.png)
.png)
.jpg)
.jpg)
ក្រសួងអប់រំ កំពុងស្វែងរកថវិកាដើម្បីទទួលយក«កម្មវិធីសិក្សាទំនើប»ឱ្យសិស្សបានសិក្សាគ្រប់គ្នា
- ថ្ងៃសុក្រ ទី២៨ ខែកុម្ភៈ ឆ្នាំ២០២៥ ម៉ោង ២:២៩ នាទី រសៀល
លោកឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា
ភ្នំពេញ៖ ដើម្បីបន្តផ្ដល់ការអប់រំប្រកបដោយគុណភាពនៅតាមសាលារៀនចំនួន១៨ ដែលបានអនុវត្តកម្មវិធីសិក្សាទំនើប ក្រសួងអប់រំ កំពុងស្វែងរកថវិកា ដើម្បីទទួលយក«កម្មវិធីសិក្សាទំនើប» និងផ្តល់ឱកាសដល់សិស្ស១០០ភាគរយ ក្នុងសាលាអាចសិក្សារៀនសូត្រតែម្តង។ នេះបើតាមសេចក្ដីប្រកាសព័ត៌មានរបស់ក្រសួងអប់រំស្ដីពីការបន្តដំណើរការកម្មវិធីសាលារៀនជំនាន់ថ្មី និងការលុបចោលកម្មវិធីសិក្សាទំនើប។
ក្នុងពិធីបិទសន្និបាតការងារអប់រំឆ្នាំ២០២៥ សម្ដេចនាយករដ្ឋមន្រ្តី ហ៊ុន ម៉ាណែត បានសម្រេចលុបចោលមជ្ឈមណ្ឌលសិក្សាទំនើប ដែលមាននៅសាលារៀនចំនួន ១៨។ ក្រោយការសម្រេចចិត្តរបស់សម្ដេច ហ៊ុន ម៉ាណែត មានប្រជាពលរដ្ឋយល់ច្រឡំថា ក្រសួងអប់រំ នឹងលុបចោលកម្មវិធីសាលារៀនជំនាន់ថ្មី។ ក្រសួងអប់រំ បញ្ជាក់ច្បាស់ថា ដោយមានការគាំទ្រពីរដ្ឋាភិបាល ក្រសួងនឹងនៅតែបន្តអនុវត្តកម្មវិធីសាលារៀនជំនាន់ថ្មី និងបន្តវិនិយោគបន្ថែមទៀត។
ពាក់ព័ន្ធនឹងការអនុវត្តកម្មវិធីសិក្សាទំនើប ដែលបានអនុវត្តដោយក្រុមហ៊ុនឯកជនវិញ ក្រសួងអប់រំ យុវជន និងកីឡា អះអាងថា កម្មវិធីនោះ ជាកិច្ចសហការរវាងផ្នែកឯកជនជាមួយនឹងសាលារៀនផ្ទាល់ និងមិនស្ថិតក្រោមការគ្រប់គ្រងរបស់ក្រសួងឡើយ។ បច្ចុប្បន្ន កម្មវិធីសិក្សាទំនើប កំពុងអនុវត្តនៅតាមសាលាបឋមសិក្សា ចំនួន ១៨ ដែលមានសិស្ស ៤ ៣០០ នាក់ កំពុង សិក្សារៀនសូត្រ។
ក្រសួងអប់រំ លើកឡើងដូច្នេះ៖«កម្មវិធីនេះ អនុវត្តខុសពីនីតិវិធីនៃការគ្រប់គ្រងទ្រព្យសម្បត្តិរដ្ឋ ព្រមទាំងបង្កើតឱ្យមានការរើសអើងរវាងសិស្ស ដែលកំពុងសិក្សាក្នុងថ្នាក់តែមួយ ដែលមានលទ្ធភាពបង់ប្រាក់ និងសិស្សដែលគ្មានលទ្ធភាពបង់ប្រាក់ ព្រមទាំងបង្កើតឱ្យមានស្តង់ដាពីរក្នុងសាលារៀនតែមួយ»។
ជាមួយគ្នានេះ ដើម្បីបន្តផ្តល់ការអប់រំប្រកបដោយគុណភាពនៅតាមសាលាបឋមសិក្សាខាងលើ ក្រសួងអប់រំ កំពុងស្វែងរក ថវិកា ដើម្បីទទួលយក «កម្មវិធីសិក្សាទំនើប» និងផ្តល់ឱកាសដល់សិស្ស ១០០ ភាគរយ ក្នុងសាលាសិក្សារៀនសូត្រតែម្តង។
ដោយឡែកសាលារៀនជំនាន់ថ្មី ក្រសួងអប់រំបញ្ជាក់ថា សាលានេះ គឺជាគ្រឹះស្ថានសិក្សាសាធារណៈ ស្ថិតនៅក្រោមការគ្រប់គ្រងដោយផ្ទាល់របស់ក្រសួងអប់រំ ដែលផ្តល់ជាគំរូអភិបាលកិច្ចល្អ ស្តង់ដាវិជ្ជាជីវៈខ្ពស់ និងផ្តល់ការអប់រំមានគុណភាពខ្ពស់។ បើតាមក្រសួងអប់រំ សាលារៀនជំនាន់ថ្មី ផ្តោតលើការអនុវត្តកម្មវិធីសិក្សាពេញលេញ ផ្តល់ឱកាសសិក្សាពេញមួយថ្ងៃ អនុវត្តវិធីសាស្ត្របង្រៀនទំនើបតាមបែបរិះរក ការដោះស្រាយបញ្ហា។
លើសពីនេះ ការសិក្សានៅសាលារៀនជំនាន់ថ្មី គឺជាការសិក្សាតាមបែបគម្រោង កម្មវិធីបច្ចេកវិទ្យា ដែលបណ្តុះទាំងវិជ្ជាសម្បទា បំណិនសតវត្សទី២១ ជាពិសេសបំណិនសហការត្រិះរិះពិចារណា ទំនាក់ទំនង លើកកម្ពស់ស្វ័យសិក្សា ការស្រាវជ្រាវរបស់សិស្ស និងការរៀបចំពិព័រណ៌ស្នាដៃសិស្សជាដើម។ សាលារៀនជំនាន់ថ្មី បានបំពាក់សម្ភារៈ និងបរិក្ខាររៀន និងបង្រៀនទំនើប និងរៀបចំបណ្ណាល័យសតវត្សទី២១ បន្ទប់ពិសោធន៍ ដែលអាចឱ្យគ្រូបង្រៀន និងសិស្សប្រើប្រាស់បច្ចេកវិទ្យា និងភាសាបរទេសផងដែរ៕
© រក្សាសិទ្ធិដោយ thmeythmey.com
Tag:
.gif)