.png)
.png)
.jpg)
.jpg)
គ្រូជាប់កិច្ចសន្យា នឹងមានឱកាសក្លាយជាគ្រូក្របខណ្ឌ នៅពេលបំពេញគ្រប់លក្ខខណ្ឌ
- ថ្ងៃព្រហស្បតិ៍ ទី២៧ ខែកុម្ភៈ ឆ្នាំ២០២៥ ម៉ោង ៤:០៨ នាទី រសៀល
សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា។ រូបភាពពីMoEYS
ភ្នំពេញ៖ គ្រូជាប់កិច្ចសន្យានៅថ្នាក់បឋមសិក្សា នឹងមានឱកាសក្លាយជាគ្រូក្របខណ្ឌ ក្រោយបំពេញលក្ខខណ្ឌគ្រប់គ្រាន់។ សម្ដេច ហ៊ុន ម៉ាណែត បានបញ្ជាឱ្យក្រសួងអប់រំ និងក្រសួងមុខងារសាធារណៈ គិតគូរលើលក្ខខណ្ឌ បញ្ចូលគ្រូបឋមជាប់កិច្ចសន្យា ទៅជាគ្រូក្របខណ្ឌ។
ក្នុងពិធីបិទសន្និបាត បូកសរុបការងារអប់រំ នៅថ្ងៃទី២៦ ខែកុម្ភៈ សម្ដេច នាយករដ្ឋម បានបញ្ជាឱ្យក្រសួងអប់រំ សហការជាមួយក្រសួងមុខងារសាធារណៈដើម្បីពិនិត្យលទ្ធភាពផ្ដល់ក្របខណ្ឌដល់គ្រូបឋមសិក្សាជាប់កិច្ចសន្យា ជាមួយលក្ខខណ្ឌដែលត្រូវកំណត់។
ជានាយករដ្ឋមន្រ្តីក្នុងនីតិកាលទី៧ សម្ដេច ហ៊ុន ម៉ាណែត តែងចុះតាមសាលារៀន ដើម្បីពិនិត្យមើលការបង្រៀន និងរៀនរបស់សិស្ស។ ក្នុងដំណើរចុះពិនិត្យសម្ដេច ហ៊ុន ម៉ាណែត បានឃើញពីសកម្មភាពបង្រៀនរបស់គ្រូជាប់កិច្ចសន្យា ដែលមិនទាន់ក្លាយជាគ្រូក្របខណ្ឌ។ ចំពោះបញ្ហានេះ ប្រមុខរាជរដ្ឋាភិបាល បានជំរុញឱ្យមានការគិតគូរ ដល់គ្រូជាប់កិច្ចសន្យា ដែលបង្រៀននៅតាមមូលដ្ឋាននានា។
បើតាម សម្ដេច ហ៊ុន ម៉ាណែត គ្រូជាប់កិច្ចសន្យាដែលចូលបង្រៀនបានយ៉ាងហោចណាស់ ៤ឆ្នាំឡើងទៅ អាចពិនិត្យរៀបចំបញ្ចូលជាក្របខណ្ឌមន្ត្រីរាជការពេញសិទ្ធិ ដោយរៀបចំការធ្វើតេស្ត និងបញ្ជូនទៅចូលរួមវគ្គបណ្តុះបណ្តាលជំនាញ ឬបច្ចេកទេស ២ឆ្នាំ ឬ១៨ខែ។ លើសពីនេះ នាយករដ្ឋមន្រ្តី ក៏ឱ្យកែសម្រួលរយៈពេលនៃការធ្វើកិច្ចសន្យា ជាមួយគ្រូជាប់កិច្ចសន្យាថ្នាក់បឋមសិក្សា ដោយកែសម្រួលពី១ឆ្នាំម្តង ទៅ ២ឆ្នាំម្តង។
ការបញ្ចូលគ្រូបឋមជាប់កិច្ចសន្យា ទៅជាគ្រូក្របខណ្ឌនេះ ដោយសារសម្ដេច ហ៊ុន ម៉ាណែត សង្កេតឃើញថា គ្រូដែលបានប្រឡងជាប់ ពិបាកបញ្ជូនទៅ ដូច្នេះសម្ដេចចង់ឱ្យបញ្ចូលគ្រូជាប់កិច្ចសន្យានៅទីនោះតែម្ដង។ មួយវិញទៀតសម្ដេច យល់ថាគ្រូជាប់កិច្ចសន្យា ដែលមានបទពិសោធបង្រៀនច្រើនឆ្នាំ អាចដឹងពីវិធីសាស្រ្តជាងគ្រូទើបរៀនចប់។
សូមបញ្ជាក់ថា ក្នុងឆ្នាំ២០២៤ ក្រសួងមុខងារសាធារណៈ សហការជាមួយក្រសួងអប់រំ រៀបចំការប្រឡងប្រជែងជ្រើសរើសគ្រូបង្រៀននៅមត្តេយ្យ បឋម អនុវិទ្យាល័យ និងគ្រូបង្រៀនឯកទេសអប់រំកាយ និងកីឡា ប្រមាណ ២ ០៨៨ នាក់ ដើម្បីបម្រើការងារនៅតាមសាលា រៀន ដែលមានតម្រូវការនៅទូទាំងប្រទេសផងដែរ៕
© រក្សាសិទ្ធិដោយ thmeythmey.com
Tag:
.gif)