.png)
.jpg)
.jpg)
គម្រោងប្រព័ន្ធរំដោះ និងពង្វាងទឹកចេញពីភ្នំពេញសម្រេចបាន៩០ភាគរយហើយ
- ថ្ងៃចន្ទ ទី៣ ខែមីនា ឆ្នាំ២០២៥ ម៉ោង ៧:៥៩ នាទី ព្រឹក
ភ្នំពេញ៖ គម្រោងប្រព័ន្ធរំដោះ និងពង្វាងទឹកចេញពីភ្នំពេញ និងខេត្តជុំវិញភ្នំពេញសម្រេចបាន៩០ភាគរយហើយ។ នេះបើតាមការបញ្ជាក់របស់ រដ្ឋមន្រ្តីក្រសួងធនធានទឹក និងឧតុនិយម លោក ថោ ជេដ្ឋា ក្នុងវេទិកាសារព័ត៌មាន ស្ដីការគ្រប់គ្រងសក្កានុពលទឹក និងស្ថានភាពប្រព័ន្ធធារាសាស្រ្តកម្ពុជា នៅថ្ងៃទី ១ ខែមីនា។
ដើម្បីជ្រាបច្បាស់សូមលោកអ្នកទស្សនាវីដេអូខាងក្រោម៖
បញ្ហាទឹកលិចទីក្រុង បានប៉ះពាល់ទៅដល់ការរស់នៅប្រជាជន និងហេដ្ឋារចនាសម្ព័ន្ធជាច្រើន។ ដើម្បីដោះស្រាយលើបញ្ហានេះ រដ្ឋាភិបាលបានធ្វើគម្រោងប្រព័ន្ធរំដោះ និងពង្វាងទឹកពីភ្នំពេញក្នុងឆ្នាំ២០២៣ ដោយនឹងបញ្ចប់នៅឆ្នាំ២០២៦។ បើតាមលោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម គម្រោងដែលនៅសល់ប្រមាណ១០ភាគរយទៀត ចំណាយពេលធ្វើយូរ ដោយសារការរៀបចំសំណង់សិល្បៈការ្យ។
លោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម នៅក្នុងវេទិកាសារព័ត៌មាន ស្ដីការគ្រប់គ្រងសក្កានុពលទឹក និងស្ថានភាពប្រព័ន្ធធារាសាស្រ្តកម្ពុជា ។ រូបភាព មឿន ម៉ាក់ថុង
លោក ថោ ជេដ្ឋា បានពន្យល់ពីការធ្វើសំណង់សិល្បៈការ្យដូច្នេះ៖ «ការធ្វើប្រឡាយដីលឿនទេ ប៉ុន្តែសំណង់សិល្បៈការ្យយូរ ដែលយើងមានជាង២០០កន្លែង។ សំណង់សិល្បៈការ្យ ជាអ្វី? សំណង់សិល្បៈការ្យ គឺនៅលើប្រព័ន្ធធារាសាស្រ្តមានស្ពានដើម្បីឆ្លងកាត់ព្រោះពេលយើងធ្វើប្រឡាយលើស្ពានខ្លះតូច ពេលយើងពង្រីកប្រឡាយយើងត្រូវសង់ស្ពានថ្មី។ មួយទៀតសំណង់ប្រព័ន្ធរំដោះទឹក ក៏ជាសំណង់សិល្បៈការ្យដែរ។ មានន័យថា យើងធ្វើប្រឡាយទឹកធំហើយ យើងត្រូវមានកន្លែងរំដោះទឹក និងមានទ្វារបញ្ជាទឹកកុំឱ្យលិច និងកុំឱ្យខ្វះទឹក»។
គម្រោងប្រព័ន្ធរំដោះ និងពង្វាងទឹកនេះ បានចំណាយថវិកាអស់ប្រមាណជិត៣០០លានដុល្លារ ដោយក្នុងនោះមានប្រឡាយទឹកពង្វាងទឹកចំនួន១០ខ្សែ ប្រវែង២៦០គីឡូម៉ែត្រ។ បើតាម លោក ថោ ជេដ្ឋា គម្រោងនេះមិនត្រឹមតែរំដោះទឹកចេញពីទីក្រុងនោះទេ ប៉ុន្តែការរំដោះទឹកនេះ ក៏ជួយផ្គត់ផ្គង់ទឹកទៅដល់ផ្នែកខ្លះក្នុងខេត្តតាកែវដែលមិនទាន់មានប្រព័ន្ធធារាសាស្រ្តទៀតផង៕
© រក្សាសិទ្ធិដោយ thmeythmey.com
Tag:
