.png)
.png)
.jpg)
.jpg)
ទឹកប្រាក់ជាង១៤ពាន់លានដុល្លារ កម្ពុជាចំណាយលើការនាំចូលទំនិញពីចិន-វៀតណាម ក្នុងឆ្នាំ២០២៤
- ថ្ងៃអង្គារ ទី២៨ ខែមករា ឆ្នាំ២០២៥ ម៉ោង ២:០៦ នាទី រសៀល
រូបតំណាង៖ កំពង់ផែស្វយ័តក្រុងព្រះសីហនុ ជាច្រកពាណាណិជ្ជកម្មធំជាងគេរបស់កម្ពុជា។ សព្វថ្ងៃ កំពង់ផែនេះអាចស្រូបយកនូវចំណែកទីផ្សារបានជាង៧០ភាគរយ នៃការចរាចរណ៍ទំនិញចេញ-ចូលសរុបរបស់កម្ពុជា ដែលបានបម្រើនូវសេវាកម្មចំនួនបួនប្រភេទ។ រូបថត៖ កំពង់ផែស្វ័យក្រុងព្រះសីហនុ
ភ្នំពេញ៖ ក្នុងទំនាក់ទំនងពាណិជ្ជកម្ម ចិន និងវៀតណាម ជាប្រទេសដែលនាំទំនិញចូលច្រើនគេបំផុតសម្រាប់កម្ពុជា។ ពោល ពេញមួយឆ្នាំ២០២៤ ទំហំទឹកប្រាក់នៃថ្លៃទំនិញនានាដែលប្រទេសទាំង២នេះនាំចូលទីផ្សារកម្ពុជា គឺមានរហូតដល់ជាង១៤,៣៩ពាន់លានដុល្លារអាម៉េរិក។ នេះបើយោងតាមទិន្នន័យពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា។
សម្រាប់ទីផ្សារកម្ពុជា, ចិន ជាប្រទេសធំឈរនៅលំដាប់ទី១ ដែលបាននាំទំនិញចូលជាច្រើនជាងគេមានក្នុងទំហំទឹកប្រាក់១០,៧៨៦លានដុល្លារ កើន២៤,៦ភាគរយ ធៀបនឹងឆ្នាំ២០២៣។ បន្ទាប់មក គឺវៀតណាម បាននាំទំនិញចូលកម្ពុជាដែលមានទំហំជាង ៣,៦១២លានដុល្លារ កើន១៨,២ភាគរយ ខណៈប្រទេសថៃឈរនៅលំដាប់ទី៣ ដែលមានទំហំនាំចូលកម្ពុជា ២,៨៩៥លានដុល្លារ កើន១៥,៥ភាគរយ។
ចំពោះ ឥណ្ឌូណេស៊ី ជាប្រទេសឈរនៅលំដាប់ទី៤ ក្នុងការនាំចូលទំនិញផ្គត់ផ្គង់ឱ្យទីផ្សារកម្ពុជា ដែលមានក្នុងទំហំជាង៩៩៤លានដុល្លារ និង សិង្ហបុរី ស្ថិតនៅលំដាប់ទី៥ ដោយមានទំហំនាំចូល ៨៦៦លានដុល្លារ នាឆ្នាំ២០២៤។
ទំនិញ ដែលកម្ពុជានាំចូលពីបរទេសរួមមាន៖ វត្ថុធាតុដើមបម្រើក្នុងវិស័យឧស្សាហកម្មវាយនភណ្ឌ សរសៃអំបោះសិប្បនិម្មិតខ្លីៗ កប្បាស វត្ថុធាតុប្លាស្ទិក ស្បែកឆៅ ផលិតផលបានពីការចាក់ដោយម្ជុល។ រ៉ែប្រើជាគ្រឿងចំហះ ប្រេងខនិជ, យាន ក្រៅពីអយស្ម័យយាន ឬអយរថអគ្គិសនី ម៉ាស៊ីនថត ...ជាដើម។
ដោយឡែក ប្រទេសដែលជាទីផ្សារធំជាងគេរបស់កម្ពុជាវិញ គឺសហរដ្ឋអាម៉េរិក។ ការនាំចេញរបស់កម្ពុជា ទៅកាន់ទីផ្សារប្រទេសមហាអំណាចពិភពលោកមួយនេះសម្រេចបានក្នុងទំហំទឹកប្រាក់ ៨,៨៩៧លានដុល្លារ កើន១១,២ភាគរយ ធៀបនឹងឆ្នាំ២០២៣។ តាមពីក្រោយដោយវៀតណាម ដែលមានទំហំចេញរបស់កម្ពុជាទៅប្រទេសជិតខាងមួយនេះមាន២,៧៩២លានដុល្លារ កើន១៨,២ភាគរយ។
រីឯ ការនាំចេញរបស់កម្ពុជាទៅកាន់ប្រទេសចិនដែលមិត្តដែកថែបមានក្នុងទំហំទឹកប្រាក់១,៤៧៨លានដុល្លារ កើន២៣,៨ភាគរយ។ ប្រទេសជប៉ុន ក៏ជាទីផ្សារធំរបស់កម្ពុជាផងដែរ ដោយឈរនៅលំដាប់ទី៤ មានក្នុងទំហំទឹកប្រាក់ ១,១៧៥លានដុល្លារ ខណៈការនាំចេញទៅកាណាដាមាន៨៦៩លានដុល្លារ។
គួរជម្រាបថា ក្នុងឆ្នាំ២០២៤ ទំនាក់ទំនងពាណិជ្ជកម្មរវាងកម្ពុជា ជាមួយប្រទេសដៃគូក្នុងពិភពលោក គឺមានសម្រេចបាន៤៦,៨២៨លានដុល្លារ កើន១៦,៩ភាគរយ ធៀបនឹងឆ្នាំ២០២៣។ ក្នុងនោះ ការនាំចេញសម្រេចបាន២២,៦៤៤លានដុល្លារ កើន១៥,៧ភាគរយ និងនាំចូលមាន២៤,១៨៣លានដុល្លារ កើន១៨ភាគរយ។ ប្រទេសដែលជាដៃគូពាណិជ្ជកម្មធំទាំង១០របស់កម្ពុជា គឺ ចិន អាម៉េរិក វៀតណាម ថៃ ជប៉ុន កាណាដា ឥណ្ឌូណេស៊ី អាល្លឺម៉ង អេស្ប៉ាញ និងអង់គ្លេស។ នេះបើតាមទិន្នន័យពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា៕
© រក្សាសិទ្ធិដោយ thmeythmey.com
Tag:
