.png)
.png)
.jpg)
.jpg)
ស្ត្រីទីមួយស្នើសិល្បករ អ្នកច្នៃម៉ូត និងអ្នកសម្អាងឱ្យគិតគូរខ្ពស់ដល់ទម្រង់ដើមនៃសម្លៀកបំពាក់
- ថ្ងៃពុធ ទី២៦ ខែកុម្ភៈ ឆ្នាំ២០២៥ ម៉ោង ៧:៥៩ នាទី ល្ងាច
លោកស្រី ពេជ ច័ន្ទមុនី បានផ្តល់យោបល់ដល់សិល្បករ អ្នកច្នៃម៉ូត និងអ្នកសម្អាងការទាំងអស់ ពិនិត្យឱ្យបានល្អិតល្អន់នូវការច្នៃប្រឌិតថ្មី ដើម្បីកុំឱ្យប្រាសចាកខ្លាំងពេកពីលំនាំដើមនៃសម្លៀកបំពាក់ខ្មែរ។ ស្ត្រីទីមួយ បានលើកឡើងពីចំណុចនេះ នាពិធីរាត្រីសមោសរសំពត់បត់ខ្មែរ លើកទី២ ដែលរៀបចំដោយក្រសួងវប្បធម៌ និងវិចិត្រសិល្បៈនៅសាលសន្និសីទចមុតមុខ កាលពីថ្ងៃទី២៤ ខែកុម្ភៈ។
«កុំតម្រូវខ្លាំងជ្រុលតាមតម្រូវការរបស់ទីផ្សារ ដែលនឹងនាំឱ្យប៉ះពាល់ដល់ទម្រង់ដើមនៃសម្លៀកបំពាក់យើង»។ ភរិយាប្រមុខរដ្ឋាភិបាល បានស្នើបែបនេះទៅកាន់សិល្បករ អ្នកច្នៃម៉ូត និងអ្នកសម្អាងការ។ទោះបីជាយ៉ាងណាក៏ដោយ លោកស្រីមិនហាមឃាត់ការច្នៃម៉ូតថ្មីនោះឡើយ ប៉ុន្តែរាល់ការច្នៃម៉ូតថ្មីទាំងអស់ ត្រូវគិតគូទៅតាមទម្រង់ ទៅតាមសម័យកាល ទៅតាមខ្នាត ទៅតាមអត្តសញ្ញាណ ភាពលម្អិតនៃការដេរប៉ាក់ក្បាច់ក្បូរ ស្បៃ ផាហ៊ុម ហើយនឹងប្រភេទដែលប្រើប្រាស់ ក៏ដូចជាតម្បាញសម្រាប់ការគោរពបូជាព្រះពុទ្ធសាសនាផងដែរ។
បើតាមលោកស្រី ពេជ ច័ន្ទមុនី ហ៊ុន ម៉ាណែត ការគោរពបានលក្ខណៈដើមនៃសម្លៀកបំពាក់ខ្មែរ គឺជាការចូលរួមដ៏សំខាន់ដល់កិច្ចការអភិរក្សអត្តសញ្ញាណខ្មែរ តាមរយៈសម្លៀកបំពាក់ដែលដូនតា បានបង្កើតតាមទស្សនៈយកធម្មជាតិ មកធ្វើជាក្រណាត់ ជាមួយនឹងក្បាច់រចនា ហើយយកក្រណាត់ដែលមានក្បាច់រចនាមកគ្របដណ្តប់លម្អរាងកាយ។
លោកស្រីបានគូសបញ្ជាក់ថា៖ «ក្នុងនាមយើងទាំងអស់ជាជនជាតិខ្មែរ យើងមិនចង់ឱ្យកូនចៅរបស់យើងជំនាន់ក្រោយ ក្លាយទៅជាជនជាតិដែលគ្មានវប្បធម៌ គ្មានប្រពៃណី ហើយនិងគ្មានសម្លៀកបំពាក់ប្រចាំជាតិសាសន៍របស់ខ្លួនឯងនោះទេ»។
ជាមួយគ្នានេះ ស្ត្រីទីមួយ បានអំពាវនាវដល់ពលរដ្ឋ ជាពិសេសយុវជន ឱ្យបន្តចូលរួមស្វែងយល់ ប្រើប្រាស់ និងផ្សព្វផ្សាយនូវសម្លៀកបំពាក់ប្រពៃណី ដែលជាសម្បត្តិបេតិកភណ្ឌអរូបី បង្កប់នូវរូបភាពច្រើនម៉ូត ច្រើនទម្រង់ ក្បាច់រចនាប្រណីត ចម្រុះពណ៌ សមរម្យថ្លៃថ្នូរ សុភាព ទន់ភ្លន់ ស្រស់ស្អាត និងលើកទម្រង់ និងលើកសម្រស់។
«រាត្រីសមោរសំពត់បត់ខ្មែរលើកទី២» ក៏ជាការរៀបចំដើម្បីរំលឹកចងចាំទៅដល់ថ្ងៃដែលសម្តេច ហ៊ុន សែន អតីតនាយករដ្ឋមន្ត្រី និងសម្តេច ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានវិលត្រឡប់មករួមរស់នៅជួបជុំគ្នា ក្រោយថ្ងៃរំដោះ ៧មករា នៅរាជធានីភ្នំពេញ ផងដែរ។
ក្រៅពីការដើរម៉ូត និងទស្សនីយភាពសិល្បៈនានា កម្មវិធីនេះ ក៏មានការចាក់វីដេអូឯកសារ និងការបង្ហាញម៉ូតសម្លៀកបំពាក់អាពាហ៍ពិពាហ៍ ចាប់តាំងពីដើមសម័យឧដុង្គ ដល់សម័យកាលបច្ចុប្បន្ន។ កម្មវិធីលើកទី១ បានប្រព្រឹត្តកាលពីដើមឆ្នាំ២០២៤ ក្រោមអធីបតភាពសម្តេច ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ៕
© រក្សាសិទ្ធិដោយ thmeythmey.com
Tag:
