.png)
.jpg)
.jpg)
សម្ដេច គុយ សុផល ជាប្រធានគណៈកម្មការអន្តរក្រសួង រៀបចំពិធីបួងសួងចម្រើនសេចក្តីសុខនៅប្រាសាទអង្គរ
- ថ្ងៃអង្គារ ទី៤ ខែមីនា ឆ្នាំ២០២៥ ម៉ោង ១០:០៥ នាទី យប់
សម្តេច គុយ សុផល ឧបនាយករដ្ឋមន្រ្តី រដ្ឋមន្រ្តីក្រសួងព្រះបរមរាជវាំង ឧត្តមប្រឹក្សាផ្ទាល់ព្រះមហាក្សត្រ ដឹកនាំកិច្ចប្រជុំ ស្តីពីការត្រៀមរៀបចំព្រះរាជពិធីបួងសួងចម្រើនសេចក្តីសុខជូនដល់កម្ពុជា នៅខាងមុខប្រាសាទអង្គរវត្ត កាលពីថ្ងៃទី២៧ ខែកុម្ភៈកន្លងទៅ។ រូបភាព៖ ហ្វេសប៊ុកទូរទស្សន៍ជាតិកម្ពុជា
សៀមរាប៖ រាជរដ្ឋាភិបាលបានបង្កើតគណៈកម្មការអន្តរក្រសួងរៀបចំពិធីបួងសួងចម្រើនសេចក្តីសុខ ដល់ព្រះរាជាណាចក្រកម្ពុជា ដែលធ្វើឡើងនៅមុខប្រាសាទអង្គរវត្ត នៅថ្ងៃទី១១-១២ ខែមេសាខាងមុខ ដោយសម្ដេច គុយ សុផល ឧបនាយករដ្ឋមន្រ្តី រដ្ឋមន្រ្តីក្រសួងព្រះបរមរាជវាំង ជាប្រធាន។ នេះបើយោងតាមសេចក្តីសម្រេចរបស់រាជរដ្ឋាភិបាលចុះថ្ងៃទី៤ ខែមីនា។
បើតាមសេចក្តីសម្រេចដដែល លោក ហ៊ុន ម៉ានី រដ្ឋមន្រ្តីក្រសួងមុខងារសាធារណ និងជាប្រធាន សសយក ជាអនុប្រធាន។ ចំណែកលោក ឈិន កេតនា អនុប្រធានអចិន្រ្តៃយ៍ និងជាអគ្គលេខាធិការ គ.ជ.ប.អ ជាអនុប្រធានអចិន្រ្តៃយ៍។
គណៈកម្មការខាងលើមានអនុប្រធាន៦រូបទៀត រួមមាន លោកស្រី គង់ បញ្ញា ទេសរដ្ឋមន្រ្តីទទួលបន្ទុក កិច្ចការទូទៅអមក្រសួងព្រះបរមរាជវាំង លោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ លោក ចាយ បូរិន រដ្ឋមន្រ្តីក្រសួងធម្មការ និងសាសនា លោក ហួត ហាក់ រដ្ឋមន្រ្តីក្រសួងទេសចរណ៍ លោក នេត្រ ភក្រ្តា រដ្ឋមន្រ្តីក្រសួងព័ត៌មាន និងលោក ប្រាក់ សោភ័ណ អភិបាលខេត្តសៀមរាប ជាដើម។ គណៈកម្មការនេះមានសមាជិក និងសមាជិកា ២៣រូបទៀត ដែលសរុបទាំងអស់ មានចំនួន ៣២រូប។
គណៈកម្មការអន្តរក្រសួងមានតួនាទី ដឹកនាំ រៀបចំ ចាត់ចែង សម្របសម្រួលជាមួយស្ថាប័ន និងអង្គភាពពាក់ព័ន្ធ ដើម្បីឱ្យដំណើរការនៃការរៀបចំព្រះរាជពិធីប្រព្រឹត្តិទៅបានល្អ រៀបចំការពារសន្តិសុខ របៀបរៀបរយ សណ្ដាប់ធ្នាប់ ចរាចរណ៍ និងធានាសុវត្ថិភាពឱ្យបានគ្រប់គ្រាន់ មុន-ក្រោយពេលប្រារព្ធ ព្រះរាជពិធី។ ទំនាក់ទំនង និងសហការជាមួយអាជ្ញាធរពាក់ព័ន្ធ ក្នុងការអញ្ជើញភ្ញៀវជាន់ខ្ពស់ជាតិ អន្តរជាតិ និងផ្សព្វផ្សាយព័ត៌មានពាក់ព័ន្ធនឹងការប្រារព្ធព្រះរាជពិធីឱ្យបានទូលំទូលាយ៕
© រក្សាសិទ្ធិដោយ thmeythmey.com
