋមន្ត្រី ហ៊ុន ម៉ាណែត។
ពីពិធីប្រគល់វិញ្ញាបនបត្រសិស្ស និងសិក្ខាកាមមេធាវីនៃគណៈមេធាវីកម្ពុជា នៅថ្ងៃទី៥ ខែកញ្ញា សម្តេច ហ៊ុន ម៉ាណែត បញ្ជាក់ថា នឹងបង្កើតគណៈកម្មការគ្រប់គ្រង និងផ្សព្វផ្សាយពីផែនការប្រើប្រាស់ថវិកាមូលនិធិនេះ ដើម្បីធានាតម្លាភាពនៃការប្រើប្រាស់ថវិកា។ ទន្ទឹមនឹងនេះប្រមុខរាជរដ្ឋាភិបាល ក៏លើកទឹកចិត្តឱ្យប្រជាពលរដ្ឋទៅមើលផ្ទាល់សកម្មភាព សាងសង់ផ្លូវនៅតាមបណ្តោយព្រំដែននេះផងដែរ។
សម្តេច ហ៊ុន ម៉ាណែត បន្ថែម៖ «ប្រជាពលរដ្ឋអាចទៅមើលផ្ទាល់តែម្តង ថាធ្វើអត់? បានប៉ុន្មាន? យើងដាក់ឱ្យច្បាស់ អត់មានឱ្យស្រពេចស្រពិល ថាធ្វើផ្លូវព្រំដែន អត់ទេ!។ យើងនឹងកំណត់ឱ្យច្បាស់ ពីកន្លែងណា ដល់កន្លែងណា? បង្គោលណា ដល់បង្គោលណា? ចម្ងាយប៉ុន្មាន ត្រូវប្រើប្រាស់ថវិកានេះ។»។
រដ្ឋាភិបាលកម្ពុជា ចាប់ផ្ដើមទទួលថវិកាចូលរួមបរិច្ចាគក្នុងមូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែន ពីប្រជាពលរដ្ឋ នៅថ្ងៃទី២៦ ខែសីហា។ គិតមកទល់ពេលនេះ មានពលរដ្ឋជិត៤០ម៉ឺននាក់ហើយ បានចូលរួមក្នុងមូលនិធិនេះ ខណៈដែលតួលេខពលរដ្ឋចូលរួមប្រចាំថ្ងៃ មានចន្លោះពី១,៣ម៉ឺននាក់ ទៅ១,៧ម៉ឺននាក់។ នេះបើតាមសម្តេច ហ៊ុន ម៉ាណែត។
អត្ថបទទាក់ទង
នៅក្នុងពិធីដដែលនេះ សម្តេចនាយករដ្ឋមន្ត្រី ចាត់ទុកថាសកម្មភាពចូលរួមនេះ បង្ហាញទឹកចិត្តស្រលាញ់ និងស្មារតីរួបរួមគ្នារបស់ប្រជាពលរដ្ឋកម្ពុជា ក្នុងការការពារបូរណភាពទឹកដី។ «រឿងទឹកចិត្តធំណាស់ ហើយរឿងនៃការភ្ជាប់សមានចិត្តជាមួយនឹងការការពារទឹកដី តាមរយៈមិនត្រឹមតែបញ្ចេញកង្វល់ ប៉ុន្តែធ្វើសកម្មភាពជាក់ស្តែង ដើម្បីចូលរួមកសាង គឺជាស្មារតី ដែលយើងចូលរួមគ្នា។ មិនមែនចូលរួមគ្នាស្រលាញ់ជាតិដើម្បីធ្វើម៉េចឱ្យសេដ្ឋកិច្ចខ្មែរដាំក្បាលចុះ យកឈ្នះ ឱ្យរដ្ឋាភិបាលរលំទេ។ ប៉ុន្តែរួមគ្នាដើម្បីការកសាង ការពារប្រទេសជាតិយើង។»។ ប្រមុខរាជរដ្ឋាភិបាល បញ្ជាក់ដូច្នេះ មុននឹងបន្តថា រដ្ឋាភិបាល បាន និងកំពុងកសាងហេដ្ឋារចនាសម្ព័ន្ធផ្លូវក្រវាត់ព្រំដែន ប្រវែងជាង២ ២៦០គីឡូម៉ែត្រ ដោយបច្ចុប្បន្នមានផ្លូវប្រវែងជា១ ៣០០ គីឡូម៉ែត្រហើយ ត្រូវបានកសាងរួច។ រដ្ឋ គ្រោងចាយពេល១០ឆ្នាំក្នុងការកសាងផ្លូវក្រវាត់ព្រំដែន ជាង ១ ៣០០គីឡូម៉ែត្រដែលនៅសេសសល់ ដោយគ្រោងចំណាយថវិកាប្រមាណ ២០០លានដុល្លារ។
សូមរំឭកថា សម្ដេចនាយករដ្ឋមន្ត្រី បានប្រកាសពីការបង្កើតមូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែននេះ កាលពីថ្ងៃទី២២ ខែសីហា នាពេលថ្លែងការណ៍ស្ដីពី «សមិទ្ធផលរយៈពេល១ឆ្នាំ របស់រដ្ឋាភិបាល នីតិកាលទី៧»។ មូលនិធិនេះ មានគោលដៅកៀរគរថវិកា និងផ្ដល់ឱកាសឱ្យប្រជាពលរដ្ឋនៅទូទាំងប្រទេស បានចូលរួមជាមួយរដ្ឋាភិបាល ក្នុងការកសាងហេដ្ឋារចនាសម្ព័ន្ធតាមបណ្ដោយព្រំដែន និងជាការបង្ហាញការយកចិត្តទុកដាក់ លើការកសាងផ្លូវនៅតាមព្រំដែនរបស់ពលរដ្ឋ និងរាជរដ្ឋាភិបាល៕
© រក្សាសិទ្ធិដោយ thmeythmey.com
