.png)
.jpg)
.jpg)
ក្បាលចាក់ឌីសបុរាណ និងឌីសដែលថតនៅយុគសម័យមាសនៃតន្ត្រីខ្មែរ មានតាំងលម្អនៅ ហាងកាហ្វេ TEMPLE
- ថ្ងៃសៅរ៍ ទី១៨ ខែមករា ឆ្នាំ២០២៥ ម៉ោង ៨:១៩ នាទី យប់
ភ្នំពេញ៖ ក្បាលចាក់ថាសចាស់១គ្រឿង ជាមួយថាស៣គ្រាប់ ត្រូវបានគេដាក់តាំងលម្អ នៅជាន់ក្រោម នៃសាខាហាងកាហ្វេ TEMPLE នៃវិថីឧកញ៉ាជ្រុនយូហាក់ (ផ្លូវ២៩៤) សង្កាត់បឹងកេងកង ខណ្ឌបឹងកេងកង រាជធានីភ្នំពេញ។ ក្បាលចាក់ឌីស ត្រូវបានផលិតក្នុងដើមទសវត្សរ៍១៩៨០ ហើយឌីសទាំង៣ ត្រូវបានថតកាលពីយុគសម័យមាស នៃចម្រៀងខ្មែរ។
ក្បាលចាក់ថាស ជាម៉ាក VICTOR ប្រភេទ Solid State។ វាមានពណ៌ខ្មៅ ខណៈស្រោមថាសសុទ្ធតែពណ៌ស្រស់ៗវិញ។ ឌីសទាំង៣នេះ មានទទឹងត្រឹម ៣០សង់ទីម៉ែត្រ។ បើចាក់ វាវិល៣៣ជុំ ក្នុងមួយនាទី តាមស្តង់ដារសម័យមុន។ ថាសទាំង៣ មកពីផលិតកម្ម DIAMOND records ហើយមានចំណងជើងថា កម្រងអនុស្សាវរីយ៍អតីតកាល។ មានភាគ១ (លេខកូដវ៉ុល១ : D-1601) ភាគ២ (លេខកូដវ៉ុល២ : D-1602) និងភាគ៤ (លេខកូដវ៉ុល៤ : D-1702)។ មានអ្នកចម្រៀងដូចជា លោក ស៊ីន ស៊ីសាមុត កញ្ញា រស់ សេរីសុទ្ធា និងកញ្ញា ប៉ែន រ៉ន។ ក្នុងនោះបទចម្រៀងដែលល្បីជាងគេគឺ រាំអាហ្គោហ្គោ។ ពាក្យបារាំង à gogo ជាគ្រាមភាសា មានន័យថា ច្រើនតាមចិត្ត។ តាមទីផ្សារវត្ថុបុរាណថាស កម្រងអនុស្សាវរីយ៍អតីតកាល មួយមានតម្លៃជាង ១០០ ០០០ រៀល។
ដើម្បីជ្រាបកាន់តែច្បាស់ សូមអញ្ជើញលោកអ្នកនាងទស្សនាវីដេអូខាងក្រោមនេះ ៖
តាំងពីដើមមក មានមនុស្សដែលលេងភ្លេង។ កាលពីបុរាណកាល គេប្រើសំឡេងខ្លួនឯង គេទាក់ដៃ គោះថ្ម ឬឈើ។ ឆ្នាំ១៨៥៧ នៅប្រទេសបារាំង លោក SCOTT DE MARTINVILLE Édouard-Léon បានបង្កើតម៉ាស៊ីនថតសំឡេងមុនគេបង្អស់។ ឆ្នាំ១៨៧៧ នៅសហរដ្ឋអាម៉េរិក លោក EDISON Thomas បង្កើតម៉ាស៊ីនថត និងចាក់សំឡេងដំបូងគេ។ នៅក្នុងឆ្នាំ១៨៩៦ នៅប្រទេសអ៊ីតាលី លោក MARCONI Guglielmo បង្កើតប្រដាប់មួយសម្រាប់ទទួលសំឡេង នៃវិទ្យុគមនាគមន៍ ដើម្បីផ្ទុកសំឡេង។ រហូតដល់សង្គ្រាមពិភពលើកទី២ គេប្រើថាស៧៨ជុំ។ ចាប់ពីចុងទស្សវត្សរ៍១៩៤០ គេបែរទៅប្រើប្រព័ន្ធថាសតូចជាង : ៣៣ និង ៤៥ជុំវិញ រហូតដល់ចុងទស្សវត្សរ៍១៩៨០។
ឆ្នាំ១៩៦៣ ក្រុមហ៊ុនអឺរ៉ុប PHILIPS បង្កើតកាស៊ត។ កាលពីដំបូង មិនទាន់មានម៉ាញ៉េ ដើម្បីថតសំឡេងក្នុងកាស៊ែតទេ មានតែដើម្បីស្ដាប់ប៉ុណ្ណោះ។ បង្កើតម៉ាញ៉េហើយ គេផ្គុំម៉ាញ៉េ និងវិទ្យុជាមួយគ្នា ធ្វើជាវត្ថុតែមួយ។ នៅប្រទេសខ្មែរ នៅតែមានលោកអាចារ្យវ័យចំណាស់មួយចំនួន ដែលបន្តប្រើកាស៊ែត។ រីឯ CD វិញ គឺក្រុមហ៊ុន PHILIPS រួមជាមួយក្រុមហ៊ុនជប៉ុន SONY ដែលជាអ្នកបង្កើត ត្រឹមឆ្នាំ១៩៧៩។ វាពេញនិយម នាទសវត្សរ៍១៩៩០ និង២០០០។ នាពេលបច្ចុប្បន្ន គេបែរទៅលែងប្រើវត្ថុផ្ទុកសំឡេងតែម្ដង វាក្លាយទៅជាទិន្នន័យសុទ្ធ។
ពាក្យ ឌីស ជាពាក្យកម្ចីពីភាសាបារាំង (disque) ដែលមានន័យថា ថាស។
ហាង TEMPLE ជាអាហារដ្ឋាន ហាងកាហ្វេ និងឌីស្កូទែក ដែលតុបតែងជាមួយវត្ថុបុរាណ។ Temple គឺជាពាក្យបារាំង ដែលបកប្រែជាភាសាខ្មែរថា ប្រាសាទ។ ពីដំបូងយីហោនេះ មានតែនៅក្រុងសៀមរាបប៉ុណ្ណោះ ពីព្រោះវត្ថុបុរាណ សមនឹងប្រាសាទបុរាណ ដែលមានចំនួន២០០ នៅឯអង្គរ។ បន្ទាប់ពីជំងឺកូវីដបានផ្ទុះឡើង ក៏មានហាង TEMPLE នៅរាជធានីភ្នំពេញដែរ ដែលបច្ចុប្បន្នមានដល់ទៅ៣ទីតាំង។
Relate:
© រក្សាសិទ្ធិដោយ thmeythmey.com
