.png)
.png)
.jpg)
.jpg)
«សៀមរាបខ្ទះឆា» គោលដៅលើកម្ពស់វិស័យចុងភៅកម្ពុជា និងបន្លែសុវត្ថិភាពសៀមរាប
- ថ្ងៃសៅរ៍ ទី២៣ ខែវិច្ឆិកា ឆ្នាំ២០២៤ ម៉ោង ៩:៥៩ នាទី ព្រឹក
សៀមរាប៖ នៅបាំងតែជាងមួយសប្ដាហ៍ទៀតប៉ុណ្ណោះ កម្មវិធីប្រកួតចម្អិនម្ហូប «សៀមរាប ខ្ទះឆា» នឹងរៀបចំឡើងក្នុងពិព័រណ៍កសិ-ពាណិជ្ជកម្មឆ្នាំទី២ នៅសួនព្រះរាជដំណាក់ ក្រុងសៀមរាប ចាប់ពីថ្ងៃទី២៩ខែវិច្ឆិកា ដល់ថ្ងៃទី១ ខែធ្នូ ឆ្នាំ២០២៤។ កម្មវិធី«សៀមរាបខ្ទះឆា»រៀបចំឡើងដើម្បីផ្តល់ផ្ដល់ឱកាសដល់ចុងភៅកម្ពុជា បង្ហាញសមត្ថភាព មុនឈានដល់ការប្រកួតលំដាប់អន្តរជាតិនានា និងគោលបំណងលើកកម្ពស់ការប្រើប្រាស់បន្លែសុវត្ថិភាព ដែលដាំដុះក្នុងខេត្តសៀមរាប។
ដើម្បីជ្រាបច្បាស់សូមលោកអ្នកនាងទស្សនាបទសម្ភាសរវាង លោក ស៊ុល រ៉វី ជាមួយលោកស្រី ប៉ុល គឹមសាន ប្រធានសមាគមចុងភៅកម្ពុជា ដូចតទៅ៖
ក្រោយខកខានដោយសារជំងឺឆ្លងសកលកូវីដ-១៩, ឆ្នាំ២០២៤នេះ សមាគមចុងភៅកម្ពុជា នឹងរៀបចំការប្រកួតចម្អិនម្ហូប «សៀមរាប ខ្ទះឆា»ឡើងវិញ នៅថ្ងៃពិព័រណ៍កសិ-ពាណិជ្ជកម្ម ពោលគឺចាប់ពីថ្ងៃទី២៩ ខែវិច្ឆិកា រហូតដល់ថ្ងៃទី១ ខែធ្នូ ឆ្នាំ២០២៤។ នេះជាលើកទី៤ហើយ ដែលការប្រកួតប្រជែងសមត្ថភាពចម្អិនអាហារនឹងត្រូវរៀបចំឡើង។
ដើម្បីតេស្តសមត្ថភាព គឺត្រូវការល្បងសមត្ថភាព តាមរយៈការប្រកួត។ នេះជាប្រសាសន៍របស់លោកស្រី ប៉ុល គឹមសាន ប្រធានសមាគមចុងភៅកម្ពុជា លើកឡើងនៅពីក្រោយការរៀបចំការប្រកួតចម្អិនអាហារ «សៀមរាប ខ្ទះឆា»នេះ។ លោកស្រី គឹមសាន បន្ថែមទៀតថា៖«ក្នុងនាមយើងជាចុងភៅអាជីព យើងអត់អាចធ្វើការនៅមួយកន្លែងបានទេ គឺត្រូវការប្រកួតប្រជែងគ្នា បញ្ចេញស្នាដៃ ព្រោះនៅពេលការប្រកួតប្រជែងគ្នា ធ្វើឱ្យអាជីពយើងកាន់តែវិវត្តន៍ទៅមុខ»។
មួយផ្នែកទៀត នៃការប្រកួតនេះ លោកស្រីក៏ចង់បង្ហាញពីសក្ដានុពលកសិកម្ម លើការដាំដុះបន្លែសុវត្ថិភាព ក្នុងខេត្តសៀមរាបផងដែរ។ លោកស្រីថា ខេត្តសៀមរាប នៅរវាងខែវិច្ឆិកា ឬធ្នូ ជាពេលដែលសម្បូរបន្លែ ក្នុងនោះក៏មានបន្លែសុវត្ថិភាពផងដែរ ដូច្នោះការប្រកួតនេះ ជាឱកាសដើម្បីឱ្យសាធារណជនបានស្គាល់ពីប្រភពបន្លែសុវត្ថិភាព និងគាំទ្របន្លែសុវត្ថិភាព ដែលកសិករខេត្តសៀមរាប ប្រឹងប្រែងដាំដុះ។
លោកស្រី ប៉ុល គឹមសាន ចុងភៅអាជីព និងជាប្រធានសមាគមចុងភៅកម្ពុជា។ រូបភាព៖ CCA
ប្រធានសមាគមចុងភៅកម្ពុជារូបនេះ លើកឡើងទៀតថា តាមរយៈវេទិកានេះ ក៏ជាឱកាសលើកទឹកចិត្តដល់ចុងភៅកម្ពុជា ក្នុងការច្នៃប្រឌិតម្ហូបអាហារ ដែលមានរសជាតិ សោភ័ណភាព ដើម្បីឱ្យអាហារក្លាយជាផលិតផលទេសចរណ៍ ទាក់ទាញនៅសៀមរាប លើសតែពីប្រាសាទ។
បើតាមលោកស្រីគឹមសាន ការប្រកួតមានពីវិញ្ញាសា ពោលគឺការចម្អិនម្ហូបក្ដៅ ១មុខ និងត្រជាក់១មុខ។ ម្ហូបក្ដៅ គឺតម្រូវឱ្យបេក្ខជនត្រូវចម្អិនអាហារឆាមួយមុខ ដែលគណៈកម្មការជ្រើសរើស និងម្ហូបត្រជាក់ គឺញាំ ឬ Salad ដោយប្រើប្រាស់បន្លែសុវត្ថិភាពក្នុងខេត្តសៀមរាប។
បើតាមលោកស្រី គឹមសាន គណៈកម្មការនឹងជ្រើសរើសបេក្ខភាពតែ១២ក្រុមប៉ុណ្ណោះ ដោយក្នុងមួយក្រុមៗមានសមាជិក២រូប ទៅប្រកួតថ្វីដៃគ្នាវគ្គផ្ដាច់ព្រ័ត្រ នៅថ្ងៃពិព័រណ៍ពាណិជ្ជកម្ម ខាងមុននេះ។ ម្ចាស់ជ័យលាភីលេខ១,លេខ២ និងលេខ៣ នឹងត្រូវជ្រើសរើសចេញពីក្រុមទាំង១២ ដែលចូលរួមប្រកួតនោះ៕
© រក្សាសិទ្ធិដោយ thmeythmey.com
Tag:
.gif)