.png)
.png)
.jpg)
.jpg)
ប្រាសាទគោកពោធិ៍ដែលទ្រុឌទ្រោមខ្លាំងកំពុងទទួលបានការជួសជុលរចនាសម្ព័ន្ធឡើងវិញ
- ថ្ងៃចន្ទ ទី២៥ ខែវិច្ឆិកា ឆ្នាំ២០២៤ ម៉ោង ៧:៥៩ នាទី ព្រឹក
ប្រាង្គអក្សរA នៃប្រាសាទគោកពោធិ៍ ដែលកំពុងជួសជុលឡើងវិញ។
សៀមរាប៖ តួប៉មអក្សរ A នៃប្រាសាទគោកពោធិ៍ ដែលទ្រុឌទ្រោមខ្លាំងដោយសារអាយុកាល និងធម្មជាតិ កំពុងទទួលបានការជួសជុល និងលើកតម្លៃឡើងវិញ។ មកដល់ខែវិច្ឆិកានេះ ប្រាង្គ ឬតួប៉មសំខាន់នេះ មានភាពរឹងមាំឡើងវិញស្ទើរទាំងស្រុងហើយ។
បុរាណវិទូនៃអាជ្ញាធរជាតិអប្សរា លោក ហួរ សុធន បានឱ្យដឹងថា ប្រាសាទគោកពោធិ៍មានប៉មចំនួន៤ និងត្រូវបានកំណត់ឈ្មោះដោយអក្សរ A,B,C និងD។ តួប៉មអក្សរ A ដែលនៅរចនាសម្ព័ន្ធច្រើនជាងគេចាប់ផ្តើមដំណើរការជួសជុលនៅខែ មិថុនា ហើយគ្រោងនឹងបញ្ចប់ទាំងស្រុងនៅចុងខែ វិច្ឆិកានេះ។ ប្រាង្គចំនួន២ គឺតួប្រាង្គឬប៉ម C និងD បានរលំដួលទាំងស្រុង នៅតែប្រាង្គ A ដែលសេសសល់ជញ្ជាំងជុំវិញ និងប្រាង្គ B នៅសល់តែខឿន និងជញ្ជាំងផ្នែកខាងត្បូងប៉ុណ្ណោះ។
លោកបុរាណវិទូបន្តថា បច្ចុប្បន្នក្រុមការងារនៃនាយកដ្ឋានអភិរក្សប្រាសាទ បានជួសជុល និងពង្រឹងរចនាសម្ព័ន្ធខ្លះនៃប្រាង្គA រួមមាន ជួសជុលជញ្ជាំងខាងត្បូង និងខាងលិច សម្រេចបានស្ទើររួចរាល់ហើយ។ ការងារបន្ត ក្រុមការងារកំពុងដំណើរការនៅផ្នែកខឿន និងដំបូលដែលប្រទះថាមានភាពបាក់បែកខ្លាំង ដោយសារមានដើមរុក្ខជាតិ និងឫសរុក្ខជាតិចាក់ស្រែះថ្មជាច្រើន។
កម្មករកំពុងរៀបចំឥដ្ឋជួសជុលប្រាសាទគោកពោធន៍
ក្រុមការងារបានកាត់ដករុក្ខជាតិ និងដកយកឥដ្ឋពុកផុយចេញ ដោយជំនួសឥដ្ឋថ្មីម្ដងមួយដុំៗ ដើម្បីធានាថា ការជួសជុលមានភាពរឹងមាំឡើងវិញ។ ក្រៅពីផ្នែកដំបូលដែលទ្រុឌទ្រោម លោក ហួរ សុធន ប្រាប់ថា នៅផ្នែកខឿនឯណោះវិញ ក៏ខូចខាតច្រើនដែរ គឺមានកំណកដីចូលច្រើន និងមានដើមរុក្ខជាតិដុះតាមរន្ធតូចៗច្រើនផងដែរ។
ចំពោះបច្ចេកទេសជួសជុលវិញ អ្នកគ្រប់គ្រងការដ្ឋានជួសជុលប្រាសាទគោកពោធិ៍ លោក ហួរ សុធន ប្រាប់ថា ត្រូវបកដីមើលស្ថានភាពខឿនជាមុន បន្ទាប់មកសម្អាតកំណកដីឱ្យបានស្អាត ដកយករុក្ខជាតិ និងឫសចេញឱ្យអស់ ទើបចាប់ផ្តើមពង្រឹងខឿនឱ្យរឹងមាំឡើងវិញតាមខ្សែឥដ្ឋមួយៗ។
លោក ហួរ សុធន បុរាណវិទូដឹកនាំគម្រោងជួសជុលប្រាសាទគោកពោធិ៍
ប្រាសាទគោកពោធិ៍សាងសង់ឡើងនៅរវាងសតវត្សរ៍ទី៨ និងទី៩ ដោយក្សត្រច្រើនអង្គ។ ក្រុមប្រាសាទនេះស្ថិតនៅខាងជើងបារាយណ៍ខាងលិចប្រហែល២គីឡូម៉ែត្រ ហើយ កសាងឡើងដំណាលនឹងប្រាសាទអកយំ ដោយស្ថិតនៅចំណុចខ្សែបន្ទាត់ផ្លូវបុរាណតែមួយ។ តំបន់ប្រាសាទដែលស្ថិតនៅជិតៗគ្នានោះដែរ រួមមានប្រាសាទភ្នំរូង និងប្រាសាទត្រពាំងត្រាចជាដើម ដែលសុទ្ធសឹងជាប្រាសាទឥដ្ឋ។ ទោះបីនៅឆ្ងាយពីតំបន់យ៉ាងណាក្តី តែប្រាសាទគោកពោធិ៍នៅតែមានអ្នកទេសចរទៅទស្សនា និងជាកន្លែងបន់ស្រន់ គោរពបូជា និងរៀបចំកិច្ចពិធីផ្សេងៗរបស់អ្នកស្រុក។ ប្រាសាទនេះស្ថិតនៅភូមិគោកពោធិ៍ ឃុំដូនកែវ ស្រុកពួក៕
© រក្សាសិទ្ធិដោយ thmeythmey.com
Tag:
.gif)