.jpg)
.jpg)
លោក ហ៊ុន ម៉ានី ចាត់ទុកកិច្ចសហប្រតិបត្តិការកម្ពុជា-ចិន ជាគំរូនៃទំនាក់ទំនងអន្តរជាតិ
- ថ្ងៃអង្គារ ទី២៤ ខែកញ្ញា ឆ្នាំ២០២៤ ម៉ោង ៥:២៩ នាទី ល្ងាច
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានចាត់ទុកថាកិច្ចសហប្រតិបត្តិការរវាងប្រទេសកម្ពុជា និងចិន គឺជាគំរូនៃទំនាក់ទំនងអន្តរជាតិ ដែលបាន និងបន្តនាំមកនូវឧត្តមប្រយោជន៍ជាច្រើនសម្រាប់ប្រជាជននៃប្រទេសទាំង២។ លោក ហ៊ុន ម៉ានី ថ្លែងដូច្នេះ នៅក្នុងកិច្ចសន្ទនាយុវជន នៃឆ្នាំផ្លាស់ប្ដូររវាងប្រជាជនកម្ពុជា-ចិន ដែលធ្វើឡើងនៅថ្ងៃទី២៣ ខែកញ្ញា នៅរាជ្យបណ្ឌិតសភាកម្ពុជា។
នៅក្នុងវេទិកានេះ ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ បន្តថា៖« លោក ហ៊ុន ម៉ានី លើកឡើងថា៖ «យើងអាចនិយាយបានថា ទំនាក់ទំនងរវាងប្រជាជននិងប្រជាជនកម្ពុជាចិន គឺជាគំរូនៃទំនាក់ទំនង ដែលបានជំរុញទាំងសេដ្ឋកិច្ច ទេសចរណ៍ និងវិស័យជាច្រើនទៀត ដែលធ្វើឱ្យប្រទេសទាំង២ រីកចម្រើនប្រកបដោយសុខសន្តិភាព។»។
ឆ្នាំ២០២៤ ជា«ឆ្នាំនៃការផ្លាស់ប្ដូរប្រជាជននិងប្រជាជន» រវាងកម្ពុជា និងចិន ហើយក៏ជាខួបលើកទី៦៦ នៃទំនាក់ទំនងការទូត រវាងប្រទេសទាំង២។ ទន្ទឹមនឹងការប្រារព្ធឆ្នាំផ្លាស់ប្តូរ ប្រជាជន ប្រទេសទាំង២ ក៏បានរៀបចំកម្មវិធី ព្រឹត្តិការណ៍ ដំណើរទស្សនកិច្ច រួមទាំងវេទិកាយុវជននានា ដើម្បីផ្សាភ្ជាប់ទំនាក់ទំនង និងផ្ដល់ផលប្រយោជន៍ផងដែរ។
សម្រាប់ប្រធានសហភាពសហព័ន្ធយុវជនកម្ពុជា ឆ្នាំនៃការផ្លាស់ប្ដូរ ប្រជាជននិងប្រជាជនកម្ពុជា-ចិន មិនត្រឹមតែជាព្រឹត្តិការណ៍មួយប៉ុណ្ណោះទេ ប៉ុន្តែសកម្មភាពផ្សារភ្ជាប់ទំនាក់ទំនងដ៏ល្អ ការរៀនសូត្រពីគ្នាទៅវិញទៅមក គំនិតច្នៃប្រឌិត និងនិរន្តរភាពទំនាក់ទំនងរវាងប្រជាជននិងប្រជាជនដ៏មានប្រសិទ្ធភាព។ ចំពោះវេទិកាកិច្ចសន្ទនាយុវជន និងព្រឹត្តិការណ៍ នានាដែលបានធ្វើឡើងក្នុងឆ្នាំផ្លាស់ប្តូរនេះ ជាផ្នែកដ៏សំខាន់ក្នុងការជំរុញកិច្ចសហប្រតិបត្តិការរវាងកម្ពុជា និងចិន ឱ្យកាន់តែជិតស្និទ្ធ។ លោក ហ៊ុន ម៉ានី លើកឡើងដូច្នេះ មុននឹងបន្តទៀតថា សហភាពសហព័ន្ធយុវជនកម្ពុជា និងសហព័ន្ធយុវជនចិន គ្រោងចុះអនុស្សារណៈយោគយល់គ្នាជាថ្មី ដើម្បីបន្តសកម្មភាពផ្លាស់ប្តូរចំណេះដឹង បទពិសោធន៍ផ្ដល់ ជាផលប្រយោជន៍សម្រាប់យុវជនក្នុងការអភិវឌ្ឍសមត្ថភាព និងជាកាតាលីករជំរុញការអភិវឌ្ឍរវាងប្រទេសទាំង២ដែរ៕
© រក្សាសិទ្ធិដោយ thmeythmey.com
