.jpg)
.jpg)
លោក Warren Buffett ៖ ការដាក់ពន្ធនាំចូល ជាសកម្មភាពបង្កសង្រ្គាម
- ថ្ងៃចន្ទ ទី៣ ខែមីនា ឆ្នាំ២០២៥ ម៉ោង ៧:២៩ នាទី ល្ងាច
លោក Warren Buffett មហាសេដ្ឋីអាម៉េរិក ។ រូបភាព ៖ AFP
មហាសេដ្ឋី Warren Buffett ដែលមានវ័យ ៩៤ឆ្នាំ មិនមានសុទិដ្ឋិនិយមជុំវិញគោលនយោបាយពាណិជ្ជកម្មរបស់អាម៉េរិកនោះទេ។ លោកថា ការដាក់ពន្ធជាសកម្មភាពបង្កសង្គ្រាម។
មហាសេដ្ឋីអាម៉េរិក Warren Buffett នៅថ្ងៃទី២ ខែមីនា បានចូលរួមក្នុងបទសម្ភាសជាមួយ CBS News ។ អំឡុងពេលសន្ទនា លោកបានលើកឡើងដ៏កម្រមួយ អំពីពន្ធនាំចូលរបស់ប្រធានាធិបតីអាម៉េរិក ដូណាល់ ត្រាំ ។ នៅពេលត្រូវបានសួរអំពីផលប៉ះពាល់នៃពន្ធលើសេដ្ឋកិច្ចនេះ មហាសេដ្ឋីរូបនេះឆ្លើយតបថា ៖«យើងពិតជាមានបទពិសោធន៍ជាច្រើនជាមួយនឹងពន្ធនាំចូល។ បើធៀបតាមកម្រិតកន្លងមក ពេលនេះជាទង្វើនៃការបង្កសង្រ្គាម»។
លោក Buffett យល់ថា ក្នុងរយៈពេលវែង នេះគឺជាប្រភេទពន្ធលើទំនិញ។ «មិនមានទេពអប្សរណា(សំដៅលើក្រុមហ៊ុន) ដែលហ៊ានបង់ប្រាក់សម្រាប់រឿងនេះទេ។ សេដ្ឋកិច្ចនាពេលនេះ អ្នកតែងតែសួរថា តើមានអ្វីកើតឡើងបន្ទាប់ទៀត?»។
នេះជាលើកទីមួយហើយដែលមហាសេដ្ឋីវ័យ ៩៤ឆ្នាំរូបនេះ បានបញ្ចេញមតិជាសាធារណៈអំពីគោលនយោបាយពាណិជ្ជកម្មរបស់ប្រធានាធិបតីអាម៉េរិក លោក ដូណាល់ ត្រាំ ។ កាលពីសប្តាហ៍មុន លោក ត្រាំ បានប្រកាសថា ពន្ធនាំចូល ២៥ភាគរយលើទំនិញពីម៉ិកស៊ិក និងកាណាដានឹងចូលជាធរមានចាប់ពីថ្ងៃទី៤ ខែមីនា។ ចិនក៏នឹងទទួលរងការយកពន្ធ១០ភាគរយបន្ថែមទៀត ក្នុងថ្ងៃតែមួយនោះដែរ។ យ៉ាងណាមិញ ទីក្រុងប៉េកាំងបានប្តេជ្ញានឹងសងសឹក។
អំឡុងអាណត្តិដំបូងរបស់លោក ត្រាំ មហាសេដ្ឋី Buffett ក៏បានព្រមានម្តងហើយម្តងទៀតអំពីភាពតានតឹងពាណិជ្ជកម្ម។ លោកធ្លាប់លើកឡើងថា ចំណាត់ការធ្ងន់ៗរបស់បក្សសាធារណរដ្ឋ អាចមានផលវិបាកអវិជ្ជមានទូទាំងពិភពលោក។
នៅពេលសួរយោបល់អំពីស្ថានភាពសេដ្ឋកិច្ចអាម៉េរិកនាពេលបច្ចុប្បន្ន លោក Buffett មិនបានលើកឡើងចំៗចំណុចនោះទេ។ លោកគ្រាន់តែឆ្លើយថា៖ «ខ្ញុំគិតថានេះជាប្រធានបទដែលគួរឲ្យចាប់អារម្មណ៍បំផុតក្នុងពិភពលោក ប៉ុន្តែខ្ញុំនឹងមិននិយាយអំពីវាទេ»។
បច្ចុប្បន្នលោក Buffett ជាប្រធាន និងជានាយកប្រតិបត្តិនៃក្រុមហ៊ុន Berkshire Hathaway ដែលជាក្រុមហ៊ុនដែលប្រតិបត្តិការលើវិស័យជាច្រើន រាប់ចាប់ពីការធានារ៉ាប់រង ផ្លូវដែក ការផលិត ថាមពល រហូតដល់ការលក់រាយ។ លោកក៏ជាវិនិយោគិនដ៏ជោគជ័យបំផុតមួយរូបនៅក្នុងពិភពលោក។ បច្ចុប្បន្ន Buffett មានទ្រព្យសម្បត្តិ ១៦១ ពាន់លានដុល្លារ និងជាមហាសេដ្ឋីលំដាប់ទី៧ នៅលើពិភពលោក។
លោក Buffett មានការប្រុងប្រយ័ត្នក្នុងរយៈពេលប៉ុន្មានឆ្នាំចុងក្រោយនេះ ដោយសារតែក្រុមហ៊ុន Berkshire បានលក់ភាគហ៊ុនជាបន្តបន្ទាប់។ អ្នកខ្លះមើលឃើញថា នេះជាសញ្ញាមួយបង្ហាញថា លោកមានទុទិដ្ឋិនិយមចំពោះទីផ្សារនិងសេដ្ឋកិច្ច។ អ្នកផ្សេងទៀតយល់ថាលោកគ្រាន់តែរៀបចំដីសម្រាប់អ្នកស្នងតំណែងរូបលោកតែប៉ុណ្ណោះ។
ទោះជាយ៉ាងណា នៅក្នុងបទសម្ភាសន៍មួយកាលពីថ្ងៃទី២ ខែមីនា លោក Buffett នៅតែមានសុទិដ្ឋិនិយមអំពីអនាគតនៃអាជីវកម្មអាម៉េរិក។ «លុយភាគច្រើនដែលខ្ញុំគ្រប់គ្រងនឹងតែងតែនៅអាម៉េរិក។ ហេតុអ្វី? ដោយសារតែវាជាកន្លែងល្អបំផុត។ ខ្ញុំសំណាងណាស់ដែលបានកើតនៅទីនេះ»។ លោក Buffett បានលើកឡើងបែបនេះ៕
© រក្សាសិទ្ធិដោយ thmeythmey.com
Tag:
