.jpg)
.jpg)
នាយករដ្ឋមន្រ្តី ចាត់ទុកការប្រើគ្រឿងញៀននៅតាមសហគមន៍ ជាបញ្ហារ៉ាំរ៉ៃ ដែលបង្កគ្រោះថ្នាក់ដល់សង្គម
- ថ្ងៃពុធ ទី១២ ខែកុម្ភៈ ឆ្នាំ២០២៥ ម៉ោង ៦:៥៩ នាទី ល្ងាច
ភ្នំពេញ៖ «ក្តីបារម្ភ ដែលជាបញ្ហាប្រឈមរ៉ាំរ៉ៃ និងកំពុងបង្កហានិភ័យដល់សង្គមជាតិនោះគឺ ការប្រើប្រាស់គ្រឿងញៀននៅតាមសហគមន៍នៅតែបន្តកើតមាននៅឡើយ និងកំពុងតែទាមទារឱ្យចាត់វិធានការជាអាទិភាព ដើម្បីដោះស្រាយ ប្រកបដោយប្រសិទ្ធភាពបានទាន់ពេលវេលា»។ នេះជាការលើកឡើងរបស់សម្ដេច ហ៊ុន ម៉ាណែត តាមរយៈផែនការស្ដីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០។
ចាប់ពីឆ្នាំ២០១៧មក តាមរយៈយុទ្ធនាការប្រយុទ្ធប្រឆាំងគ្រឿងញៀនខុសច្បាប់ សមត្ថកិច្ចជំនាញ និងមន្រ្តីពាក់ព័ន្ធ បានបើកប្រតិបត្តិការបង្រ្កាបគ្រឿងញៀនខុសច្បាប់ជាហូរហែ ដោយក្របួចបានជនសង្ស័យជាច្រើនម៉ឺននាក់។ ទោះជាយ៉ាងណា សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា សង្កេតឃើញថា បញ្ហាគ្រឿងញៀនខុសច្បាប់នេះ មិនទាន់ថមថយនៅឡើយ។
ក្នុងផែនការស្ដីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ ឆ្នាំ២០២៥ ប្រមុខរដ្ឋាភិបាលកម្ពុជា បានបង្ហាញក្ដីបារម្ភ ដោយចាត់ទុកការប្រើប្រាស់គ្រឿងញៀននៅតាមសហគមន៍ ជាបញ្ហាប្រឈមរ៉ាំរ៉ៃ និងកំពុងបង្កហានិភ័យដល់សង្គមជាតិ។ បើតាមសម្ដេចនាយករដ្ឋមន្រ្តី បញ្ហាប្រើប្រាស់គ្រឿងញៀននៅតាមសហគមន៍ ដែលនៅតែបន្តកើតមាននេះ កំពុងតែទាមទារឱ្យចាត់វិធានការជាអាទិភាព ដើម្បីដោះស្រាយ ប្រកបដោយប្រសិទ្ធភាពបានទាន់ពេលវេលា។
ដើម្បីដោះស្រាយបញ្ហាគ្រឿងញៀននេះ សម្ដេច ហ៊ុន ម៉ាណែត ណែនាំបើកយុទ្ធនាការជាប្រចាំបោសសម្អាតបណ្តាញឧក្រិដ្ឋជនជួញដូរគ្រឿងញៀនជាក្រុមតូចៗ និងត្រូវអនុវត្តវិធានការច្បាប់យ៉ាងម៉ឺងម៉ាត់បំផុត។ លើសពីនេះ ត្រូវបន្តស្រាវជ្រាវរកប្រភពនៃគ្រឿងញៀន និងក្រុមមេខ្លោង បណ្តាញខ្សែរយៈ ដើម្បីបំផ្លាញឱ្យដល់ឫសគល់។
ជាមួយគ្នានេះ គណៈបញ្ជាការឯកភាពរដ្ឋបាលរាជធានី ខេត្ត ក្រុង ស្រុក ខណ្ឌ និងរដ្ឋបាលឃុំ សង្កាត់ ត្រូវដឹកនាំ កម្លាំងអនុវត្តច្បាប់ និងកងកម្លាំងមានសមត្ថកិច្ចពាក់ព័ន្ធ ដើម្បីចាត់វិធានការម៉ឺងម៉ាត់ក្នុងការស្វែងរកឱ្យឃើញ និងទប់ស្កាត់ការលួចលាក់នាំចូលគ្រឿងញៀនខុសច្បាប់ឆ្លងកាត់ព្រំដែនចូលមកក្នុងភូមិសាស្ត្រខេត្តរបស់ខ្លួន ឬឆ្លងកាត់ពីខេត្តមួយទៅខេត្តមួយទៀត។ សម្ដេច ហ៊ុន ម៉ាណែត ចង់ឱ្យមន្រ្តីទាំងអស់ បំពេញតួនាទី ឱ្យសកម្មថែមទៀត ដើម្បីដោះស្រាយចំពោះការរាយការណ៍ ពីប្រជាពលរដ្ឋពាក់ព័ន្ធនឹងគ្រឿងញៀនតាមប្រព័ន្ធកម្មវិធីទូរស័ព្ទដៃ NoDrug ឱ្យបានទាន់ពេលវេលា។
មួយវិញទៀត សម្ដេចនាយករដ្ឋមន្រ្តី ក៏ជំរុញឱ្យបើកយុទ្ធនាការជាប្រចាំបោសសម្អាតអ្នកប្រើប្រាស់គ្រឿងញៀន តាមរយៈការសហការផ្តល់ព័ត៌មានពីអាណាព្យាបាល គ្រឹះស្ថានសិក្សា ឬសហគមន៍ ដើម្បីធ្វើការអប់រំ បន្សាប ព្យាបាលនៅតាមសហគមន៍ ឬបញ្ជូនទៅមណ្ឌលបន្សាប ព្យាបាល និងស្តារនីតិសម្បទា។ បន្ថែមលើនេះ ត្រូវតាមដាន គ្រប់គ្រង និងបង្ក្រាបឱ្យបានម៉ឺងម៉ាត់នូវសកម្មភាពកែច្នៃផលិតគ្រឿងញៀនសំយោគ ការដាំដុះ ការចម្រាញ់ ការនាំចូលវត្ថុធាតុដើមជាសារធាតុគីមីផ្សំដែលអាចកែច្នៃផលិតគ្រឿងញៀនសំយោគ ក្នុងដែនសមត្ថកិច្ចរបស់រាជធានី-ខេត្តនីមួយៗ។
អត្ថបទទាក់ទង
សូមបញ្ជាក់ថា ចាប់ពីឆ្នាំ២០១៧-២០២៤ សមត្ថកិច្ចជំនាញ ចាប់បានគ្រឿងញៀនគ្រប់ប្រភេទប្រមាណ ៤២ ៨៤៨ គីឡូក្រាម និងសារធាតុគីមីផ្សំប្រមាណ ៥៩៦ ៣៩៩ គីឡូក្រាម រួមទាំងរឹបអូសមធ្យោបាយ សម្ភារៈ និងវត្ថុតាង ទ្រព្យសម្បត្តិ និងបង្កកអចលនទ្រព្យជាច្រើនកន្លែង។ នេះបើរបាយការណ៍នៅក្នុងផែនការស្ដីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ ឆ្នាំ២០២៥៕
© រក្សាសិទ្ធិដោយ thmeythmey.com
Tag:
