.jpg)
.jpg)
ថៃអនុញ្ញាតឲ្យសិស្សសាលា«ទុកម៉ូដសក់» ក្រោយហាមអស់ ៥០ឆ្នាំ
- ថ្ងៃចន្ទ ទី១០ ខែមីនា ឆ្នាំ២០២៥ ម៉ោង ៧:៣០ នាទី ល្ងាច
សិស្សសាលាថៃកាត់សក់ ។ រូបភាព ៖ AFP
បទបញ្ជារបស់ក្រសួងអប់រំថៃដែលរឹតបន្តឹងលើការកាត់សក់របស់សិស្ស ត្រូវបានដកចេញបន្ទាប់ពីអនុវត្តអស់ពាក់កណ្តាលសតវត្សរ៍។ នេះបើតាមសារព័ត៌មាន Bangkok Post។
សេចក្តីសម្រេចរបស់តុលាការថៃ ដែលបានប្រកាសកាលពីថ្ងៃទី៥ ខែមីនា បានលុបចោលបទបញ្ជាឆ្នាំ ១៩៧៥របស់ក្រសួងអប់រំថៃ ដែលតម្រូវឱ្យសិស្សប្រុសមានសក់ខ្លី និងគ្មានពុកមាត់ ហើយសិស្សស្រីត្រូវមានសក់វែងហួសត្រចៀក និងគ្មានការតុបតែងមុខ។ តុលាការបានអះអាងថា នេះបានរំលោភលើសេរីភាពបុគ្គល និងមិនស៊ីសង្វាក់គ្នានឹងសង្គមដែលមានការផ្លាស់ប្តូរ។
នៅក្នុងសេចក្តីសម្រេចនេះ បទប្បញ្ញត្តិលើម៉ូដសក់ និងឯកសណ្ឋានគឺអាស្រ័យលើសាលា។ លោក Siripong Angsakulkiat អ្នកនាំពាក្យក្រសួងអប់រំថៃបានបញ្ជាក់ថា ក្រសួងផ្តល់អាទិភាពលើការផ្តល់សិទ្ធិអំណាចដល់សិស្ស និងបង្កើតលក្ខខណ្ឌសម្រាប់សាលារៀនក្នុងការកសាងបរិយាកាសសិក្សាដ៏ទូលំទូលាយ និងផ្តោតលើសិស្ស។
នៅថៃ សក់ខ្លីជានិមិត្តរូបនៃភាពស្អាតស្អំ និងវិន័យក្នុងសាលារដ្ឋជាយូរមកហើយ។ សាលារៀនជាច្រើនហាមឃាត់សិស្សមិនឱ្យកាត់សក់ ឬលាបពណ៌សក់របស់ពួកគេ។ បើល្មើសនឹងត្រូវដាក់ពិន័យ។ គ្រូខ្លះថែមទាំងកាត់សក់សិស្សក្នុងពេលគោរពទង់ជាតិ ជាទម្រង់នៃការដាក់ទណ្ឌកម្ម។
ជាច្រើនឆ្នាំមកនេះ សិស្សសាលាបានតវ៉ាចំពោះច្បាប់នេះ ដោយលើកហេតុផលថា វារំលោភលើសិទ្ធិផ្ទាល់ខ្លួនរបស់ពួកគេ។ ប្រឈមមុខនឹងសម្ពាធបែបនេះ នៅឆ្នាំ ២០២០ ក្រសួងអប់រំបានបន្ធូរបន្ថយបទប្បញ្ញត្តិដោយអនុញ្ញាតឱ្យសិស្សមានសក់វែង ប៉ុន្តែសិស្សប្រុសមិនត្រូវបានអនុញ្ញាតឱ្យមានសក់សំយ៉ុងចុះក្រោមកនោះទេ ហើយសិស្សស្រីត្រូវចងសក់ឱ្យស្អាត។
នៅឆ្នាំ២០២៣ រដ្ឋមន្ត្រីក្រសួងអប់រំបានប្រកាសថា ការសម្រេចចំពោះ«ស្ទីលម៉ូដសក់»នឹងត្រូវបានផ្តល់ឱ្យសាលារៀនជាអ្នកកំណត់។ ទោះជាយ៉ាងណា សាលារៀនជាច្រើននៅតែប្រកាន់ខ្ជាប់នូវបទប្បញ្ញត្តិឆ្នាំ ១៩៧៥៕
© រក្សាសិទ្ធិដោយ thmeythmey.com
Tag:
