.jpg)
.jpg)
ជ្រូកទឹកនៅថៃ ប្រឈមការផុតពូជ ដោយសារខ្វះអាហារ
- ថ្ងៃចន្ទ ទី១០ ខែមីនា ឆ្នាំ២០២៥ ម៉ោង ៩:០០ នាទី ព្រឹក
រូបភាព ៖ Thailand Travel Map
ជិត ៤០ភាគរយនៃជ្រូកទឹកក្នុងប្រទេសថៃ ដែលត្រូវបានរកឃើញក្នុងឆ្នាំ ២០២៤ គឺបានជួបនូវកង្វះអាហារូបត្ថម្ភ ព្រោះខ្វះស្មៅសមុទ្រ។ នេះបើយោងតាមនាយកដ្ឋានធនធានសមុទ្រ និងឆ្នេរសមុទ្រ (DMCR) របស់ថៃ និងមូលនិធិសត្វព្រៃពិភពលោក(WWF) ដែល បានបញ្ជាក់ថា ស្មៅសមុទ្រ គឺជាប្រភពអាហារចម្បងរបស់ប្រភេទសត្វនេះ។
របាយការណ៍ ស្តីពី វិបត្តិសត្វជ្រូកទឹកនៅឆ្នេរសមុទ្រ Andaman ដែលធ្វើឡើងក្នុងខែមករា និងចេញផ្សាយនៅថ្ងៃទី៨ ខែមីនា បង្ហាញថា ប្រព័ន្ធអេកូឡូស៊ីនៃមហាសមុទ្រស្ថិតក្នុងស្ថានភាពធ្ងន់ធ្ងរ។ វាលស្មៅសមុទ្រជាច្រើននៅក្នុងខេត្ត Trang, Krabi និង Phuket ត្រូវបានបំផ្លាញយ៉ាងធ្ងន់ធ្ងរ ដែលបង្ខំឱ្យសត្វជ្រូកទឹកជាច្រើន នៅឆ្ងាយពីកន្លែងចិញ្ចឹមធម្មជាតិរបស់ពួកគេ។ ជាលទ្ធផល ចំនួនជ្រូកទឹកមានជំងឺ កំពុងកើនឡើងក្នុងអត្រាគួរឱ្យព្រួយបារម្ភ។
បញ្ហានៃការថយចុះស្មៅសមុទ្រនេះ គឺមិនទាន់មានប្រភពច្បាស់លាស់នៅឡើយទេ ។ ប៉ុន្តែ វាអាចបណ្តាលមកពីកត្តាមួយចំនួន ដូចជា ៖ ការកកកុញនៃដីល្បាប់ ការទន្ទ្រានតំបន់ឆ្នេរ ការកើនឡើងសីតុណ្ហភាពទឹកសមុទ្រ និងពពួកមំសាសី ដែលបានរារាំងប្រភេទសត្វសមុទ្រមួយចំនួនពីការងើបឡើងវិញយ៉ាងឆាប់រហ័ស។
លោក ឯកណារិន អារីយ៉ាវង្សវីវ៉ាត់ ប្រធានផ្នែកអភិរក្សធនធានសមុទ្រ និងឆ្នេរសមុទ្រនៃអង្គការ WWF ប្រទេសថៃ បានលើកឡើងថា ចំនួនជ្រូកទឹកដែលបានរកឃើញនាអំឡុងឆ្នាំ២០២៣-២០២៤ មានជាមធ្យម៤២ក្បាល។ នេះកំណើនគួរឱ្យកត់សម្គាល់បើធៀបនឹងឆ្នាំ ២០១៩ - ២០២២ មានជ្រូកទឹកចំនួន២០ក្បាលប៉ុណ្ណោះ ។ លើសពីនេះ អត្រាកំណើតរបស់ថនិកសត្វនេះបា នធ្លាក់ចុះពី៩ភាគរយក្នុងឆ្នាំ ២០២០-២០២៣ មកត្រឹមតែ ៣ភាគរយក្នុងឆ្នាំ ២០២៤។
បើតាមលោក ឯកណារិន ការស្ទង់មតិបានជួយបំភ្លឺពីស្ថានភាពបច្ចុប្បន្ន និងតម្រូវការបន្ទាន់សម្រាប់គំនិតផ្តួចផ្តើមអភិរក្សទាំងរយៈពេលខ្លី និងរយៈពេលវែង ដោយហេតុនេះការលើកកម្ពស់ការការពារស្មៅសមុទ្រ និងសត្វជ្រូកទឹកជាអាទិភាពរបស់ជាតិ។ លោកបានព្រមានថា ប្រសិនបើស្មៅសមុទ្របាត់បង់ជ្រូកទឹកក៏នឹងផុតពូជ។
ចាប់តាំងពីដើមឆ្នាំនេះមក អ្នកជំនាញ DMCR បានរកឃើញជ្រូកទឹកចំនួន ៧ក្បាល ហើយប៉ាន់ស្មានថាចំនួនសត្វប្រភេទនេះនៅក្នុងសមុទ្រ Andaman ឥឡូវនេះមានត្រឹមតែប្រហែល ១០០ក្បាលប៉ុណ្ណោះ៕
© រក្សាសិទ្ធិដោយ thmeythmey.com
Tag:
