.jpg)
.jpg)
ហ្វីលីពីន «ជឿជាក់» ថាទំនាក់ទំនងជាមួយអាមេរិកក្នុងអាណត្តិលោក Trump នឹងនៅតែរឹងមាំ
- ថ្ងៃអង្គារ ទី៤ ខែមីនា ឆ្នាំ២០២៥ ម៉ោង ៦:២៩ នាទី ល្ងាច
រូបឯកសារ៖ ឯកអគ្គរដ្ឋទូតហ្វីលីពីនប្រចាំនៅសហរដ្ឋអាមេរិក លោក Jose Manuel Romualdez ថ្លែងក្នុងពិធីមួយនៅទីក្រុងម៉ានីល ប្រទេសហ្វីលីពីន ថ្ងៃទី៦ ខែសីហា ឆ្នាំ២០២២។
ឯកអគ្គរដ្ឋទូតហ្វីលីពីនប្រចាំសហរដ្ឋអាមេរិកបាននិយាយកាលពីថ្ងៃចន្ទថាលោក «ជឿជាក់» ថាចំណងទាក់ទងយោធារវាងហ្វីលីពីននិងសហរដ្ឋអាមេរិកនឹងនៅតែរឹងមាំក្រោមរដ្ឋាភិបាលអាមេរិកដែលដឹកនាំដោយលោកប្រធានាធិបតី Donald Trump។ នេះបើយោងតាមទីភ្នាក់ងារសារព័ត៌មាន AFP។
ចិន និងហ្វីលីពីន មានការប្រឈមមុខដាក់គ្នាកាន់តែតានតឹងឡើង ដោយសារបញ្ហាថ្មប៉ប្រះទឹក និងដែនទឹក ក្នុងសមុទ្រចិនខាងត្បូង។
ឯកអគ្គរដ្ឋទូតហ្វីលីពីនប្រចាំសហរដ្ឋអាមេរិក លោក Jose Manuel Romualdez ថា លោកជឿថា ការគាំទ្ររបស់សហរដ្ឋអាមេរិក លើផ្លូវទឹកដែលមានជម្លោះនេះ និងជំនួយយោធានឹងនៅតែបន្ត ដោយលោកនិយាយ យោងដល់ការលើកលែងរបស់អាមេរិក នូវទឹកប្រាក់ចំនួន ៣៣៦ លានដុល្លារ ដែលបានផ្ដល់ជូនហ្វីលីពីន ទោះបីជាមានបទបញ្ជារបស់ប្រធានាធិបតីអាមេរិក ឲ្យបង្កកជំនួយ និងការចំណាយនៅបរទេសក៏ដោយ។
លោក Romualdez បានថ្លែងទៅកាន់ក្រុមអ្នកកាសែតបរទេស ក្នុងទីក្រុងម៉ានីល នៃប្រទេសហ្វីលីពីនថា៖ «ខ្ញុំគិតថាទឹកប្រាក់ទាំងអស់នោះនឹងនៅតែបន្ត។ ខ្ញុំជឿជាក់ថាអ៊ីចឹង»។
ពេលគេសួរថា តើទំនាក់ទំនងប្រេះឆា រវាងសហរដ្ឋអាមេរិក និងសម្ព័ន្ធមិត្តអឺរ៉ុប របស់អាមេរិក ដោយសារសង្គ្រាមរបស់រុស្ស៊ី នៅអ៊ុយក្រែន អាចប៉ះពាល់ដល់ហ្វីលីពីនយ៉ាងដូចម្តេច លោក Romualdez ថាក្រុមបស្ចិមប្រទេស នៅតែមានជំហររួមដដែល ពេលនិយាយដល់បញ្ហាសមុទ្រចិនខាងត្បូង។
លោក Romualdez និយាយថា៖ «អ្វីដែលកំពុងកើតឡើងក្នុងឆាកនយោបាយអឺរ៉ុប គឺខុសពីអ្វីដែលកំពុងកើតឡើងនៅទីនេះ។ ផលប្រយោជន៍របស់ប្រទេសនានាក្នុងតំបន់របស់យើងក្នុងពិភពលោកនេះ នៅតែដដែល។ [ពាណិជ្ជកម្ម] ក្នុងទឹកប្រាក់រាប់លានដុល្លារ ឆ្លងកាត់សមុទ្រចិនខាងត្បូង ហើយវាច្បាស់ណាស់ថា យើងមិនចង់ឲ្យប្រទេសណាមួយ លុបលើគេឯងក្នុងតំបន់នេះទេ»៕
© រក្សាសិទ្ធិដោយ thmeythmey.com
.gif)