.png)
ឈ្នះ ៦-២ តែគ្រូស្វាយរៀងមិនពេញចិត្ត ខណៈគ្រូ Shan United មិនរំពឹងឈ្នះនៅជើងទី២
- ថ្ងៃសុក្រ ទី៧ ខែមីនា ឆ្នាំ២០២៥ ម៉ោង ៤:៥៩ នាទី រសៀល
ព្រះខ័នរាជស្វាយរៀង ឈ្នះ Shan United FC ៦-២ ក្នុងការប្រកួតជើងទី១ វគ្គ៨ក្រុមចុងក្រោយ AFC Challenge League នៅថ្ងៃទី៦ ខែមីនា។ រកបានដល់ទៅ៦គ្រាប់ និងរបូត២គ្រាប់ប៉ុណ្ណោះ ប៉ុន្តែគ្រូបង្វឹកស្វាយរៀងលោក Jose Munoz នៅតែមិនពេញចិត្ត។ លោក Ono Hiroki គ្រូ Shan United មិនរំពឹងក្រុមខ្លួនអាចវាយបកឈ្នះស្វាយរៀងនៅជំនួបជើងទី២ ក្នុងទឹកដីខ្លួនឡើយ។
ក្រោមក្រសែភ្នែកអ្នកគាំទ្រ ១៦ ២៧១នាក់ នៅពហុកីឡដ្ឋានជាតិមរតកតេជោ ខ្សែប្រយុទ្ធ Cristian Roque រកបាន៣គ្រាប់ម្នាក់ឯក hat-trick នៅនាទី១៧, ៣១ និង ៥៩ ដោយក្រុមចំណោមនេះ ស៊ុតបាល់ពិន័យ១១ម៉ែត្រពីរគ្រាប់។ Ryo Fujii ធ្វើបាននៅនាទី៥៤ មុន Zwe Khant ធ្វើឱ្យបាល់ចូលទីខ្លួនឯកនៅនាទី៦៤។ មិន រតនៈ សម្រេចគ្រាប់ទី៦ គោព្រៃកម្ពុជា។ ២គ្រាប់របស់ក្រុមភ្ញៀវ Shan United ធ្វើបានដោយ សារ៉េត គ្រីយ៉ា (ចូលទីខ្លួនឯង) នាទី៣៨ និង Efrain Rintaro នៅនាទី៨៨។
ទោះទទួលបានលទ្ធផលជ័យជម្នះដល់ទៅ ៦-២ នៅជើងទី១ ប៉ុន្តែគ្រូបង្វឹកព្រះខ័នរាជស្វាយរៀង លោក Jose Munoz នៅតែមិនសប្បាយចិត្ត ដ្បិតកូនក្រុមមិនទាន់ធ្វើបានអ្វីដែលខ្លួនចង់បានតាមគ្រោងការ។
នៅសន្និសីទក្រោយចប់ការប្រកួតគ្រូបង្វឹកសញ្ជាតិអេស្ប៉ាញប្រាប់អ្នកសារព័ត៌មានថា៖«ខ្ញុំមិនទាន់ពេញចិត្តនឹងទម្រង់ប្រកួតនេះនៅឡើយទេ ទាំងការប៉ះបាល់ និងធ្វើឱ្យរបូត២គ្រាប់ជាដើម។ ត្រឡប់ទៅជួប Shan United ជើងទី២នៅទឹកដីមីយ៉ាន់ម៉ា ស្វាយរៀងនឹងធ្វើការធ្ងន់ មិនងាយស្រួលដូចជើងទី១ឡើយ»។
បើទោះមិនសូវពេញចិត្តទម្រង់ប្រកួតរបស់កូនក្រុម ប៉ុន្តែគ្រូព្រះខ័នរាជស្វាយរៀង នៅតែមានការជឿជាក់ថាកូនក្រុមនឹងទទួលបានជ័យជម្នះនៅជើងទី២។
ដោយឡែក លោក Ono Hiroki គ្រូបង្វឹក ក្រុម Shan United បានទទួលស្គាល់ពីភាពខ្លាំងរបស់ព្រះខ័នរាជស្វាយរៀង ទាំងគុណភាពកីឡាករខ្មែរ និងបរទេស ជាពិសេសបច្ចេកទេសដឹកនាំរបស់លោក Jose Munoz។ គ្រូសញ្ជាតិជប៉ុន ក៏បានលើកឡើងពីបញ្ហាស្មៅវែងក្នុងទីលានពហុកីឡដ្ឋានជាតិមរតកតេជោ ដែលបង្កផលវិបានដល់កីឡាករខ្លួន។
«ស្មៅក្នុងទីលានពហុកីឡដ្ឋានជាតិមរតកតេជោ វែងពេក ធ្វើឱ្យកីឡាករ ប្រើកម្លាំងខ្លាំងនៅពេលបញ្ចូនបាល់»។ នេះជាការលើកឡើងរបស់លោក Ono Hiroki មុនបន្ថែមថា នៅជំនួបជើងទី២ ក្រុមរបស់ខ្លួនពិបាកនឹងយកឈ្នះក្រុមព្រះខ័នស្វាយរៀង។
ជំនួបជើងទី២ វគ្គ៨ក្រុម AFC Challenge League រវាង Shan United និង ព្រះខ័នស្វាយរៀង នឹងធ្វើឡើងនៅថ្ងៃទី១៣ ខែមីនា។
លទ្ធផលគូផ្សេងទៀតនៅជំនួបជើងទី១៖
- Al-Arabi ១-០ Al-Seeb
- Tainan City ០-០ Madura United
- East Bengal ០-១ Arkadag៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
