.jpg)
.jpg)
ព្រះមហាក្សត្រ នឹងយាងចូលរួមកិច្ចប្រជុំកំពូលហ្រ្វង់កូហ្វូនី នៅបារាំង
- ថ្ងៃចន្ទ ទី៣០ ខែកញ្ញា ឆ្នាំ២០២៤ ម៉ោង ៥:៣៩ នាទី ល្ងាច
ភ្នំពេញ៖ ព្រះករុណា ព្រះបាទ សម្ដេចព្រះនរោត្តម សីហមុនី ព្រះមហាក្សត្រនៃព្រះរាជណាចក្រកម្ពុជា នឹងយាងចូលរួមក្នុងកិច្ចប្រជុំកំពូលហ្រ្វង់កូហ្វូនី ដែលធ្វើឡើងនៅ Villers-Cotterets និងនៅទីក្រុងបារីស តាមការអញ្ជើញរបស់លោក Emmanuel Macron ប្រធានាធិបតីនៃសាធារណរដ្ឋបារាំង នៅថ្ងៃទី៤-៥ ខែតុលា។ នេះបើតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។
កិច្ចប្រជុំកំពូលហ្រ្វង់កូហ្វូនី លើកទី១៩ រៀបចំឡើងក្រោមមូលបទ «ការបង្កើតថ្មី នវានុវត្តន៍ និងសហគ្រិនភាពជាភាសាបារាំង» ដើម្បីពិភាក្សាពីដំណោះស្រាយនៃបញ្ហាប្រឈមទាក់ទងនឹងការបង្កើតការងារសម្រាប់យុវជន ក្នុងតំបន់ប្រើប្រាស់ភាសាបារាំង។ ម្យ៉ាងទៀត គឺដើម្បីបង្កើតបរិយាកាស ដែលអំណោយផលសម្រាប់ការអភិវឌ្ឍសេដ្ឋកិច្ច សេរីភាពនៃការបង្កើតថ្មី និងសហគ្រិនភាព និងធ្វើឱ្យពហុភាគីនិយមរស់រវើកឡើងវិញនិងការរួមចំណែកពីស្ថាប័នហ្រ្វង់កូហ្វូនី។
តាមសេចក្ដីប្រកាសព័ត៌មានដដែល ព្រះមហាក្សត្រនឹងយាងថ្លែងសន្ទរកថាបិទកិច្ចប្រជុំ ហើយព្រះអង្គនឹងព្រះរាជទានព្រះរាជសវនាការទ្វេភាគីជាមួយលោកប្រធានាធិបតីបារាំង ដើម្បីពិភាក្សាអំពីទំនាក់ទំនងមិត្តភាពជាប្រពៃណីរវាងកម្ពុជា និងបារាំងផងដែរ។
សម្ដេចមហាមន្រ្តី គុយ សុផល រដ្ឋមន្រ្តីក្រសួងព្រះបរមរាជវាំង និងលោក ស្រី ណូរី សមាជិកក្រុមប្រឹក្សាធម្មនុញ្ញ ដែលជាឧត្តមក្រុមប្រឹក្សាផ្ទាល់របស់ព្រះមហាក្សត្រ និងលោក សុខ ចិន្ដាសោភា ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ នឹងអមព្រះរាជដំណើររបស់ព្រះមហាក្សត្រ ចូលរួមក្នុងកិច្ចប្រជុំកំពូលហ្រ្វង់កូហ្វូនី៕
© រក្សាសិទ្ធិដោយ thmeythmey.com
Tag:
