ពលរដ្ឋជាច្រើន បានចូលបញ្ចេញមតិយោបល់ រិះគន់សេវាមន្ទីរពេទ្យបង្អែកខេត្តសៀមរាប ក្រោយគណនេយ្យហ្វេសប៊ុកឈ្មោះ ប្រជាជនខេត្តសៀមរាប បានបង្ហោះលិខិតអបអរសាទរមន្ទីរពេទ្យបង្អែកខេត្តសៀមរាប ជាប់ជ័យលាភី «អង្គភាពផ្ដល់សេវាសាធារណៈគំរូចំណាត់ថ្នាក់លេខ១ សម្រាប់មន្ទីរពេទ្យបង្អែកផ្ដល់សេវាសំណុំសកម្មភាពបង្រប់កម្រិត៣គំរូឆ្នាំ២០២៤ ក្នុងចំណោមមន្ទីរពេទ្យបង្អែកកម្រិត៣ចំនួន១០ទូទាំងប្រទេស»។ បច្ចុប្បន្ន គណនេយ្យហ្វេសប៊ុក ប្រជាជនខេត្តសៀមរាប បានលុបលិខិតនោះ និងបានបង្ហោះការស្រាយបំភ្លឺរបស់មន្ទីរពេទ្យបង្អែកខេត្តសៀមរាប។

តាមរយៈបញ្ចេញមតិយោបល់របស់ប្រជាពលរដ្ឋទាំងនោះ ភាគច្រើនពួកគេរិះគន់សេវាមន្ទីរពេទ្យ និងការប្រើប្រាស់ ប.ស.ស របស់មន្ទីរពេទ្យមិនបានល្អ។ មតិយោបល់ទាំងនោះ បង្ហាញពីការឈឺចាប់ ដែលខ្លះបានអះអាងថា សេវាមន្ទីរពេទ្យមិនល្អ រួមទាំងមានថ្នាំមិនគ្រប់គ្រាន់ និងមានបញ្ហាជាច្រើនទៀត ដែលពួកគេមិនពេញចិត្តនឹងសេវារបស់មន្ទីរពេទ្យនេះតែម្ដង។ 

លិខិតស្រាបបំភ្លឺរបស់មន្ទីរពេទ្យបង្អែកខេត្តសៀមរាប កាលពីថ្ងៃទី០៨ ខែមីនា ឆ្នាំ២០២៥ បានបញ្ជាក់ថា ថ្នាក់ដឹកនាំនៃមន្ទីរពេទ្យបង្អែកខេត្តសៀមរាប បានឃើញ និងបានអានការបញ្ចេញមតិជាច្រើនទៅក្នុងការបង្ហោះលិខិតនោះ។ «ក្នុងចំណោមលិខិតទាំងនោះ ក៏មានមតិមួយចំនួន បានធ្វើការរិះគន់ដល់ដំណើរការ និងចំណុចខ្វះខាតនៃការផ្ដល់សេវាសុខភាពរបស់មន្ទីរពេទ្យផងដែរ។» មន្ទីរពេទ្យបង្អែកខេត្តសៀមរាប បានរៀបរាប់បែបនេះ។ 

«ចំនួនអតិថិជនមកទទួលសេវាក្នុងមន្ទីរពេទ្យនេះ មានការកើនឡើងយ៉ាងគំហុកពី ១០ ទៅ១៥ភាគរយពីមួយឆ្នាំទៅមួយឆ្នាំ ដែលក្នុងនោះ ក៏មានប្រជាពលរដ្ឋ មកពីបណ្ដាខេត្តក្បែរខេត្តសៀមរាប ដែលមានចំនួន ១៨ ទៅ២០ភាគរយ ភាគច្រើនជាករណីធ្ងន់ និងស្មុគស្មាញ។ បន្ទុកការងារដ៏ធ្ងន់នេះ ក៏ជាកត្តាបង្កឱ្យមានភាពខ្វះចន្លោះក្នុងការផ្ដល់សេវាជៀសមិនផុត។» នេះបើតាមការបកស្រាយបំភ្លឺរបស់មន្ទីរពេទ្យបង្អែកខេត្តសៀមរាប។ 

ជាមួយគ្នានេះ មន្ទីរពេទ្យក៏បានបកស្រាយករណីខ្វះឳសថព្យាបាលផងដែរ។ អ្នកជំងឺច្រើន ដែលមានសភាពធ្ងន់ និងស្មុគស្មាញ បណ្ដាលឱ្យកើតបញ្ហាប្រឈមទៅនឹងការខ្វះខាតឳសថ ពិសេស គឺឳសថ ដែលមិនស្ថិតក្នុងបញ្ជីឳសថសារវ័ន្ត ផ្គត់ផ្គង់ដោយក្រសួងសុខាភិបាល។ 

មន្ទីរពេទ្យ អះអាងថា៖ «មន្ទីរពេទ្យពុំដែលមានករណីរើសអើងចំពោះអតិថិជន ប.ស.ស ឬអតិថិជន ដែលប្រើបណ្ណសមធម៌ឡើយ។» មន្ទីរពេទ្យបង្អែកខេត្តសៀមរាប ទទួលយកមតិរិះគន់កែលម្អទាំងអស់ យកមកពិនិត្យ ពិភាក្សា និងធ្វើការដោះស្រាយកែលម្អសេវា ដើម្បីឱ្យគុណភាពនៃសេវា មានភាពកាន់តែប្រសើរឡើង៕