ជំងឺទឹកនោមផ្អែមប្រភេទ១លើកុមារ គឺជាជំងឺរ៉ាំរ៉ៃដែលបណ្តាលមកពីប្រព័ន្ធ ភាព​ស៊ាំរបស់អ្នកជំងឺប្រឆាំងនឹងកោសិកាលំពែង ដែលមានមុខងារផលិតអាំងស៊ុយលីន ឬកោសិកា​បែតា។ ជំងឺនេះ ភាគច្រើនកើតលើកុមារអាយុចាប់ពី៤ ដល់១៤ឆ្នាំ ដែលជាវ័យស្ថិត​ក្រោមការ​មើលថែ​របស់​អាណាព្យាបាល។

គេអាចសម្គាល់បានថា កុមារដែលកើតជំងឺទឹកនោមផ្អែម មានរោគសញ្ញាដូចជា ផឹកទឹកច្រើន នោមច្រើ​ន ញាំច្រើន តែចុះស្គម និងអស់កម្លាំង។ ជារឿងអភ័ព្វសម្រាប់អ្នកជំងឺទឹកនោមផ្អែម ដោយជំងឺនេះមិន អាចព្យាបាលជាសះស្បើយឡើយ ហើយអ្នកវិទ្យាសាស្រ្តក៏មិនទាន់រក​ឃើញមូលហេតុពិតប្រាកដដែល​បង្កឱ្យកុមារកើតមានជំងឺទឹកនោមផ្អែមប្រភេទទី១នេះដែរ។  ប៉ុន្តែគេអាចប៉ាន់ប្រមាណថា មានកត្តាមួយ​ចំនួនដែលជំរុញឱ្យកុមារកើតជំងឺទឹកនោមផ្អែមបាន។

សូមលោកអ្នកទស្សនាវីដេអូខាងក្រោម៖ 

លោកវេជ្ជបណ្ឌិត ឃុន លាងឈុន អនុប្រធានមន្ទីរពេទ្យគន្ធបុប្ផាសៀមរាប បានលើកឡើងថា​ ទោះបីជាគេមិនអាច​កំណត់​មូលហេតុច្បាស់លាស់ដែលបណ្ដាលឱ្យកុមារកើតជំងឺទឹកនោមផ្អែមក៏ដោយ ប៉ុន្តែការកើត​ជំងឺ​ទឹកនោម​ផ្អែម មិនមែនជាកំហុសរបស់នរណាម្នាក់ទេ។ បើតាមលោកវេជ្ជបណ្ឌិត ឃុន លាងឈុន ទោះបីជាគេមិនព្យាបាលជំងឺទឹកនោម​ផ្អែម​ប្រភេទទី១លើកុមារក៏ពិតមែន ប៉ុន្តែ ការណ៍នេះមិនបានន័យថា កុមារដែលកើតជំងឺទឹកនោមផ្អែម នឹងមាន​ជីវិត​​ខ្លីនោះទេ។ ជាក់ស្ដែងអ្នកជំងឺទឹកនោមផ្អែម អាចរៀនសូត្រ ប្រកបការងារ នឹងអាចមានជីវិត​រស់បាន​យូរដូច​មនុស្សទូទៅដែរ​។ 

ដើម្បីបន្តការរស់រានមានជីវិត និងរស់នៅប្រកបដោយផាសុកភាព អ្នកជំងឺទឹកនោមផ្អែមប្រភេទទី១ ត្រូវ​ប្រើប្រាស់​ថ្នាំ អាំងស៊ុយលីនជាប្រចាំ។  អាំងស៊ុយលីន មានតួនាទីនាំជាតិស្ករដែល​អ្នកជំងឺបានទទួនទាន ចូលទៅក្នុងឈាម ហើយយកជាតិស្ករទាំងនោះ ប្រើប្រាស់ជាថាមពលក្នុងរាងកាយរបស់អ្នកជំងឺ។ 

លោកវេជ្ជបណ្ឌិត ឃុន លាងឈុន លើកឡើងដូច្នេះ៖«ជំងឺទឹកនោមផ្អែមប្រភេទទី១នេះ ត្រូវព្យា​បាលអាំងស៊ុយលីន មួយជីវិត។  ប៉ុន្តែអ្វីដែលសំខាន់គឺការត្រួតពិនិត្យជាតិស្ករនៅក្នុងខ្លួនឱ្យបានត្រឹមត្រូវ ចាក់ថ្នាំ អាំងស៊ុយលីនឱ្យ បានត្រឹមត្រូវជីវិតអ្នកកើតជំងឺទឹកនោមផ្អែមនឹងរស់នៅដូចគេដូចឯង»។​

ជាការពិតណាស់ការព្យាបាលជំងឺទឹកនោមផ្អែមកុមារ មិនពឹងអាស្រ័យតែជាមួយគ្រូពេទ្យតែមួយមុខ នោះទេ។ វាត្រូវតែមានការចូលរួមជាចាំបាច់ពីអាណាព្យាបាល ក្នុងការថែទាំ ពិនិត្យជាតិស្ករ និងការប្រើ អាំងស៊ុយលីនឱ្យបានត្រឹមត្រូវ ជាពិសេសឪពុកម្ដាយត្រូវលើកទឹកចិត្តកូន ប្រឹក្សាជាមួយកូន និងគ្រប់គ្រង របបអាហារកូនឱ្យបានត្រឹមត្រូវ។៕