.jpg)
.jpg)
ខេត្តបាត់ដំបង នឹងសង់«សួនតេជោសន្តិភាព» នៅខាងកើតស្ទឹងសង្កែ
- ថ្ងៃសៅរ៍ ទី១៥ ខែកុម្ភៈ ឆ្នាំ២០២៥ ម៉ោង ៩:១៩ នាទី ព្រឹក
រូបភាព៖ រដ្ឋបាលខេត្តបាត់ដំបង
ភ្នំពេញ៖ នៅដើមឆ្នាំ២០២៥នេះ ខេត្តបាត់ដំបង នឹងសាងសង់ «សួនតេជោសន្តិភាព» ដែលមានប្រវែង ៩៩៤ម៉ែត្រ នៅខាងកើតស្ទឹងសង្កែ។ បើតាមអាជ្ញាធរខេត្តបាត់ដំបង ទីតាំងនៃសួននេះ គឺនៅចំណុចមុខវត្តកណ្តាល ស្ថិតក្នុងភូមិ រំចេក៤ សង្កាត់រតនៈ ដោយគិតចាប់ពី ស្ពានសម្ដេច ស ខេង ដល់ស្ពានសោហឺ ឬស្ពានថ្មថ្មី ដែលមានផ្ទៃដីសរុប ប្រមាណ ១,៦ម៉ឺនម៉ែត្រការ៉េ។
សេចក្ដីជូនដំណឹងរបស់រដ្ឋបាលខេត្តបាត់ដំបង នាថ្ងៃទី ១៤ កុម្ភៈ បញ្ជាក់ថា ការសាងសង់សួននេះ គឺរំលេចពីគុណតម្លៃនយោបាយឈ្នះ-ឈ្នះ របស់សម្ដេច ហ៊ុន សែន ប្រធាន ព្រឹទ្ធសភា និងជាអតីតនាយករដ្ឋមន្រ្តី ដែលនាំមកនូវសុខសន្តិភាព ស្ថិរភាព ការឯកភាពជាតិ និងការអភិវឌ្ឍ។
សួននេះ នឹងចូលរួមបម្រើប្រយោជន៍សាធារណៈ ដោយនៅក្នុងគម្រោង សួន សាធារណៈ នេះ មានផ្លូវដើរ, ជិះកង់, កន្លែងអង្គុយលំហែ និងហាត់ប្រាណ ដែលជាធាតុផ្សំក្នុងការប្រែក្លាយក្រុងបាត់ដំបង ទៅជាទីក្រុងឆ្លាតវៃ មានបរិស្ថានរស់នៅល្អ និងស៊ីវិល័យ។ នេះជាការបញ្ជាក់របស់រដ្ឋបាលខេត្តបាត់ដំបង៕
© រក្សាសិទ្ធិដោយ thmeythmey.com
Tag:
