.jpg)
.jpg)
អាជ្ញាធរក្រចេះ ព្រមានចាត់វិធានការលើអាជីវករ ដែលស្ទាក់ឡានភ្ញៀវ នៅរមណីយដ្ឋានទឹកជួរកាំពី
- ថ្ងៃអាទិត្យ ទី១៩ ខែមករា ឆ្នាំ២០២៥ ម៉ោង ៧:៣៩ នាទី ល្ងាច
អាជ្ញាធរខេត្តក្រចេះ ណែនាំអាជីវករលក់នៅរមណីយដ្ឋានទឹកជួរកាំពី។ រូបពី មន្ទីរទេសចរណ៍
ភ្នំពេញ៖ អាជ្ញាធរខេត្តក្រចេះ ព្រមានចាត់វិធានការលើអាជីវករ ដែលឈរស្ទាក់ឡានភ្ញៀវទេសចរ គ្មានសណ្ដាប់ធ្នាប់ នៅរមណីយដ្ឋានទឹកជួរកាំពី ។ ការព្រមាននេះ ធ្វើឡើងក្រោយមានវីដេអូបែកធ្លាយលើបណ្ដាញសង្គម ពីសកម្មភាពអាជីវករជាច្រើនរូប ឈរស្ទាក់ឡានអ្នកដំណើរយ៉ាងអនាធិបតេយ្យ។ នេះបើតាមការចេញផ្សាយរបស់រដ្ឋបាលខេត្តក្រចេះ។
លោក ម៉ែន វណ្ណា នាយករដ្ឋបាលខេត្តក្រចេះ និងលោកចាន់ សុគន្ធី ប្រធានមន្ទីរទេសចរណ៍ខេត្ត រួមជាមួយអាជ្ញាធរមូលដ្ឋាន ស្រុកចិត្របុរី បានជួបប្រជុំ និងណែនាំក្រុមអាជីវករលក់ដូរនៅរមណីយដ្ឋានទឹកជួរទន្លេមេគង្គកាំពី ឱ្យឈប់ធ្វើសកម្មភាពឈរស្ទាក់ឡានហៅភ្ញៀវតទៅទៀត។
ករណីមិនគោរពតាមការណែនាំ អាជ្ញាធរបានព្រមានបិទអាជីវកម្មរបស់ពួកគេ។ អាជ្ញាធរខេត្តក្រចេះបានព្រមានបែបនេះថា៖ «ក្រុមអាជីវករណា ដែលមិនគោរពតាមការណែនាំ អាជ្ញាធរខេត្ត នឹងដកឈ្មោះ មិនឱ្យប្រកបអាជីវកម្មបន្តឡើយ»។
ចំណែកគណៈកម្មការគ្រប់គ្រងរមណីយដ្ឋាន ក៏បានណែនាំបន្ថែមដល់អាជីវករទាំងអស់ ត្រូវពង្រឹងគុណភាពសេវាកម្ម និងផលិតផល។ គណៈកម្មការ បានសង្កត់ធ្ងន់ថា អាជីវករ ត្រូវផ្ដោតលើការរៀបចំសេវាកម្ម និងបដិសណ្ឋារកិច្ចភ្ញៀវឱ្យបានល្អប្រសើរ ដោយមិនត្រូវបក់ដៃ ឬអូសដៃភ្ញៀវ ចូលកន្លែងអាជីវកម្មខ្លួន ដោយគ្មានសណ្ដាប់ធ្នាប់ឡើយ។ គណៈកម្មការគ្រប់គ្រងរមណីយដ្ឋាន ណែនាំឱ្យអ្នកលក់ដូរ ត្រូវតែមានភាពស្មោះត្រង់ រួសរាយរាក់ទាក់ រក្សាអនាម័យ។ លើសពីនេះ ត្រូវរៀបចំបញ្ជីមុខម្ហូប និងកំណត់តម្លៃឱ្យបានត្រឹមត្រូវ។
ថ្មីៗនេះ ភ្ញៀវទេសចរបានបង្ហោះវីដេអូលើបណ្ដាញសង្គម ពីក្រុមអាជីវករនៅរមណីយដ្ឋានទឹកជួរកាំពី ឈរស្ទាក់រថយន្ត តាមដងផ្លូវសាធារណៈយ៉ាងអនាធិបតេយ្យ។ ករណីនេះ បង្កការរំខានដល់ភ្ញៀវទេសចរ និងអ្នកធ្វើដំណើរលើដងផ្លូវ។ លើសពីនេះ ត្រូវបានមហាជនរិះគន់ ក្រុមអាជីវករ ដែលមិនមានសណ្ដាប់ធ្នាប់ ក្នុងការបម្រើសេវាកម្មដល់ភ្ញៀវ ដែលចូលទៅកម្សាន្តនៅតំបន់នោះ៕
© រក្សាសិទ្ធិដោយ thmeythmey.com
Tag:
