.png)
.jpg)
.jpg)
ថ្ងៃរះ និងលិចនៅតំបន់អង្គរមានលក្ខណៈពិសេសខុសពីតំបន់ដទៃ
- ថ្ងៃសុក្រ ទី១៣ ខែធ្នូ ឆ្នាំ២០២៤ ម៉ោង ៨:៥៩ នាទី ព្រឹក
វប្បធម៌
សៀមរាប៖ ក្រៅពីមកទស្សនាប្រាង្គប្រាសាទនានានៅរមណីយដ្ឋានអង្គរ ថ្ងៃរះ និងលិច ក៏ជាផលិតផលទេសចរណ៍ទាក់ទាញចំណីអារម្មណ៍ភ្ញៀវជាតិ និងអន្តរជាតិច្រើនរយពាន់នាក់ក្នុងមួយថ្ងៃៗ។ តើអ្វីទៅជាលក្ខណៈពិសេសនៃថ្ងៃរះ និងលិចនៅសៀមរាប-អង្គរ?
ថ្ងៃរះនៅទិសខាងកើត ហើយលិចទៅវិញនៅទិសខាងលិច។ បាតុភូតធម្មជាតិនេះកើតឡើងជារៀងរាល់ថ្ងៃ និងនៅគ្រប់ទីកន្លែងនៅលើពិភពលោក។ នៅក្បែរគេហដ្ឋានរបស់លោកអ្នក នៅក្នុងតំបន់របស់លោកអ្នក នៅក្នុងប្រទេសរបស់លោកអ្នក សុទ្ធតែមានដំណើរធម្មជាតិថ្ងៃរះ និងថ្ងៃលិចជាដរាប។ ចុះហេតុអ្វីបានជាចាំបាច់ត្រូវចំណាយពេលវេលា និងថវិកាធ្វើដំណើរមកទស្សនាថ្ងៃរះ និងលិចនៅតំបន់អង្គរ?
នេះ គឺជាសំណួរដែលមនុស្សមួយចំនួនតែងតែលើកឡើង។ តាមពិត បាតុភូតថ្ងៃរះ និងថ្ងៃលិចនៅតំបន់រមណីយដ្ឋានអង្គរពិតជាមានលក្ខណៈពិសេសរបស់វាមែន ហើយប្រសិនបើគេនិយាយពីថ្ងៃរះពីរដងក្នុងមួយឆ្នាំនៅចំពីលើកំពូលប្រាសាទអង្គរវត្តទៀតនោះ វារឹតតែមានលក្ខណៈពិសេសរបស់វាថែមទៀត។
ជាទូទៅ ព្រឹត្តិការណ៍ថ្ងៃរះចំកំពូលប្រាសាទអង្គរវត្ត ឬ Equinox តែងតែកើតឡើងពីរដង ជារៀងរាល់ឆ្នាំ ហើយលើកទីមួយ ព្រឹត្តិការណ៍នេះកើតនៅអំឡុងខែមីនា និងលើកទីពីរ វាកើតនៅអំឡុងខែកញ្ញា។
យោងតាមការសិក្សាស្រាវជ្រាវរបស់អ្នកជំនាញ ព្រឹត្តិការណ៍នេះ មិនមែនជាបាតុភូតកើតឡើងដោយចៃដន្យនោះទេ។ រឿងរ៉ាវនេះ ពិតជាត្រូវបានបុព្វបុរសខ្មែរដែលសាងសង់អង្គរវត្ត បានគុណគូរយ៉ាងច្បាស់លាស់ និងសាងសង់តម្រូវឱ្យកើតព្រឹត្តិការណ៍នេះតែម្តង ពោលគឺធ្វើឡើងដោយមានការស្វែងយល់ច្បាស់លាស់
ពីទំនាក់ទំនងរវាងសំណង់ ស្ថាបត្យកម្ម និងវិស័យតារាសាស្ត្រ។
