.jpg)
.jpg)
ចិន ស៊ើបអង្កេតរកមុខអ្នករត់ម៉ារ៉ាតុង ដែល«បត់ជើងតូច»ដាក់ផ្លាកសាលារៀន និងផើងផ្កា
- ថ្ងៃពុធ ទី៥ ខែមីនា ឆ្នាំ២០២៥ ម៉ោង ៣:៥៩ នាទី រសៀល
អ្នករត់ម៉ារ៉ាតុងរាប់ពាន់នាក់ មានវត្តមាននៅព្រឹត្តិការណ៍ Suzhou Marathon ឆ្នាំ ២០២៥ ក្នុង ប្រទេសចិន ស្ថិតនៅក្រោមការស៊ើបអង្កេតចំពោះការបត់ជើងតូច នៅទីសាធារណៈ ទាំងនៅលើផ្លាកសញ្ញាសាលារៀន ផើងផ្កា និងសួនច្បារនៅតាមដងផ្លូវ។
រូបភាពដែលចែកចាយនៅលើប្រព័ន្ធផ្សព្វផ្សាយសង្គមចិន Weibo បង្ហាញអ្នករត់មួយក្រុមឈរនោមជុំគ្នានៅលើផ្លាកសញ្ញាសាលា ដែលស្ថិតនៅជិតទីចាប់ផ្តើមព្រឹត្តិការណ៍ម៉ារ៉ាតុង។ បុគ្គលិកសាលាបានរាយការណ៍ពីករណីនេះទៅកាន់អាជ្ញាធរ។ រូបភាពមួយសន្លឹកទៀត ថតបានអត្តពលិកបីនាក់នោមដាក់ដើមផ្កាជិតបន្ទប់ទឹកចល័ត។ គណៈកម្មការរៀបចំបានបំពាក់បន្ទប់ទឹកចល័តរាប់រយនៅតាមផ្លូវ ក្នុងព្រឹត្តិការណ៍ Suzhou Marathon នេះ។
ក្រោយមានរូបភាពនេះបង្ហោះលើបណ្តាញសង្គម បានធ្វើឱ្យមានការរិះគន់យ៉ាងខ្លាំង។ ពលរដ្ឋមួយចំនួន លើកឡើងថាសកម្មភាពទាំងនេះអាចកើតឡើងដោយសារអ្នករត់ទាំងនោះបន្ទាន់ខ្លាំង ឬកង្វះការយល់ដឹងជាសាធារណៈ និងសីលធម៌សង្គមជាដើម។ អ្នករិះគន់ភាគច្រើន អំពាវនាវឱ្យមានការផាកពិន័យ ឬដាក់បម្រាមសម្រាប់អ្នករត់ទាំងនោះ។
នៅទីក្រុង Suzhou ការបន្ទោបង់បត់ជើងតូចតាមទីសាធារណៈគឺខុសច្បាប់ ហើយត្រូវដាក់ទោសពិន័យជាប្រាក់ ១៣៣ ដុល្លារទៀតផង។ ដោយឡែកជុំវិញករណីអត្តពលិករត់ម៉ារ៉ាតុង នោមពាសវាលពាសកាលនេះ ការិយាល័យកីឡាក្រុង Suzhou និងអ្នករៀបចំកម្មវិធីបានបើកការស៊ើបអង្កេត ដើម្បីកំណត់អត្តសញ្ញាណអ្នកបំពាន។ អ្នករៀបចំ ថែមទាំងបានថ្កោលទោសចំពោះឥរិយាបថឥតអនាម័យនេះ និងបានជំរុញឱ្យសាធារណជនផ្តល់រូបថត និងវីដេអូបន្ថែម។ នេះបើតាមការចុះផ្សាយរបស់ទស្សនាវដ្តី Canadian Running។
អ្នករៀបចំព្រឹត្តិការណ៍ Suzhou Marathon បន្ថែមថា៖«យើងបានជូនដំណឹងដល់នាយកដ្ឋានពាក់ព័ន្ធ និងបានចាប់ផ្តើមការស៊ើបអង្កេត។ សម្រាប់កម្មវិធីបន្តបន្ទាប់ ក្នុងនាមជាអ្នករៀងបចំ នឹងចាត់វិធានការតឹងរ៉ឹង និងបង្កើនការត្រួតពិនិត្យ ដើម្បីលើកកម្ពស់ការយល់ដឹងដល់អ្នកចូលរួមទាំងអស់»។
ករណីនោមជាសាធារណៈក្នុងកម្មវិធីរត់ម៉ារ៉ាតុងធំៗមិនមែនជាបញ្ហាថ្មីក្នុងប្រទេសចិនទេ។ អំឡុងម៉ារ៉ាតុងក្រុងប៉េកាំងឆ្នាំ ២០១៣ ស្របពេលបន្ទប់ទឹកអនាម័យមិនគ្រប់គ្រាន់ផងនោះ អ្នកចូលរួមភាគច្រើននោមដាក់របង និងដើមឈើតាមដងផ្លូវ ដែលធ្វើឱ្យមានក្លិបឆ្អេះ។ ចាប់តាំងពីពេលនោះមក អ្នករៀបចំការរត់ម៉ារ៉ាតុងបានបង្កើនចំនួនបន្ទប់ទឹកចល័តនៅតាមកន្លែងប្រណាំង ប៉ុន្តែនៅតែមានអ្នកល្មើស។
Suzhou Marathon ឆ្នាំ ២០២៥នេះ ដែលជាព្រឹត្តិការណ៍ម៉ារ៉ាតុងប្រចាំឆ្នាំដ៏ធំក្នុងប្រទេសចិន បានទាក់ទាញអ្នកចុះឈ្មោះជាង ១៦០ ០០០នាក់ ឯណោះ៕
© រក្សាសិទ្ធិដោយ thmeythmey.com
Tag:
.gif)