.png)
.png)
.jpg)
.jpg)
ឡៅ ស៊ីណាត៖ មានតែការប្រឹងហ្វឹកហាត់ទេ ទើបអាចឲ្យ ឡៅ ចន្ទ្រា ត្រឡប់ទៅដូចដើមវិញ
- ថ្ងៃចន្ទ ទី២៤ ខែកុម្ភៈ ឆ្នាំ២០២៥ ម៉ោង ៤:២៩ នាទី រសៀល
ឡៅ ស៊ីណាត៖ កីឡាករ ឡៅ ចន្ទ្រា មិនទាន់មានសមត្ថភាពខ្លាំងដូចពីមុនទេ
លោក ឡៅ ស៊ីណាត អតីតកីឡាករប្រដាល់គុនខ្មែរ និងជាគ្រូជំនួយ ក្នុងបញ្ជាការដ្ឋានទ័ព ពិសេស បានលើកឡើងថា កីឡាករ ឡៅ ចន្ទ្រា ត្រូវការការហ្វឹកហាត់ឱ្យខ្លាំង ដើម្បីឲ្យសមត្ថភាពខ្លាំងដូចដើម និងដើម្បីស្ដារប្រជាប្រិយភាពឡើងវិញ។ លោក ឡៅ ស៊ីណាត លើកឡើងដូច្នេះ ដោយសារតែឃើញពីទម្រង់វាយរបស់ ឡៅ ចន្ទ្រា ជាមួយ សៃ យុគ គឺមិនបាន៥០ភាគរយ នៃសមត្ថភាពរបស់កីឡាកររូបនេះពីមុននោះទេ។
ឡៅ ចន្ទ្រា បានប្រកួតឈ្នះ សៃ យុគ ដោយពិន្ទុ ក្នុងការដណ្ដើមខ្សែក្រវាត់គុនខ្មែរ លើប្រភេទទម្ងន់ ៧៨គីឡូក្រាម កាលពីថ្ងៃទី២៣ កុម្ភៈ ឆ្នាំ២០២៥ នៅស្រុកបាទី ខេត្តតាកែវ។ តាមរយៈការប្រកួតនេះ គេឃើញថា ឡៅ ចន្ទ្រា បង្ហាញសមត្ថភាពល្អជាងការប្រកួតមុនៗ ដោយសារការវាយលឿន និងមានភាពបត់បែន ជាមួយដៃគូប្រកួត។ ទោះជា សៃ យុគ មានអាយុ ៣៨ឆ្នាំ ដែលជាវ័យជ្រេបន្ដិច ហើយច្រើនជាង ឡៅ ចន្ទ្រា ដល់ទៅ៨ឆ្នាំ ប៉ុន្ដែសមត្ថភាពកីឡាករថៃរូបនេះ នៅតែខ្លាំង។ ឆ្លងកាត់ការប្រកួតនេះ ឡៅ ចន្ទ្រា នៅតែមិនទាន់អាចស្ដារប្រជាប្រិយភាពខ្លួន បានដូចដើម។
ដោយឡែក លោក ឡៅ ស៊ីណាត សង្កេតឃើញថា សមត្ថភាពរបស់ ចន្ទ្រា មិនទាន់បាន៥០ភាគរយ នៃសមត្ថភាពដើមទេ ដោយសារតែកម្លាំងស្ទុះ និងការវាយមិនទាន់រហ័ស។ គ្រូជំនួយរូបនេះ យល់ថា កីឡាករកម្ពុជាវ័យ ៣០ឆ្នាំរូបនេះ ត្រូវប្រឹងហ្វឹកហាត់បន្ថែមទៀត ដើម្បីឲ្យសមត្ថភាពដូចដើម។
គ្រូជំនួយរូបនេះ បាននិយាយថា៖«ទម្រង់វាយរបស់ ឡៅ ចន្ទ្រា ឃើញថាត្រឡប់មកវិញបានខ្លះហើយ ប៉ុន្ដែមិនទាន់បាន៥០ភាគរយទេ ដូចពីទម្រង់គាត់កាលពីមុនទេ។ ខ្ញុំឃើញគាត់ធ្វើបានល្អជាងវគ្គមុនៗ ដែលអំឡុងពេលគេរិះគន់ថាធ្លាក់ៗ តែឥឡូវ ឃើញថាអាចយោងបាន។ គាត់ ត្រូវព្យាយាមហ្វឹកហាត់ ដើម្បីឲ្យស្រកគីឡូ ហើយសមត្ថភាពដូចមុន ហើយល្បឿនវាយចេញល្អ។ បើគាត់ប្រឹងបន្ថែមទៀត អាចមកវិញ បាន៨០ភាគរយអី។»។
លោក ឡៅ ស៊ី ណាត បានបន្ថែមទៀតថា មុនពេលត្រៀមប្រកួតជាមួយ សៃ យុគ ហើយកាលពីមួយរយៈមុន ឡៅ ចន្ទ្រា ធ្លាក់ទម្រង់ប្រកួត និងសមត្ថភាពខ្លាំង ដែលក្នុងនោះ ធ្លាក់ទាំងកម្លាំងស្ទុះ ការវាយចេញយឺត ហើយថែមទាំងឡើងគីឡូ។
គ្រូជំនួយរូបនេះ បញ្ជាក់ថាការធ្លាក់នេះ គឺព្រោះកីឡាកររូបនេះ កើតជំងឺបាក់ទឹកចិត្ត ដោយសារការរិះគន់ពីអ្នកគាំទ្រ រួមផ្សំជាមួយនឹងការហាត់មិនបានជាប់លាប់។ លោក ឡៅ ស៊ី ណាត បញ្ជាក់ដូច្នេះ៖«គាត់ធ្លាក់នេះ ធ្លាក់ទាំងអស់។ គាត់ធ្លាក់ទាំងស្ទុះ ធ្លាក់ទាំងកម្លាំង ធ្លាក់ការវាយចេញ។ ហើយរាងកាយគាត់ ក៏ឡើងគីឡូធំ។ ធម្មតារបស់កីឡា ប្រសិនជា យើងហាត់ស្ទើរ គាត់ធ្លាក់ការព្យាយាមហ្វឹកហាត់ផង ហើយគាត់បាក់ទឹកចិត្ត ដោយសារការរិះគន់របស់អ្នកគាំទ្រ។»។
គួរបញ្ជាក់ផងដែរ ឡៅ ចន្ទ្រា បច្ចុប្បន្ន មានអាយុ ៣០ឆ្នាំ បានឡើងប្រកួតសរុប ១៥១ដង ក្នុងនោះឈ្នះ ១១១ ប្រកួត ស្មើ២០ និងចាញ់ ២០ប្រកួត៕
© រក្សាសិទ្ធិដោយ thmeythmey.com
Tag:
.gif)