ថ្ងៃរះចំកំពូលប្រាសាទអង្គរវត្ត គឺជាពេលវេលាដ៏អស្ចារ្យបំផុត តែវាកើតឡើងតែពីរដងក្នុងមួយឆ្នាំ។ ចុះនៅថ្ងៃធម្មតាវិញ តើថ្ងៃរះនៅអង្គរវត្តមានលក្ខណៈពិសេសដែរឬទេ? នៅថ្ងៃធម្មតា ថ្ងៃរះនៅប្រាសាទអង្គរវត្តក៏មានលក្ខណៈពិសេសខុសពីតំបន់ ឬប្រទេសផ្សេងទៀតដែរ។ ទេសចរដែលធ្វើដំណើរទៅទស្សនាថ្ងៃរះនៅអង្គរវត្ត ពិតជាទទួលបានអារម្មណ៍ខុសពីតំបន់ដទៃទៀត ពីព្រោះ ជើងរបស់ពួកគេកំពុងឈរនៅក្នុងតំបន់បុរាណស្ថានដែលមានអាយុកាលជាង១ពាន់ឆ្នាំ ហើយភ្នែកទាំងគូរបស់ពួកគេកំពុងសម្លឹងមើលព្រះអាទិត្យដែលកំពុងរះឡើងពីទិសខាងកើត និងបញ្ចេញកាំរស្មីចែងចាំងបន្តិចម្តងៗមកលើកំពូលទាំងប្រាំនៃប្រាសាទអង្គរវត្ត។ ទេសភាពវប្បធម៌ បុរាណស្ថាន បូកផ្សំនឹងធាតុអាកាសត្រជាក់ល្មមនាព្រឹកព្រលឹម សំឡេងសត្វ និងព្រៃព្រឹក្សាផងនោះ ទេសចរពិតជាទទួលបានអារម្មណ៍ប្លែក និងមិនធ្លាប់មាននៅកន្លែងដទៃទៀតសម្រាប់ការទស្សនាថ្ងៃរះនៅមហាប្រាសាទអង្គរវត្ត។
ចំណែកឯថ្ងៃលិចនៅអង្គរវត្ត ក៏ជារឿងអស្ចារ្យផងដែរ។ នៅទីនេះ ទេសចរមិនមែនទស្សនាថ្ងៃលិចនៅឯជើងមេឃទេ តែទេសចរទស្សនាសម្រស់ប្រាសាទអង្គរវត្តតាមរយៈចំណាំងផ្លាតនៃកាំរស្មីព្រះអាទិត្យជះមកលើប្រាង្គប្រាសាទអង្គរវត្ត។ ដើម្បីទទួលបានបទពិសោធថ្ងៃលិចឲ្យកាន់តែពិសេសទៀតនោះ ទេសចរគួរស្ថិតនៅទីតាំងក្បែរមាត់ស្រះទឹកក្នុងបរិវេណអង្គរវត្ត ឬស្ថិតនៅកសិណខាងលិចជ្រុងខាងជើងនៃស្ពានហាល។
នៅឯលើភ្នំបាក់ខែងឯណោះវិញ ទេសចរក៏អាចទស្សនាថ្ងៃរៀបលិច ឬថ្ងៃកំពុងលិចនៅឯជើងមេឃពីលើភ្នំបាក់ខែងបានផងដែរ។ ទីបុរាណស្ថានមួយនេះ ត្រូវបានគេហៅថា ប្រាសាទភ្នំធម្មជាតិ។ ពីលើប្រាសាទភ្នំធម្មជាតិនេះ ទេសចរទាំងឡាយពិតជាអាចគយគន់ព្រះអាទិត្យកំពុងរៀបលិច ហើយជះកាំរស្មីមកលើកំពូលប្រាសាទអង្គរវត្តដោយប្រែក្លាយកំពូលប្រាសាទទៅជាពណ៌មាស។ ទេសភាពនេះ គឺពិតជាកម្រ និងអស្ចារ្យស្ថិតនៅលើទីបុរាណស្ថានដែលមានអាយុកាលរាប់ពាន់ឆ្នាំមកហើយ។
ផ្នែកម្ខាងទៀតនៃភ្នំបាក់ខែងដដែល កាំរស្មីនៃព្រះអាទិត្យដែលកំពុងរៀបលិច បានជះមកលើវាលស្រែពណ៌បៃតង ឬពណ៌មាសតាមរដូវកាលដោយលាតសន្ធឹងធំល្វឹងល្វើយមើលទៅស្ទើរដាច់កន្ទុយភ្នែក។ មិនត្រឹមតែប៉ុណ្ណោះ ទេសចរក៏អាចទស្សនាតំបន់ជុំវិញភ្នំបាក់ខែងដែលធ្លាប់ជាអតីតរាជធានីសម័យអង្គរ និងអាចគយគន់ទេសភាពដ៏ស្រស់ត្រកាលនៃបារាយណ៍ខាងលិចដែលអាចផ្ទុកទឹកបានរាប់លានម៉ែត្រគូបសម្រាប់បម្រើសេចក្តីត្រូវការរបស់អ្នកស្រុកអង្គរ។
ងាកមកមើលព្រះអាទិត្យលិចនៅប្រសាទប្រែរូបឯណេះវិញ។ នៅទីនេះ អ្នកជំនាញទេសចរណ៍ផ្តល់យោបល់ឲ្យទេសចរទស្សនាថ្ងៃលិចផងដែរ ពីព្រោះ កាំរស្មីព្រះអាទិត្យជិតអស្តង្គតជះមកលើកំពូលប្រាសាទបង្កើតបានជាផ្ទាំងទស្សនីយភាពពណ៌មាសដ៏គួរឲ្យគយគន់។ នៅទីនេះ ភាពស្ងាត់ជ្រងំ ទេសភាពព្រៃព្រឹក្សា សំឡេងសត្វ បានរួមចំណែករំសាយទុក្ខកង្វល់របស់ទេសចរបានមួយកម្រិតផងដែរ។
ថ្ងៃលិចនៅស្រះស្រង់ក្បែរប្រាសាទបន្ទាយក្តី ក៏ជាចំណីអារម្មណ៍មួយប្លែកម្យ៉ាងដែរ។ នៅទីនេះ ទេសចរជាលក្ខណៈគ្រួសារ ឬគូស្នេហ៍ អាចស្ថិតផ្នែកខាងកើត ឬ គួរស្ថិតនៅផ្នែកខាងលិច ផ្នែកខាងកំពង់ទឹកនៃស្រះ រង់ចាំទស្សនាកាំរស្មីព្រះអាទិត្យដែលចែងចាំងមកលើផ្ទៃទឹកបង្កើតបានជាពន្លឺផ្លេកៗស្រស់បំព្រងនៅលើផ្ទៃទឹក។ ទស្សនាថ្ងៃលិចផង ស្រស់ស្រូបអាហាររួមគ្នាផងបង្កើតបានជាអនុស្សាវរីយ៍ដែលមិនអាចបំភ្លេចបានក្នុងជីវិត។
ថ្ងៃលិចនៅឯភ្នំក្រោម ជាប់នឹងបឹងទន្លេសាបដែលជាបឹងទឹកសាបធំជាងគេនៅអាស៊ីអាគ្នេយ៍ ក៏បង្កើតបានទេសភាពវប្បធម៌ដ៏ស្រស់ត្រកាលផងដែរ។ ពីលើភ្នំក្រោមដែលមានវត្តមានប្រាសាទនៅពីលើផងដែរនោះ ទេសចរអាចគយគន់ទេសភាពទីក្រុងសៀមរាប វាលស្រែ ជីវិតប្រជានេសាទ លំហផ្ទៃបឹងទន្លេសាប និងទស្សនាថ្ងៃលិចនៅឯជើងមេឃ។ ទេសភាពនៅទីនេះ ពិតជាធ្វើឲ្យទេសចរក្មេងចាស់ គូស្នេហ៍ ឬជាលក្ខណៈគ្រួសារមួយចំនួននឹកឃើញអតីតកាលដែលធ្លាប់រស់នៅតាមទីជនបទ។
សរុបសេចក្តីមក ទស្សនាថ្ងៃរះ និងលិច នៅរមណីយដ្ឋានអង្គរដែលជាបេតិកភណ្ឌពិភពលោកនៃអង្គរការយូណេស្កូ ពិតជាមានលក្ខណៈពិសេសដាច់ដោយឡែកពីតំបន់ផ្សេងៗ ពីព្រោះ ទឹកដីអង្គរ គឺជាទីសក្ការៈដែលនាំអារម្មណ៍ទេសចរឲ្យវិលត្រឡប់ទៅដឹងរឿងរ៉ាវពីអតីតកាលពាន់ឆ្នាំមុន និងបច្ចុប្បន្នកាលរុងរឿង និងទំនើបនៃទឹកដីខេត្តសៀមរាប៕
© រក្សាសិទ្ធិដោយ thmeythmey.com
