.png)
.png)
.jpg)
.jpg)
បញ្ហាតម្លៃ ចំណត និងរឿងតូចៗ! នាយករដ្ឋមន្ត្រី ឱ្យរាជធានី-ខេត្ត រៀបចំជាស្តង់ដា កុំចាំទេសចរ ថតបង្ហោះ
- ថ្ងៃព្រហស្បតិ៍ ទី២៧ ខែកុម្ភៈ ឆ្នាំ២០២៥ ម៉ោង ៥:៣៩ នាទី ល្ងាច
ភ្នំពេញ៖ ពិធីបិទសន្និបាតបូកសរុបការងាររបស់ក្រសួងទេសចរណ៍ សម្ដេច ហ៊ុន ម៉ាណែត បានប្រាប់ឱ្យអភិបាលរាជធានី-ខេត្ត បន្តជំរុញការរៀបចំគោលដៅទេសចរណ៍នៅក្នុងមូលដ្ឋានរបស់ខ្លួនឱ្យមានស្ដង់ដា និងផ្សព្វផ្សាយឱ្យបានទូលំទូលាយ។ លើសពីនេះ សម្ដេច ក៏ឱ្យអភិបាលរាជធានី-ខេត្ត ចាត់វិធានការ និងដោះស្រាយបញ្ហាឱ្យបានលឿន កុំចាំទាល់តែមានលើកឡើងពីមហាជនបង្ហោះលើបណ្ដាញសង្គម។
ក្នុងបរិការណ៍ឌីជីថល និងបច្ចេកវិទ្យាសិប្បនិម្មិតជឿនលឿន សម្ដេច ហ៊ុន ម៉ាណែត ឱ្យអភិបាលរាជធានី-ខេត្ត មានស្មារតីបុរេសកម្ម ម្ចាស់ការដោះស្រាយបញ្ហាទេសចរណ៍ក្នុងមូលដ្ឋានរបស់ខ្លួន។ «ត្រូវធានាគុណភាពសេវាកម្ម តម្លៃ ចំណត និងបញ្ហាតូចតាចនានា កុំចាំទាល់តែមានលើកឡើងពីមហាជនបង្ហោះលើបណ្ដាញសង្គម»។ សម្ដេច ហ៊ុន ម៉ាណែត មានប្រសាសន៍បែបនេះ។
នាឱកាសនោះសម្ដេចនាយករដ្ឋមន្រ្តី ក៏រំឭកពីករណីបាយឆា តម្លៃ៦ម៉ឺនរៀល នៅខេត្តកែបនាពេលកន្លងមកផងដែរ។ សម្ដេច លើកឡើងដូច្នេះ៖«រឿងវាតូចមួយ តែត្រូវចាត់វិធានការឱ្យលឿន ដើម្បីដោះស្រាយភ្លាមៗ កុំឱ្យនៅរ៉ាំរ៉ៃ»។
សម្ដេច ហ៊ុន ម៉ាណែត ពន្យល់ថា តាំងពីដើម រឿងល្អមិនសូវមានការចាប់អារម្មណ៍នោះទេ តែរឿងមិនល្អមួយ គឺនិយាយតគ្នា ជាពិសេសសម័យ AIនេះ ផ្សព្វផ្សាយលឿន ដែលចាំបាច់ត្រូវឆ្លើយតបឱ្យបានលឿន។ ត្រង់ចំណុចសម្ដេច បានសង្កត់ធ្ងន់លើគោលដៅទេសចរណ៍ និងភាពអវិជ្ជមាននៃវិស័យទេសចរណ៍។
បញ្ហាអសកម្មនេះ សម្ដេច ហ៊ុន ម៉ាណែត អះអាងថា អាចធ្វើឱ្យទេសចរណ៍ងាកទៅលេងគោលដៅទេសចរណ៍ផ្សេង។ ចំពោះបញ្ហានេះ សម្ដេច ថា ជារឿងដែលត្រូវយកចិត្តទុកដាក់៕
© រក្សាសិទ្ធិដោយ thmeythmey.com
Tag:
.gif)