សៀមរាប៖ សមរាត្រី ឬហៅថា Equinox តែងកើតមាន២ដងក្នុងមួយឆ្នាំ នៅលើទឹកដីអង្គរ ខេត្តសៀមរាប នោះ គឺនៅក្នុងខែមីនា ហៅថាសមរាត្រីរដូវប្រាំង និងខែកញ្ញា ហៅថាសមរាត្រីរដូវវស្សា។​ ក្នុងខែមីនា ព្រឹត្តិការណ៍ ព្រះអាទិត្យរះ​ចំ​កំពូលប្រាង្គកណ្ដាលប្រាសាទអង្គរវត្ត កើតឡើងនៅថ្ងៃទី២៣ ខែមីនា។ យ៉ាងណាមិញ មហាជនមួយចំនួន តែងទៅចាំអង្កេត និងរង់ចាំមើលព្រឹត្តិការណ៍នេះរយៈពេល៣ថ្ងៃ ដែលពួកគេជឿថា វានឹងកើតនៅចន្លោះថ្ងៃ២០-២២ខែមីនា។ 

ព្រះអាទិត្យពណ៌មាស នឹងសណ្ដូកខ្លួនសន្សឹមៗ ចំកំពូលប្រាង្គកណ្ដាលប្រាសាទអង្គរវត្ត ។ ព្រឹត្តិការណ៍នេះ បានបង្កើតជាទស្សនីយភាពដ៏អស្ចារ្យបំផុត នៅលើប្រាសាទបុរាណខ្មែរ និងមានតែមួយលើលោក។ សាធារណជន ពិសេសភ្ញៀវទេសចរ ទន្ទឹងរង់ចាំមើលព្រឹត្តិការណ៍នេះ ដែលខ្លះក្រោកទៅរង់ចាំឈរលើស្ពានហាល តាំងពីម៉ោង៣ ឬម៉ោង៤ ទៀបភ្លឺ។ ទេសចរមានទូរសព្ទកាន់ ស្ទើរគ្រប់ដៃ បានចុចផ្តិតរូបភាពដ៏អស្ចារ្យនេះមិនសំច័យឡើយ។ ពួកគេថតរូបខ្លួនឯង ជាមួយដៃគូ និងជាគ្រួសារ ដើម្បីទុកជាការចងចាំដ៏ល្អនៅក្នុងព្រឹត្តិការណ៍ដ៏ពិសេសមួយនេះ។

ព្រឹត្តិការណ៍ដ៏អស្ចារ្យនេះ បានក្លាយជាកញ្ចប់ទេសចរណ៍ថ្មីសម្រាប់ខេត្តសៀមរាប និងត្រូវបានផ្សព្វផ្សាយ យ៉ាងទូលំទូលាយ។ ក្រសួងទេសចរណ៍បានផ្សព្វផ្សាយពីព្រឹត្តិការណ៍នេះ ក្នុងន័យរំឭកដល់ទេសចរ កុំឱ្យខកខាន រំលងទស្សនាព្រឹត្តិការណ៍មួយនេះ។ 

សមរាត្រីនៅខែមីនា ឆ្នាំ២០២៤។ រូបភាព៖ MOON- Sok Sanita

អ្នកផលិតមាតិកាទេសចរណ៍ដ៏ល្បីមួយរូបនៅខេត្តសៀមរាប កញ្ញា សុខ សានីតា ឬ MOON- Sok Sanita ក៏បានត្រៀមខ្លួនដើម្បីផ្តិតរូបភាពក្នុងព្រឹត្តិការណ៍សមរាត្រីនាពេលខាងមុខដែរ។ ទោះបីចូលរួមច្រើនដង​ក៏ពិតមែន តែ MOON នៅតែស្ងប់ស្ងែងនឹងព្រឹត្តិការណ៍មួយនេះ និងបន្តផ្តិតយករូបភាពស្អាតៗ ផ្សព្វផ្សាយទៅកាន់ពិភពលោក។ MOON ចង់ឱ្យមនុស្សម្នាដឹងថា អង្គរវត្តខ្មែរពិតជាអច្ឆរិយៈ និងជាព្រឹត្តិការណ៍ពិត ហើយមិនមានការបង្កើតដោយបច្ចេកវិទ្យា AI ឡើយ។

ដោយឡែកអ្នកផលិតមាតិកាដ៏ល្បីមួយរូបទៀត គឺលោក ពៅ អរុណ ក៏បានត្រៀមខ្លួន និងសម្ភារសម្រាប់ ផ្តិតរូបភាពក្នុងព្រឹត្តិការណ៍សមរាត្រីនេះដែរ។ ចូលរួមតាំងពីឆ្នាំ២០១៧មក អរុណ ចាត់ទុកសមរាត្រី ថាជាថ្ងៃដ៏ពិសេសមួយ គឺព្រះអាទិត្យរះចំកំពូលកណ្ដាលប្រាសាទអង្គរវត្ត ដែលមាននៅមួយ​នៅប្រាសាទខ្មែរ។ អរុណ បន្តនិយាយយ៉ាងដូច្នេះ​៖« ក្នុងនាមជាប្រជាជនខ្មែរម្នាក់ ខ្ញុំមានអារម្មណ៍រំភើប​ពេលបានឃើញផ្ទាល់ ហើយក៏សប្បាយចិត្តនៅពេលឃើញ​ អ្នកមកចូលរួមពីមួយឆ្នាំទៅមួយឆ្នាំ​កាន់តែកើនឡើងមានទាំងភ្ញៀវជាតិ និងអន្តរជាតិ»។ 

អរុណ យល់ថា ការកើនឡើងនៃចំនួនទេសចរក្នុងព្រឹត្តិការណ៍សមរាត្រីនេះ ក៏ដោយសារមាន​ការរីកចម្រើនប្រព័ន្ធផ្សព្វផ្សាយ និងការប្រើប្រាស់ទូរសព្ទដៃទំនើប ដែលពួកគេ​បានបង្ហោះ​តាមបណ្ដាញសង្គមនានា ដែលទាញចំណាប់អារម្មណ៍មនុស្សម្នាជាច្រើន ដែលចង់ឃើញទិដ្ឋភាព ដ៏អស្ចារ្យនេះ។​

សមរាត្រីរដូវវស្សា នឹងកើតឡើង នៅក្នុងខែកញ្ញា ចំថ្ងៃទី២២កញ្ញា៕