.jpg)
.jpg)
បាវចាស់ៗធ្វើពីក្រចៅជាច្រើន មានតាំងលម្អនៅហាងកាហ្វេទំនើប
- ថ្ងៃអាទិត្យ ទី១២ ខែមករា ឆ្នាំ២០២៥ ម៉ោង ៨:៣០ នាទី ព្រឹក
ភ្នំពេញ៖ ក្រៅពីឧបករណ៍សោតទស្ស ភាជនៈ ជញ្ជីង កេស និងបំពង់ទឹករក្សាកម្តៅបុរាណ នៅជាន់ក្រោម និងជាន់លើសាខាហាងកាហ្វេ TEMPLE នៃវិថីឧកញ៉ាជ្រុនយូហាក់ (ផ្លូវ២៩៤) សង្កាត់បឹងកេងកង ខណ្ឌបឹងកេងកង រាជធានីភ្នំពេញ គេដាក់តាំងលម្អបាវធ្វើពីខ្សែក្រចៅច្រើនណាស់។ ពិបាកដឹងថា វាមានអាយុកាលប៉ុន្មានឆ្នាំ ខណៈគេធ្វើបាវអំពីក្រចៅតាំងពីយូរមកហើយ ហើយគេផលិតបាវបែបនេះ សភាពដូចគ្នា រហូតដល់ចុងសតវត្សទី២០។ ម្យ៉ាងទៀតមានបាវធំ បាវតូច គ្រប់ខ្នាត។ខ្លះ ក៏មានពណ៌ ដែលត្រូវបានបោះពុម្ពទៀត។ គេដាក់តាំងបាវទាំងអស់នោះ ដោយដាក់ស្រូវបំពេញវា ហើយត្រួតលើពីគ្នា នៅកន្លែងផ្សេងៗ។
ដើម្បីជ្រាបច្បាស់ សូមអញ្ជើញលោកអ្នកនាង ទស្សនាវីដេអូខាងក្រោមនេះ៖
ពីដើមមក មនុស្សយើងធ្វើខ្សែពីធាតុដើមធម្មជាតិប៉ុណ្ណោះ ឧទាហរណ៍អំពីរោមសត្វ ដូចជាសត្វចៀម ឬពីសរសៃសត្វ ដូចជាដង្កូវនាង និងអំពីរុក្ខជាតិ ដូចជាដើមអំបោះ ឬដើមក្រចៅ។ សម័យឥឡូវនេះ គេធ្វើខ្សែពីលោហធាតុ និងប្រេងឥន្ទនៈ។ យ៉ាងណាក៏ដោយ ក៏គេមិនបានបោះបង់ការផលិតខ្សែពីធាតុធម្មជាតិនៅឡើយ។ បើទោះមានតម្លៃថ្លៃជាងក៏ដោយ វាមិនប៉ះពាល់ដល់បរិស្ថាន (លើកលែងតែប្រើជាតិគីមី)។ ម្យ៉ាងក្រចៅ ជាធនធានដែលកើតឡើងវិញ ហើយវាស្អាតជាង។ កាលពីមុន នៅប្រទេសកម្ពុជា គេដាំដើមក្រចៅច្រើន ដើម្បីយកទៅធ្វើខ្សែ។ នាពេលឥឡូវនេះ នៅសល់ចំការក្រចៅច្រើន នៅខេត្តបាត់ដំបង ហើយនៅខេត្តផ្សេងៗក៏នៅសល់ខ្លះដែរ ជាពិសេសនៅខេត្តកំពង់ចាម និងខេត្តកណ្ដាល។ ការថយចុះនេះ មកពីទីផ្សារធ្លាក់ចុះ។
ដើមក្រចៅ គឺជាដើមផ្កា។ វាមានកម្ពស់ប្រហែល ២ម៉ែត្រ។ ស្លឹករបស់វាស្រួចណាស់។ រុក្ខជាតិនេះ មានពណ៌បៃតង។ ដើមវាត្រង់ល្អ ទទឹងប្រហែលមួយ ទៅពីរសង់ទីម៉ែត្រ។ កាប់ហើយ គេដកស្លឹកចេញ។ ចាស់ៗ យកធ្វើជាថ្នាំជក់។ រីឯដើមវិញ គេយកទៅទាក់បំបែកដកសំបកចេញ ព្រោះវារឹងពេក។ រួចហើយគេយកសរសៃទៅហាលថ្ងៃរហូតដល់វាក្រៀម។ នោះទើបអាចយកសរសៃ ដែលមានរាប់រយក្នុងមួយដើម។ បន្ទាប់មកគេប្រើម៉ាស៊ីន ដើម្បីតសរសៃ ធ្វើជាខ្សែទទឹងប្រហែល ២មីលីម៉ែត្រ។ ជាចុងក្រោយគេប្រើម៉ាស៊ីនរុំវាជាដុំៗ។
ហាង TEMPLE ជាអាហារដ្ឋាន ហាងកាហ្វេ និងឌីស្កូទែក ដែលតុបតែងជាមួយវត្ថុបុរាណ។ Temple គឺជាពាក្យបារាំង ដែលបកប្រែជាភាសាខ្មែរថា ប្រាសាទ។ ពីដំបូងត្រូវបានបង្កើតយីហោនេះ នៅក្រុងសៀមរាប ពីព្រោះវត្ថុបុរាណសមនឹងប្រាសាទបុរាណ ដែលមានចំនួន២០០ នៅឯអង្គរ។ ហើយតាំងពីជំងឺកូវីដបានផ្ទុះឡើង ក៏មានហាង TEMPLE នៅរាជធានីភ្នំពេញផងដែរ៕
Relate:
© រក្សាសិទ្ធិដោយ thmeythmey.com
Tag:
