.png)
ស្នងការខេត្តកំពង់ធំ៖ ការហៅពលរដ្ឋដែលសួររឿងសៀវភៅគ្រួសារ មកធ្វើកិច្ចសន្យា ជាកំហុសរបស់សមត្ថកិច្ច
- ថ្ងៃអាទិត្យ ទី២៣ ខែកុម្ភៈ ឆ្នាំ២០២៥ ម៉ោង ៥:៤០ នាទី ល្ងាច
ស្នងការដ្ឋាននគរបាលខេត្តកំពង់ធំ។ រូបភាព៖ ស្នងការដ្ឋាននគរបាលខេត្តកំពង់ធំ
អ្នកនាំពាក្យស្នងការនគរបាលខេត្តកំពង់ធំ បានចាត់ទុក ការហៅពលរដ្ឋម្នាក់ ឱ្យធ្វើកិច្ចសន្យា ព្រោះបានសួរនាំរឿងរយៈពេលធ្វើសៀវភៅគ្រួសារ និងសៀវភៅស្នាក់នៅ គឺជាទង្វើខុសឆ្គងរបស់សមត្ថកិច្ច ចំពោះពលរដ្ឋ។
អ្នកនាំពាក្យ ស្នងការនគរបាលខេត្តកំពង់ធំ ក៏បានសុំឱ្យពលរដ្ឋអធ្យាស្រ័យចំពោះទង្វើធ្វេសប្រហែសរបស់អធិការស្រុកសណ្តាន់នេះផងដែរ។ តាមរយៈទំព័រហ្វេសប៊ុករបស់ស្នងការដ្ឋាននគរបាលខេត្តកំពង់ធំ អ្នកនាំពាក្យ បានសរសេរដូច្នេះ៖ «ក្នុងនាមអ្នកនាំពាក្យ ស្នងការដ្ឋាននគរបាលខេត្តកំពង់ធំ សុំការអធ្យាស្រ័យ និងកែតម្រូវឡើងវិញ នូវការធ្វេសប្រហែស របស់អធិការដ្ឋាននគរបាលស្រុកសណ្តាន់ ដែលបានអញ្ជើញឈ្មោះ(អ្នកខមមិន)មកធ្វើកិច្ចសន្យា។»។
អ្នកនាំពាក្យស្នងការខេត្តកំពង់ធំ ក៏បានកែតម្រូវករណីនេះ មិនមែនជាការធ្វើកិច្ចសន្យាទេ តែជាការបំភ្លឺ ពាក់ព័ន្ធនឹងការខ្វះឯកសារ របស់បុគ្គល(ពលរដ្ឋដែលខមមិន)នេះវិញ។
សូមរំឭកថា អធិការស្រុកសណ្ដាន់ បានហៅពលរដ្ឋម្នាក់មកធ្វើកិច្ចសន្យាសុំទោស មិនឱ្យ បញ្ចេញមតិ លើទំព័រហ្វេសប៊ុកស្នងការខេត្តទៀត បន្ទាប់ពីរូបគេ បានបញ្ចេញមតិក្នុងទំព័រហ្វេសប៊ុក ស្នងការនគរបាលខេត្តកំពង់ធំ សួរនាំពីរយៈពេលនៃការធ្វើសៀវភៅគ្រួសារ និងសៀវភៅស្នាក់នៅ ដ្បិតអីរូបគេ មិនទាន់ទទួលបានឯកសារទាំងនេះ ដែលបានទៅធ្វើតាំងពីខែវិច្ឆិកា ឆ្នាំ២០២៤មកម្ល៉េះ។ នៅក្នុងកិច្ចសន្យានោះ អាជ្ញាធរស្រុកសណ្តាន់ ក៏បានបំភ្លឺដែរថា ការយឺតយ៉ាវនៃសៀវភៅគ្រួសារ និងសៀវភៅស្នាក់នៅនេះ មកពីពលរដ្ឋរូបនោះខ្វះឯកសារ គឺសំបុត្រអាពាហ៍ពិពាហ៍។
ទោះយ៉ាងណា ការហៅពលរដ្ឋមកធ្វើកិច្ចសន្យាបែបនេះ បានរងការរិះគន់ យ៉ាងពីពលរដ្ឋ ពិសេសអ្នកប្រើប្រាស់បណ្តាញសង្គម៕
© រក្សាសិទ្ធិដោយ thmeythmey.com
Tag:
