.png)
.jpg)
.jpg)
បណ្ណាល័យសាស្ត្រាស្លឹករឹតធំជាងគេនឹងត្រូវសម្ពោធក្រោមព្រះរាជវត្តមាននៃព្រះមហាក្សត្រ
- ថ្ងៃសៅរ៍ ទី១៥ ខែកុម្ភៈ ឆ្នាំ២០២៥ ម៉ោង ៤:៥៧ នាទី រសៀល
លោក ឡេង កុកអាន ប្រធានផ្នែកអភិរក្សសាស្ត្រាស្លឹករឹតនៃវិទ្យាស្ថានស្រាវជ្រាវ និងអភិរក្សសាស្ត្រាស្លឹករឹតខ្មែរ
នៅថ្ងៃចន្ទទី១៧ខែកុម្ភៈឆ្នាំ២០២៥នេះ ព្រះករុណា ព្រះបាទព្រះបរមនាថ នរោត្តម សីហមុនី នឹងយាង ជាព្រះរាជអធិបតីភាពសម្ពោធបណ្ណាល័យព្រះវនរ័ត កែន វង្ស ដែលជាទីតាំងរក្សាអភិរក្សសាស្ត្រាស្លឹករឹតដ៏ធំជាងគេនៅក្នុងប្រទេសកម្ពុជា។ បណ្ណាល័យព្រះវនរ័ត កែន វង្ស ស្ថិតនៅក្នុងអគារនៃវិទ្យាស្ថានស្រាវជ្រាវ និងអភិរក្សសាស្ត្រាស្លឹករឹតខ្មែរ (Fonds pour l’édition des Manuscrits du Cambodge)។ វិទ្យាស្ថាននេះដែលជាកម្មវិធីមួយរបស់សាលាបារាំងចុងបូព៌ាប្រទេស (EFEO) មានទីតាំងនៅក្នុងវត្តឧណ្ណាលោម។
លោកសាស្ត្រាចារ្យ អូលីវីយេ ដឺ ប៊ែរណុង (Oliver de BERNON) ដែលជាអ្នកគ្រប់គ្រងវិទ្យាស្ថានស្រាវជ្រាវ និងអភិរក្សសាស្ត្រាស្លឹករឹតខ្មែរបានវាយតម្លៃថា៖«ព្រះរាជវត្តមានរបស់ព្រះករុណា ព្រះមហាក្សត្រនៅក្នុងពិធីសម្ពោធបណ្ណាល័យព្រះវររ័ត កែន វង្ស បង្ហាញពីព្រះរាជហឬទ័យយកចិត្តទុកដាក់បំផុតរបស់ព្រះអង្គចំពោះកិច្ចការអភិរក្ស ការការពារ និងការសិក្សាស្រាវជ្រាវសម្បត្តិបេតិកភណ្ឌខ្មែរ។»។ លោកសាស្ត្រាចារ្យរបស់សាលាបារាំងចុងបូព៌ាប្រទេសក៏បានកត់សម្គាល់ផងដែរថា ព្រះរាជអធិបតីភាពរបស់អង្គព្រះមហាក្សត្រនៅក្នុងពិធីសម្ពោធបណ្ណាល័យស្លឹករឹតនោះ ក៏ជាការប្រទានតម្លៃដ៏ខ្ពង់ខ្ពស់បំផុតដល់បេសកកម្មរបស់សាលាបារាំងចុងបូព៌ាប្រទេសផងដែរ។
បណ្ណាល័យសាស្ត្រាស្លឹករឹតនឹងបើកទទួលតែអ្នកស្រាវជ្រាវតែប៉ុណ្ណោះ គឺពុំមែនសម្រាប់សាធារណជនទូទៅឡើយ។
មានសាស្ត្រាស្លឹករឹតប្រមាណ៩០០០ខ្សែដែលត្រូវបានប្រមូល និងរក្សាទុកនៅក្នុងបណ្ណាល័យព្រះវនរ័ត កែន វង្ស។ ការប្រមូល និងអភិរក្សសាស្ត្រាស្លឹករឹត គឺជាកិច្ចការងារបន្តពីព្រះវនរ័ត្ន កែន វង្ស អតីតចៅអធិការវត្តសារាវ័នដែលជាអ្នកស្រឡាញ់ និងប្រមូលសាស្ត្រាស្លឹករឹតរក្សាទុកនៅក្នុងវត្តសារាវ័នតាំងពីឆ្នាំ១៩៧៩។ នេះជាមូលហេតុដែលបណ្ណាល័យសាស្ត្រាស្លឹករឹតត្រូវបានដាក់ឈ្មោះជាបណ្ណាល័យព្រះវនរ័ត កែន វង្ស។
ក្នុងឆ្នាំ១៩៩០ សាលាបារាំងចុងបូព៌ាប្រទេសបានបង្កើតវិទ្យាស្ថានអភិរក្សសាស្ត្រាស្លឹករឹត ហើយបានជ្រើសរើសតែងតាំងលោកសាស្ត្រាចារ្យ អូលីវីយេ ដឺ ប៊ែរណុង (Olivier de BERNON) ជាអ្នកគ្រប់គ្រងវិទ្យាស្ថាន។ លោកសាស្ត្រាចារ្យ អូលីវីយេ បានធ្វើកិច្ចការប្រមូល និងរក្សាសាស្ត្រាស្លឹករឹតទាំងនេះជាមួយនឹងសហការីខ្មែររបស់លោកម្នាក់ គឺលោក ឡេង កុកអាន ដែលសព្វថ្ងៃគឺជាប្រធានផ្នែកអភិរក្សសាស្ត្រាស្លឹករឹតនៃវិទ្យាស្ថាន។
ទើបតែនៅក្នុងឆ្នាំ ២០២១ វិទ្យាស្ថានបានបង្កើនការប្រមូលសាស្ត្រាស្លឹករឹតពីតាមបណ្ដាវត្តអារាមនានានៅក្នុងប្រទេសកម្ពុជា ជាពិសេសពីវត្តមួយចំនួននៅក្នុងខេត្តកំពង់ចាម ទើបធ្វើឱ្យចំនួនសាស្ត្រាស្លឹករឹតកើនឡើង។ បន្ទាប់មក ដោយមានសមានចិត្តស្រឡាញ់ និងគាំទ្រការអភិរក្សសាស្ត្រាស្លឹករឹតខ្មែរ លោកស្រី ខៀវ ស៊ីណា ដែលជាភរិយាលោកអតីតទេសាភិបាល ជា ចាន់តូ បានឧបត្ថម្ភការជួសជុលអគារវិទ្យាស្ថានស្រាវជ្រាវ និងអភិរក្សសាស្ត្រាស្លឹករឹតខ្មែរឡើងវិញដើម្បីរៀបចំបណ្ណាល័យផង។
លោក ឡេង កុកអាន ប្រធានផ្នែកអភិរក្ស សាស្ត្រាស្លឹករឹតនៃវិទ្យាស្ថានស្រាវជ្រាវ និងអភិរក្សសាស្ត្រាស្លឹករឹតខ្មែរគឺជាមនុស្សចម្បងម្នាក់ដែលបានបំពេញការងារច្រើនទាក់ទងនឹងការប្រមូលសាស្ត្រាស្លឹករឹតបន្ថែមជាច្រើនពីវត្តអារាមនានានៅក្នុងប្រទេសកម្ពុជា។
លោក កុកអាន បានរៀបរាប់ប្រាប់សារព័ត៌មានថ្មីៗនៅក្នុងបណ្ណាល័យយ៉ាងដូច្នេះថា លោកមានមោទនភាពដែលលោកបានចូលរួមចំណែកក្នុងការងារអភិរក្សសាស្ត្រាស្លឹករឹតខ្មែរ ដែលជាកម្រងក្បូនច្បាប់ ប្រវត្តិប្រពៃណីរបស់ខ្មែរ៕
© រក្សាសិទ្ធិដោយ thmeythmey.com
