.png)
.png)
.jpg)
.jpg)
បវរកញ្ញាចក្រវាល! ប្រាសាទ ដាវីន ជាប់ Top 30 និងបានពានមាស Voice for Change
- ថ្ងៃចន្ទ ទី១៨ ខែវិច្ឆិកា ឆ្នាំ២០២៤ ម៉ោង ២:២១ នាទី រសៀល
ប្រាសាទ ដាវីន បវរកញ្ញាដំបូងរបស់កម្ពុជាដែលចូល TOP 30 ក្នុង Miss Universe។ រូបថត AFP
ព្រឹត្តិការណ៍ប្រកួតបវរកញ្ញាចក្រវាល (Miss Universe) ឆ្នាំ២០២៤ នៅក្រុងម៉ិចស៊ីកូ ប្រទេសម៉ិកស៊ិក កាលពីថ្ងៃទី១៦ ខែវិច្ឆិកា ជាប្រវត្តិសាស្ត្រដ៏ចងចាំមួយសម្រាប់កម្ពុជា ដោយបេក្ខនារីតំណាងជាតិ ប្រាសាទ ដាវីន បានជាប់ក្នុងចំណោម៣០នាក់កំពូល ហើយថែមទាំងឈ្នះពាន Gold Winner ចំពោះការចូលរួមការងារសង្គម Voice for Change ផងដែរ។
ប្រាសាទ ដាវីន វ័យ៣៣ឆ្នាំ ជារាជិនីសម្រស់ដំបូងបំផុតរបស់កម្ពុជាដែលមានស្វាមី និងជាម្តាយមួយរូប ហើយបានគ្រងមកុដបវរកញ្ញាចក្រវាលកម្ពុជា ឆ្នាំ២០២៤ ហើយជាបេក្ខនារីទី៨ ដែលតំណាងជាតិក្នុងព្រឹត្តិការណ៍ Miss Universe បើគិតចាប់តាំងពីឆ្នាំ២០១៧ ពោលគឺបន្ទាប់ពី ប៊ី សុធារី, រឿន ណាត, សំណាង អេលីណា, រ៉េត សារីតា, ងិន ម៉ារ៉ាឌី, ហង្ស ម៉ានីតា និង ចន សុទីម៉ា។
«សូមអរគុណ ចំពោះក្រុមអ្នកគាំទ្រដ៏អស្ចារ្យ!»។ បវរកញ្ញា ប្រាសាទ ដាវីន បានសរសេរបែបនេះនៅលើទំព័រហ្វេសប៊ុករបស់ខ្លួន ក្រោយបង្កើតប្រវត្តិសាស្ត្រថ្មី ក្នុងនាមជារាជិនីសម្រស់តំណាងឱ្យកម្ពុជា ដែលមានឈ្មោះក្នុងចំពោះបេក្ខនារី៣០នាក់កំពូល (Top 30) ជាលើកដំបូងបំផុត។
សម្រាប់បវរកញ្ញារូបនេះ កម្លាំងចិត្ត និងការជឿជាក់របស់អ្នកគាំទ្រចំពោះដំណើររបស់ខ្លួនក្នុងពិភពបវរកញ្ញាចក្រវាល គឺជាអនុស្សាវរីយ៍ដែលមិនអាចបំភ្លេចបាន។ «នេះជាការបើកទ្វារ និងជាការផ្តល់ថាមពលខ្លាំងជាងមុន សម្រាប់បេក្ខនារីក្រោយៗទៀត»។ តាមរយៈការ Live ផ្ទាល់លើហ្វេសប៊ុកសម្រាប់ក្រុមអ្នកគាំទ្រ បវរកញ្ញា ប្រាសាទ ដាវីន បានថ្លែងសារលើកទឹកចិត្តបែបនេះ ហើយអះអាងថា គាត់ត្រៀមខ្លួនជានិច្ចក្នុងត្រួសត្រាយផ្លូវសម្រាប់អ្នកជំនាន់ក្រោយ។
ជាបេក្ខនារី Top 30 ក្នុងចំណោមចំនួនអ្នកចូលរួមជាកំណត់ត្រាសរុប១២៥នាក់ បេក្ខនារីកម្ពុជា ប្រាសាទ ដាវីន ក៏ទទួលបានពានមាស Gold Winners ផ្នែកការងារសង្គម Voice for Change រួមជាមួយបវរកញ្ញាបូលីវី Juliana Barrientos និងបវរកញ្ញាហ្កាតេម៉ាឡា Ana Gabriela Villanueva។
សម្រាប់ ដាវីន ពានផ្នែកការងារសង្គម Voice For Change នេះ ជាកិត្តិយសដ៏រំភើបមួយ ហើយអ្នកនាងក៏បានលើកទឹកចិត្តឱ្យបេក្ខនារីជំនាន់ក្រោយៗ យកចិត្តទុកដាក់គិតគូរ ឱ្យបានច្បាស់លាស់លើចំណុចនេះផងដែរ ក្រៅពីការយកចិត្តទុកដាក់លើវិញ្ញាសាប្រកួតប្រជែងផ្សេងៗទៀត។
សម្រាប់ព្រឹត្តិការណ៍ Miss Universe លើកទី៧៣ ដែលរៀបចំនៅប្រទេសម៉ិកស៊ិក នាឆ្នាំ២០២៤ នេះ បវរកញ្ញាដាណឺម៉ាក Victoria Kjær Theilvig បានក្លាយជាម្ចាស់មកុដបន្តវេនពីបវរកញ្ញានីហ្ការ៉ាហ្គោ Sheynnis Palacios។
ដោយឡែក សម្រាប់រាជនីតំណាងទ្វីបវិញ ទ្វីបអាស៊ី បានលើបវរកញ្ញាហ្វីលីពីន Chelsea Manalo, ទ្វីបអាហ្វ្រិក និងអូសេអានី បានលើបវរកញ្ញានីហ្សេរីយ៉ា Chidimma Adetshina, ទ្វីបអាម៉េរិក គឺបវរកញ្ញាប៉េរូ Tatiana Calmell និងបវរកញ្ញាហ្វាំងឡង់ Matilda Wirtavuori ជារាជិនីនៃទ្វីបអឺរ៉ុប និងមជ្ឈឹមបូព៌ា៕
© រក្សាសិទ្ធិដោយ thmeythmey.com
Tag:
