.jpg)
.jpg)
តើ ពុធ សំបូរ អាចបំបែកកំណត់ត្រារបស់ ជ័យ កុសល និង បឺត សង្ឃឹម នៅទឹកដីអូស្ដ្រាលីទេ?
- ថ្ងៃចន្ទ ទី១៧ ខែកុម្ភៈ ឆ្នាំ២០២៥ ម៉ោង ៩:២៩ នាទី ព្រឹក
រូបពី លោក ស្រ៊ឺ ស្រេង
កីឡាករ-កីឡាការិនី២រូប នឹងត្រូវទៅប្រកួតដណ្ដើមខ្សែក្រវ៉ាត់ WBC នៅទឹកដីអូស្ដ្រាលី នាថ្ងៃទី២២ កុម្ភៈ។ កីឡាករគុនខ្មែរ បានបរាជ័យក្នុងការដណ្ដើមខ្សែក្រវ៉ាត់នេះ ចំនួន២លើករួចមកហើយ។
ប្រធានសមាគមប្រដាល់ឃីគបុកស៊ីងប្រចាំនៅកម្ពុជា (ISKA) និងជាផលិតករគុនខ្មែរ លោក ស្រ៊ឺ ស្រេង នឹងដឹកនាំកីឡាករ ពុធ សំបូរ និងកីឡាការិនី សំ ថារ័ត្ន ទៅប្រកួតនៅប្រទេសអូស្ដ្រាលី លើសង្វៀន WBC។ កីឡាករ ពុធ សំបូរ ត្រូវប្រកួតដណ្ដើមខ្សែក្រវ៉ាត់ ជាមួយ Wanchaloem របស់ថៃ ខណៈ សំ ថារ័ត្ន ត្រូវប្រកួតជាមួយ Jane Koo កីឡាការិនីកូនកាត់អូស្ដ្រាលីកូរ៉េ លក្ខណៈមិត្តភាពអូស្ដ្រាលី-កម្ពុជា។
លោក ស្រ៊ឺ ស្រេង បានប្រាប់សារព័ត៌មានឌីជីថលថ្មីៗ តាមតេឡេក្រាមថា កាលពីឆ្នាំ២០០៨ កីឡាករ ជ័យ កុសល បានបរាជ័យ ក្នុងការដណ្ដើមខ្សែក្រវ៉ាត់ WBC នៅទឹកដីអូស្ដ្រាលីម្ដងរួចមកហើយ ។ ចូលមកឆ្នាំ២០២៤ ក្រោមការដឹកនាំទៅប្រកួតរបស់ផលិតកររូបនេះ កីឡាករ បឺត សង្ឃឹម ក៏បរាជ័យម្ដងទៀត។ លោក ស្រ៊ឺ ស្រេង នៅតែរំពឹងខ្ពស់ចំពោះកីឡាករគុនខ្មែរ ថានឹងអាចដណ្ដើមខ្សែក្រវ៉ាត់អន្ដរជាតិនេះ មកប្រទេសវិញ។
ប្រធាន ISKA រូបនេះ មានសុទិដ្ឋិនិយមថា ការទៅប្រកួតនេះ គឺជាការផ្សព្វផ្សាយគុនខ្មែរទៅកាន់អន្ដរជាតិ។ «បើខ្ញុំគ្មានសង្ឃឹមជាមួយកីឡាករ ខ្ញុំនឹងមិនដឹកនាំទៅទេ។ ការផ្សព្វផ្សាយគុនខ្មែរនៅក្រៅប្រទេស ទោះជាយើងចេញក្រៅបានច្រើនយ៉ាងណាក៏ដោយ ក៏យើងមិនទាន់ ត្រូវនឹងតម្រូវការរបស់គេដែរ។ នោះ បានន័យថានៅមានប្រទេសខ្លះ មិនទាន់ស្គាល់យើងដែរ។ យើង ត្រូវតែប្រឹងប្រឡូកសិន។ យើង ត្រូវប្រឡូកដើម្បីឲ្យគេចាប់ផ្ដើមស្គាល់យើង។ ឥឡូវនេះ យើងទៅវាយដោយជ្រកក្រោមកម្មវិធីរបស់គេ ថ្ងៃក្រោយយើងនឹងបង្កើតកម្មវិធីដោយខ្លួនឯង»។ ផលិតកររូបនេះ បាននិយាយដូច្នេះ៕
© រក្សាសិទ្ធិដោយ thmeythmey.com
Tag:
