.png)
.jpg)
.jpg)
រដ្ឋាភិបាល កំពុងរៀបចំឯកសារមហាសង្ក្រាន្ត ចុះបញ្ជីយូណេស្កូ
- ថ្ងៃសៅរ៍ ទី១៥ ខែកុម្ភៈ ឆ្នាំ២០២៥ ម៉ោង ១០:៣៩ នាទី ព្រឹក
ភ្នំពេញ៖ ក្រសួងវប្បធម៌ និងវិចិត្រសិល្បៈ កំពុងរៀបចំឯកសារមហាសង្ក្រាន្ត ដើម្បីយកទៅចុះបញ្ជីបេតិកភណ្ឌវប្បធម៌អរូបី របស់អង្គការយូណេស្កូ។ ក្រសួងវប្បធម៌ បានរៀបចំសិក្ខាសាលាពិគ្រោះយោបល់លើកទី១ ស្ដីពី“ការប្រមូលធាតុចូលរៀបចំឯកសារមហាសង្រ្កាន្ត ចុះក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ” នៅសណ្ឋានគារសោមាទេវី អង្គររីស្សត ក្នុងខេត្តសៀមរាប កាលពីថ្ងៃទី១៤ កុម្ភៈ ២០២៥។
កិច្ចប្រជុំពិគ្រោះយោបល់នេះ មានការចូលរួមពីលោក ស៊ីយ៉ុន សុភារិទ្ធ អនុរដ្ឋលេខាធិការ តំណាងរដ្ឋមន្រ្តីក្រសួងវប្បធម៌និងវិចិត្រសិល្បៈ, លោក សុខ សប្បាយណា សមាជិកគណៈអចិន្ត្រៃយ៍ គណៈកម្មាធិការកណ្ដាល នៃសហភាពសហព័ន្ធយុវជនកម្ពុជា និងជាប្រធានក្រុមការងារប្រតិបត្តិនៃព្រឹត្តិការណ៍អង្គរសង្រ្កាន្ត, លោក លី សារី អភិបាលរងនៃគណៈអភិបាលខេត្តសៀមរាប, លោក សាន សម្ផស្ស អនុរដ្ឋលេខាធិការក្រសួងធម្មការនិងសាសនា និងតំណាងក្រសួង-ស្ថាប័ន អង្គការ សមាគម ព្រមទាំងតំណាងចាស់ព្រឹទ្ធាមកពីសហគមន៍ នានាចំនួន១៣០នាក់។
ចុះក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ” នៅខេត្តសៀមរាប កាលពីថ្ងៃទី១៤ កុម្ភៈ ២០២៥។ រូបពីហ្វេសប៊ុកក្រសួងវប្បធម៌។
សង្ក្រាន្ត ចេញពីភាសាសំស្ក្រឹត «សង្ក្រាន្តិ»។ បើតាមការពន្យល់ក្នុងវចនានុក្រមសម្តេចព្រះសង្ឃរាជ ជួន ណាត សង្ក្រាន្ត មានន័យថា ជាដំណើរឃ្លាតចាកទី; ការឈានចូលដល់; ដំណើរដែលព្រះអាទិត្យចរចូលដល់ទីចួបមួយជុំរាសិចក្រ គឺដំណើរដែលដើមនិងចុងនៃរាសិចក្រចួបគ្នា ពេញគ្រប់ជាមួយឆ្នាំ (ដំណើរដាច់ឆ្នាំចាស់ផ្លាស់ឆ្នាំថ្មី)។
ក្នុងពិធីចូលឆ្នាំថ្មី សង្ក្រាន្តមានបីថ្ងៃគឺថ្ងៃទី ១ ជាថ្ងៃចូលឆ្នាំ, ថ្ងៃទី២ ជា ពារកណ្ដាល ឬហៅថា វ័នបត (ថ្ងៃខ្វាក់), ថ្ងៃទី ៣ ជា ពារឡើងស័ក គឺផ្លាស់ស័កថ្មីនៅថ្ងៃនេះឯង : ថ្ងៃសង្ក្រាន្ត, ពិធីសង្ក្រាន្ត ។ ត្រស្តិសង្ក្រាន្ត ពិធីត្រស្តិនិងសង្ក្រាន្តដែលក្សត្រិយ៍ពីបុរាណរួមគ្នាក្នុងកាលតែមួយ ។
នៅឡាវ និងថៃ ពាក្យ «សង្ក្រាន្ត» ត្រូវបានប្រើជំនួសថា ជាពិធីចូលឆ្នាំថ្មី។ ក្រៅពីភាសាកំណើតថា Pii Mai ជនជាតិឡាវហៅការប្រារព្ធឆ្នាំថ្មីរបស់ខ្លួនថា Songkran។ រីឯក្នុងភាសាថៃវិញ គេនិយមហៅ «សុងក្រាន» (សង្ក្រាន្ត) តែម្តង៕
© រក្សាសិទ្ធិដោយ thmeythmey.com
Tag:
