.jpg)
.jpg)
FBI ចោទ កូរ៉េខាងជើង នៅពីក្រោយការលួចគ្រីបតូទំហំ ១,៥ពាន់លានដុល្លារ
- ថ្ងៃព្រហស្បតិ៍ ទី២៧ ខែកុម្ភៈ ឆ្នាំ២០២៥ ម៉ោង ៥:៥៩ នាទី ល្ងាច
លោក Kash Patel នាយកការិយាល័យស៊ើបអង្កេតសហព័ន្ធអាម៉េរិក (FBI) (ឆ្វេង) និងលោក គីម ជុងអ៊ុន មេដឹកនាំកូរ៉េខាងជើង។ រូបភាព KCNA និងX_FBI
កូរ៉េខាងជើង ជាអ្នកនៅពីក្រោយការលួចរូបិយប័ណ្ណគ្រីបតូ Ethereum ទំហំ ១,៥ពាន់លានដុល្លារ ពីក្រុមហ៊ុន Bybit កាលពីសប្តាហ៍មុន។ ការិយាល័យស៊ើបអង្កេតសហព័ន្ធអាម៉េរិក (FBI) នៅថ្ងៃទី២៦ ខែកុម្ភៈ បានបញ្ជាក់បែបនេះ។ ការលួចគ្រីបតូលើក្រុមហ៊ុន ដែលមានមូលដ្ឋាននៅទីក្រុងឌូបៃ អេមីរ៉ាតអារ៉ាប់រួមនេះ ជាករណីលួចលុយឌីជីថលដ៏ធំបំផុតក្នុងប្រវត្តិសាស្រ្ត។
នៅសប្តាហ៍មុន ចោរបច្ចេកវិទ្យា (Hacker) បានលួចកាសគ្រីបតូ Ethereum ទំហំ ១,៥ពាន់លានដុល្លារ ពីក្រុមហ៊ុន Bybit ដែលមានមូលដ្ឋាននៅទីក្រុងឌូបៃ អេមីរ៉ាតអារ៉ាប់រួម។ ក្នុងករណីលួចកាសពីកាបូបលុយឌីជីថលរបស់ក្រុមហ៊ុន Bybit នេះ ត្រូវបាន ការិយាល័យស៊ើបអង្កេតសហព័ន្ធអាម៉េរិក (FBI) ចោទថា កូរ៉េខាងជើងនៅពីក្រោយ។
«កូរ៉េខាងជើង មានចំណែកក្នុងការទទួលខុសត្រូវសម្រាប់ការលួចរូបិយប័ណ្ណគ្រីបតូដែលទំហំប្រមាណ ១,៥ពាន់លានដុល្លារពីក្រុងហ៊ុនទិញដូរ Bybit»។ ការិយាល័យ FBI បានប្រកាសបែបនេះ នៅថ្ងៃទី២៦ ខែកុម្ភៈ ដោយបន្ថែមថា ក្រុម TraderTraitor ដែលស្គាល់ថា Lazarus Group គឺនៅពីក្រោយអំពើចោរកម្មនោះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ក្រោយក្រុមចោរបច្ចេកវិទ្យាលួចបាន គ្រីបតូមួយចំនួន ត្រូវបានប្តូរជាកាស Bitcoin ហើយបានផ្ញើទៅគណនីផ្សេងៗដែលមាននៅក្នុងប្លុកឆេនជាច្រើន។ ការិយាល័យ FBI ជឿថា នៅពេលក្រោយ ក្រុមចោរបច្ចេកវិទ្យា នឹងលាងរូបិយប័ណ្ណគ្រីបតូដែលបានលួចនោះ ហើយប្តូរទៅជាលុយ។
ក្រោយការលួចគ្រីបតូទំហំដ៏ច្រើននេះ នាយកប្រតិបត្តិក្រុមហ៊ុន Bybit លោក Ben Zhou បានការពារថា ក្រុមហ៊ុនមានសមត្ថភាពចេញសងលើការបាត់បង់គ្រីបតូទំហំ ១,៥ពាន់លានដុល្លារ។ លើសពីនេះ ក្រុមហ៊ុន Bybit បានប្រកាសលើកទឹកចិត្តរហូតដល់ ១០ភាគរយនៃគ្រីបតូបាត់បង់សម្រាប់អ្នកជំនាញផ្នែកសន្តិសុខ ប្រសិនបើអាចទាញយកកាសគ្រីបតូដែលមានលួចទំហំ ១,៥ពាន់លានដុល្លារនោះត្រលប់មកវិញ។
Lazarus Group ជាក្រុមបច្ចេកវិទ្យាដ៏ល្បីឈ្មោះមួយរបស់កូរ៉េខាងជើង ហើយធ្លាប់វាយប្រហារលើក្រុមហ៊ុន Sony Pictures ថែមទៀត បន្ទាប់ពីចេញផ្សាយភាពយន្ត The Interview និយាយពីមេដឹកនាំកូរ៉េខាងជើង លោក គីម ជុងអ៊ុន។ ក្រុមបច្ចេកវិទ្យាកូរ៉េខាងជើងមួយនេះ ត្រូវបានចោទពាក់ព័ន្ធនឹងបទល្មើសលួចកាសគ្រីបតូជាច្រើនលើក។
ក្រុម Lazarus Group ត្រូវបានចោទថា នៅពីក្រោយការលួចកាសគ្រីបតូ Ethereum និង USD Coin ទំហំ ៦២០លានដុល្លារថែមទៀត នៅក្នុងឆ្នាំ២០២២ ពីប្លុកឆេន Ronin Network។ នៅក្នុងខែធ្នូ ឆ្នាំ២០២៤ អាម៉េរិក និងជប៉ុន បានចោទក្រុមកូរ៉េខាងជើង ជាអ្នកនៅពីក្រោយការលួយកាសគ្រីតូទំហំ ៣០០លានដុល្លារ ពីក្រុមហ៊ុន DMM Bitcoin ថែមទៀត៕
© រក្សាសិទ្ធិដោយ thmeythmey.com
Tag:
