.png)
.jpg)
.jpg)
ខេត្តកំពង់ចាមបង្កើនការគ្រប់គ្រងទន្លេ ស្ទឹង ព្រែក អូរ ប្រឡាយ បឹងបួ និងអាងទឹក
- ថ្ងៃសុក្រ ទី៧ ខែមីនា ឆ្នាំ២០២៥ ម៉ោង ៧:៥៩ នាទី ល្ងាច
លោក អ៊ុន ចាន់ដា អភិបាលខេត្តកំពង់ចាម បានចេញសេចក្តីសម្រេចស្តីពីការបង្កើតគណៈកម្មាធិការគ្រប់គ្រងអាងទន្លេ ស្ទឹង ព្រែក អូរ ប្រឡាយ បឹងបួ និងអាងទឹកនៅក្នុងខេត្ត ដោយលោកដឹកនាំដោយផ្ទាល់ រួមជាមួយលោកអភិបាលរងខេត្ត ហេង វណ្ណនី ដែលជាអនុប្រធាន និងលោក អ៊ុម វិបុល ប្រធានមន្ទីរធនធានទឹក និងឧតុនិយមខេត្ត ជាអនុប្រធានអចិន្ត្រៃយ៍។
តាមសេចក្តីសម្រេចដែលចុះហត្ថលេខា កាលពីថ្ងៃទី៤ ខែមីនា គណៈកម្មការគ្រប់គ្រងអាងទន្លេ ស្ទឹង ព្រែក អូរ ប្រឡាយ បឹងបួ និងអាងទឹក មានតួនាទី និងភារកិច្ចរៀបចំបទបញ្ជាផ្ទៃក្នុង និងផែនការសកម្មភាពសម្រាប់ការគ្រប់គ្រង ការអភិរក្ស ការបែងចែកទឹក ការស្តារឡើងវិញ និងការអភិវឌ្ឍ ទីតាំងទាំងនោះស្របតាមគោលនយោបាយជាតិលើវិស័យធនធានទឹក។
បញ្ជូនរាល់ផែនការទៅគណៈកម្មាធិការជាតិគ្រប់គ្រងអាងទន្លេ សម្របសម្រួលរាល់សកម្មភាពរបស់ក្រសួង ស្ថាប័នពាក់ព័ន្ធ បន្តណែនាំអំពីវិធានការនានាដើម្បីកាត់បន្ថយគ្រោះអាសន្ន ក៏ដូចជាទប់ស្កាត់សកម្មភាពនានាដែលបំពុលបរិស្ថានទឹក។ ទាំងនេះ ជាភារកិច្ចដ៏ចាំបាច់របស់គណៈកម្មការ។
ជាមួយគ្នានេះ ក្រៅពីពង្រឹងការណែនាំ និងជូនដំណឹងដល់ពលរដ្ឋរស់នៅតាមមាត់ទន្លេឱ្យទាន់ពេលវេលាអំពីគ្រោះថ្នាក់បណ្តាលមកពីទឹក លោកអភិបាលខេត្ត អ៊ុន ចាន់ដា ក៏បានចែងអំពីវិធានការម៉ឺងម៉ាត់ចំពោះជនណាដែលរំលោភបំពានទន្ទ្រានកាន់កាប់ដីចំណីទន្លេ ដីចំណីស្ទឹង ដីចំណីព្រែក ដីចំណីអូរ ដីចំណីប្រឡាយ ដីចំណីបឹងបួ និងដីចំណីអាងទឹកទាំងអស់ក្នុងខេត្តផងដែរ។
គណៈកម្មការថ្នាក់ខេត្តនេះ មានសមាជិកដែលជាសមាសភាពដឹកនាំក្នុងខេត្តទាំងមូល រួមមាន ស្នងការខេត្ត, មេបញ្ជាការកងរាជអាវុធហត្ថខេត្ត, នាយករដ្ឋបាលខេត្ត, ប្រធានមន្ទីរសេដ្ឋកិច្ច, ប្រធានមន្ទីរកសិកម្ម, ប្រធានមន្ទីរបរិស្ថាន,ប្រធានមន្ទីរសាធារណការ, ប្រធានមន្ទីរឧស្សាហកម្ម, ប្រធានមន្ទីររ៉ែ, ប្រធានមន្ទីរអភិវឌ្ឍន៍ជនបទ, ប្រធានមន្ទីរទេសចណ៍, ប្រធានមន្ទីររៀបចំដែនដី, ប្រធានមន្ទីរផែនការ, នាយករងរដ្ឋបាលខេត្ត, បណ្តាអភិបាលក្រុង-ស្រុក និងបណ្តាមេឃុំ-ចៅសង្កាត់។
ជាមួយគ្នានេះ លោក អ៊ុន ចាន់ដា ក៏បានបង្កើតឱ្យមានលេខាធិការដ្ឋានមួយដើម្បីធានាដល់កិច្ចដំណើរការគណៈកម្មការឱ្យមានប្រសិទ្ធភាពផងដែរ។ លោក ហេង វណ្ណនី អភិបាលរងខេត្ត ទទួលបន្ទុកជាប្រធាន ដោយមានលោក អ៊ុម វិបុល ប្រធានមន្ទីរធនធានទឹក និងលោក ជា សីលា នាយករងរដ្ឋបាលខេត្ត ជាអនុប្រធាន៕
© រក្សាសិទ្ធិដោយ thmeythmey.com
