.jpg)
.jpg)
ស្រ្តី ចូលរួមយ៉ាងសកម្ម ក្នុងកិច្ចការពារសម្បត្តិធម្មជាតិ នៅសហគមន៍ការពារធម្មជាតិសំបូរ អភិវឌ្ឍន៍ ខេត្តព្រះវិហារ
- ថ្ងៃអង្គារ ទី២៥ ខែកុម្ភៈ ឆ្នាំ២០២៥ ម៉ោង ១០:៥៩ នាទី ព្រឹក
ព្រះវិហារ៖ ស្រ្តីជាច្រើន នៅសហគមន៍ពារធម្មជាតិសំបូរអភិវឌ្ឍន៍ ស្ថិតក្នុងភូមិសំបូរ ឃុំស្រយ៉ង់ ស្រុកគូលែន ខេត្តព្រៃវិហារ កំពុងចូលរួមយ៉ាងសស្រាក់សស្រាំ ក្នុងការងារអភិរក្ស ធនធានធម្មជាតិរបស់ពួកគេ។ ទោះបីធ្លាប់រងការគំកំហែងពីជនខិលខូចមួយចំនួនក៏ដោយ ប៉ុន្តែស្ត្រីទាំងនោះ នៅតែមោះមុត និងបន្តលះបង់ពេលវេលា និងសូម្បីតែថវិកាផ្ទាល់ខ្លួន សម្រាប់ការចេញល្បាត សំដៅទប់ស្កាត់បទល្មើសធនធានធម្មជាតិ។
អ្នកស្រី ប៊ូច នុត សមាជិក និងជាបេឡាករនៃសហគមន៍តំបន់ការពារធម្មជាតិសំបូរអភិវឌ្ឍន៍ បានប្រាប់សារព័ត៌មានឌីជីថលថ្មីៗថា ការតាំងចិត្តឥតខ្លាចរអា របស់ស្ត្រីនៅក្នុងសហគមន៍ក្នុងកិច្ចការអភិរក្សនេះ ក៏ដោយសារសហគមន៍ ចង់រក្សាព្រៃឈើ សត្វព្រៃ និងជីវៈចម្រុះនានា សម្រាប់ទាញយកអនុផលព្រៃឈើ ដូចជា រកផ្សិត ស្លឹកប្រិច និងជ័រឈើ ជាពិសេស ទុកជាមរតកសម្រាប់មនុស្សជំនាន់ក្រោយ។ ម្យ៉ាងទៀត ការកោតសរសើរពីក្រសួងបរិស្ថាន និងការលើកទឹកចិត្តផ្នែកថវិកាពីអង្គការដៃគូនានា រឹតតែជំរុញឱ្យប្រជាសហគមន៍ កាន់តែសកម្ម ក្នុងការងារការពារធនធានធម្មជាតិ របស់ខ្លួន។ អ្នកស្រី ប៊ូច នុត បន្ថែមដូច្នេះ។
សូមអញ្ជើញលោកអ្នកនាងទស្សនាកិច្ចសម្ភាសខាងក្រោមនេះ៖
សហគមន៍តំបន់ការពារធម្មជាតិសំបូរអភិវឌ្ឍន៍ បង្កើតឡើងនៅថ្ងៃទី ២៨ ខែមីនា ឆ្នាំ២០១២ លើផ្ទៃដីចំនួន ១ ០៧១ហិកតា និងមានពលរដ្ឋរស់នៅ ១៧២គ្រួសារ។ ការងារសំខាន់ៗរបស់សហគមន៍គឺ ផ្ដោតទៅលើកិច្ចការងារអភិរក្ស និងប្រើប្រាស់ធនធានធម្មជាតិប្រកបដោយនិរន្តរភាពដើម្បីជួយជាចំណែកលើកកម្ពស់ ជីវភាពរបស់ប្រពលរដ្ឋក្នុងតំបន់។
ក្រៅពីអភិរក្ស សហគមន៍ដាច់ស្រយាលមួយនេះ ក៏បានដាំកូនឈើជាច្រើនប្រភេទ ដូចជា ក្រញូង ធ្នង់ និងត្រសេក នៅលើផ្ទៃដីជាង៦០ហិកតា បន្ថែមទៀតដែរ ដើម្បីស្តារឡើងវិញតំបន់ព្រៃរិចរិល បង្កើនជីវចម្រុះ និងរួមចំណែកប្រយុទ្ធប្រឆាំងនឹងការប្រែប្រួលអាកាសធាតុជាសកល។
ដោយឡែក ក្រោមជំនួយគាំទ្រពីគម្រោង INRM នៅចុងឆ្នាំ២០២៤កន្លងទៅ សហគមន៍ បានដាំកូនឈើចំនួន ៣ ០០០ដើម លើផ្ទៃដី ៣ហិកតា និងគ្រោងដាំកូនឈើបន្ថែម នៅឆ្នាំ២០២៥ ជាង ២ ០០០ដើម លើផ្ទៃដីជាង២ហិកតាទៀត៕
© រក្សាសិទ្ធិដោយ thmeythmey.com
Tag:
.gif)