.jpg)
.jpg)
សិស្សសាលាបឋមសិក្សាប្រាសាទ ខេត្តសៀមរាប ស្នើសុំអាហារចំនួនពីរពេល ក្នុងកម្មវិធីសិក្សាពេញម៉ោង
- ថ្ងៃសៅរ៍ ទី២៥ ខែមករា ឆ្នាំ២០២៥ ម៉ោង ៧:៥៩ នាទី ព្រឹក
អ្នករៀបចំអាហារនៅសាលាបឋមសិក្សាប្រាសាទ រៀបចំអាហារសម្រាប់សិស្ស។
សៀមរាប៖ សិស្សសាលាបឋមសិក្សាប្រាសាទ នៅភូមិផ្លាំង ស្រុកពួក ខេត្តសៀមរាប ស្នើសុំឱ្យមានអាហារចំនួនពីរពេលដល់ពួកគេ គឺពេលព្រឹកនិងថ្ងៃត្រង់ ដើម្បីជំរុញទឹកចិត្តពួកគេ ក្នុងការសិក្សា។ សាលាបឋមសិក្សាប្រាសាទ កំពុងអនុវត្តគម្រោងសិក្សាពេញម៉ោង ដើម្បីបង្កើនគុណភាពអប់រំ ដល់កុមារ។
កុមារី ឈូយ ដាលី ជាសិស្សនៃសាលាបឋមសិក្សាប្រាសាទ រីករាយនឹងកម្មវិធីសិក្សាពេញម៉ោង ព្រោះជួយឱ្យរូបនាង អាចចេះដាំដុះបន្លែ ដើម្បីបរិភោគ និងលក់ដូរបន្លែដាំដុះនេះ ជាពិសេសការទទួលបានអាហារថ្ងៃត្រង់ នៅសាលារៀនជារៀងរាល់ថ្ងៃ។ ចំណែក កុមារី ម៉ៅ មិថុនា រៀនថ្នាក់ទី៥ ក៏ពេញចិត្តនឹងកម្មវិធីបំណិនជីវិត ផ្នែកកសិកម្មដែរ ព្រោះបន្លែដាំដុះទាំងនោះ ពុំប្រើប្រាស់ជីគីមី ។ កុមារីរូបនេះ ចង់ឱ្យបន្តគម្រោងនេះទៀត នៅក្នុងសាលារៀន។
ការផ្ដល់អាហារតាមសាលារៀន ជាកម្មវិធីរបស់ក្រសួងអប់រំ យុវជន និងកីឡា ដើម្បីជួយដល់សិស្សជួបការលំបាក ក្នុងគោលបំណងជំរុញឱ្យសិស្សខិតខំរៀនសូត្រ។ កុមារី ដា នី តែងតែនៅបរិភោគអាហារថ្ងៃត្រង់នៅសាលាជាប្រចាំ។ ហេតុនេះ ទើបសិស្សថ្នាក់ទី៣រូបនេះ ចង់ឱ្យមានអាហារសម្រាប់សិស្សចំនួនពីរពេល។ កុមារី ដា នី ប្រាប់សារព័ត៌មានឌីជីថលថ្មីៗថា៖ «ចង់ស្នើសុំឱ្យមានអាហារពេលព្រឹក ។ ចង់ឱ្យយើងមានអាហារញ៉ាំពេញមួយថ្ងៃ ដើម្បីមានកម្លាំងរៀនកាន់តែច្រើន»។
ជាសិស្សថ្នាក់ទី៥ កុមារី អ៊ី ស្រីនី ក៏ពេញចិត្តនឹងកម្មវិធីផ្ដល់អាហារនេះដែរ។ កុមារីនេះ ចង់បានម្ហូបអាហារដែលមានសុវត្ថិភាព គ្មានជាតិគីមី។
នាយកសាលាបឋមសិក្សាប្រាសាទ លោក យី ខប បានកត់សម្គាល់ថា ចាប់តាំងពីអនុវត្តគម្រោងផ្ដល់អាហារដល់សិស្សមក ពួកគេអាចទទួលបានឱកាសសិក្សាច្រើនជាងមុន ជាពិសេសជួយសម្រួលបន្ទុកអាណាព្យាបាលសិស្សទៀតផង។ មិនតែប៉ុណ្ណោះ គម្រោងនេះ ក៏បានជួយកាត់បន្ថយអត្រាសិស្សបោះបង់ចោលការសិក្សាទាំងវ័យក្មេងផងដែរ។
បើតាមលោក យី ខប ក្នុងឆ្នាំ២០២៥នេះ សាលាទទួលបានថវិកា១៥០លានរៀល ដើម្បីអនុវគម្រោងផ្ដល់អាហារដល់សិស្ស។
សាលាបឋមសិក្សាប្រាសាទជាសាលាគំរូមួយ ដែលស្ថិតនៅក្នុងគម្រោងរបស់អង្គការអេដ អេ អាកស្យុង (AEA) និងអង្គការអភិវឌ្ឍន៍បង្រៀន (TDSO) រួមទាំងអង្គការដៃគូសហការផ្សេងទៀត ។ ស្ថាប័នអង្គការទាំងនេះ ក៏បានជួយគាំទ្រលើផ្នែកបំណិនជីវិត កសិកម្ម ការបង្រៀនភាសាអង់គ្លេស ការបណ្ដុះបណ្ដាលគ្រូបង្រៀន និងការផ្ដល់អាហារដល់សិស្សជាដើម៕
© រក្សាសិទ្ធិដោយ thmeythmey.com
Tag:
